31 C
Phnom Penh

សមាជិក​​​សភា​​​គណបក្ស​សង្គ្រោះ​​​ជាតិ​​​មួយ​​​រូប​​​ភ្ជាប់​​​ពាក្យ​​​ជាមួយ​​​សកម្មជន​​បឹង​​​កក់

ដោយ ឌឹ ខេមបូឌា ដេលី

បទវិភាគ

អ្នកស្រី​ យ៉ោម បុប្ផា សកម្មជន​ប្រឆាំង​ការ​បណ្ដេញ​ពី​ដីធ្លី​ដ៏​ល្បី​ឈ្មោះ​ម្នាក់ និង​លោក រៀល ខេមរិន្ទ្រ ​សមាជិក​សភា​គណបក្ស​ប្រឆាំង​បាន​ប្រកាស​ពី​គម្រោង​រៀបការ​របស់​ខ្លួន​នៅ​ឆ្នាំ​ក្រោយ​​នៅ​ពិធី​ភ្ជាប់​ពាក្យ​ក្នុង​រាជ​ធានី​ភ្នំពេញ​កាលពី​ថ្ងៃ​សៅរ៍។

លោក រៀល ខេមរិន្ទ្រ ​និងអ្នកស្រី​ យ៉ោម បុប្ផា ថតរូបក្នុងពិធី​ភ្ជាប់​ពាក្យ​កាលពី​ថ្ងៃ​សៅរ៍​ រូបនេះយកពីទំព័រហ្វេសបុករបស់លោក រៀល ខេមរិន្រ។
លោក រៀល ខេមរិន្ទ្រ ​និងអ្នកស្រី​ យ៉ោម បុប្ផា ថតរូបក្នុងពិធី​ភ្ជាប់​ពាក្យ​កាលពី​ថ្ងៃ​សៅរ៍​ រូបនេះយកពីទំព័រហ្វេសបុករបស់លោក រៀល ខេមរិន្រ។

អ្នកស្រី យ៉ោម បុប្ផា អាយុ​៣៤​ឆ្នាំ​បាន​និយាយ​កាលពី​ម្សិលមិញ​ថា “យើង​មាន​គម្រោង​រៀប​អាពាហ៍​​​​​ពិពាហ៍​​​នៅ​ខែ​មេសា”។ អ្នកស្រី យ៉ោម បុប្ផា ជា​សកម្មជន​ម្នាក់​ក្នុង​ចំណោម​សកម្មជន​ដ៏​​​លេច​ធ្លោ​​​បំផុត​ដែល​មកពី​សហគមន៍​បឹង​កក់​ក្នុង​រាជ​ធានី​ភ្នំពេញ។

អ្នកស្រី​ត្រូវ​បាន​ចាប់​ខ្លួន​កាលពី​ខែ​កញ្ញា ឆ្នាំ​២០១២ តាម​ការ​ចោទ​ប្រកាន់​​ទាក់​ទង​ការ​បង្ក​របួស​ស្នាម ដែល​​អ្នកស្រី និង​ក្រុម​សិទ្ធិ​មនុស្ស​អះអាង​ថា ត្រូវ​បាន​ប្រឌិត​ដើម្បី​ដាក់​ទោស​អ្នកស្រី​ដោយ​​​សារ​​​សកម្ម​​​ភាព​​​របស់​​​អ្នកស្រី​​​ ហើយ​ត្រូវ​បាន​ដោះ​លែង​ឲ្យ​នៅ​ក្រៅ​ឃុំ​កាលពី​ខែ​វិច្ឆិកា ឆ្នាំ​២០១៣។ បន្ទាប់ពី​​ត្រូវ​ដោះលែង​ អ្នកស្រី​បាន​លែង​លះ​ជាមួយ​​​ប្ដី​អ្នក​​​ស្រី​ពីព្រោះ​​ប្ដី​អ្នកស្រី​ចង់​ឲ្យ​អ្នកស្រី​ឈប់​ធ្វើ​ការ​តវ៉ា​។

លោក រៀល ខេមរិន្ទ្រ ​អាយុ​៥៦​ឆ្នាំ​​ ដែល​ក៏​បាន​ចូល​រួម​ក្នុង​ការ​តវ៉ា​ដ៏​​​ច្រើន​​​របស់​គណបក្ស​ប្រឆាំង​​ ជំទាស់​​​​នឹង​គោល​នយោបាយ​របស់​រដ្ឋា​​​ភិបាល​​​ដែរ​​​នោះ​ ហើយ​លោក​​​ត្រូវ​បាន​ចាប់​​​ឃុំ​ខ្លួន​​រយៈ​ពេល​ប៉ុន្មាន​ថ្ងៃ​កាលពី​ខែ​កក្កដា ចំពោះ​ការ​ចូល​​​រ​ួម​ការ​​​តវ៉ា​កាលពី​ពេល​ថ្មីៗ​នៅ​ក្នុង​រាជ​ធានី​ភ្នំពេញ ដែល​បាន​ប្រែក្លាយ​ជា​ហិង្សា។

អ្នកស្រី យ៉ោម បុប្ផា ​បាន​និយាយ​ថា អ្នកស្រី​ទទួល​យក​សំណើ​របស់​លោក​​​ រៀល ខេមរិន្ទ្រ ពីព្រោះ​​សកម្ម​ភាព​រួម​របស់​ពួក​​​គាត់​​​​ និង​ជំនឿ​លើ​បុព្វហេតុ​ដូច​គ្នា​។ អ្នកស្រី​បាន​និយាយ​ថា “លោក​ រៀល​ ខេមរិន្ទ្រ ជួយ​ប្រជា​ជន​ និង​សង្គម…។ គាត់​មាន​​ចិត្ត​ដូច​ខ្ញុំ​អ៊ីចឹង​ ដូច្នេះ​ខ្ញុំ​បាន​ទទួល​យក​គាត់​”។

លោក រៀល ខេមរិន្ទ្រ បាន​មាន​ប្រសាសន៍​ថា លោក​បាន​ជួប​​អ្នកស្រី យ៉ោម បុប្ផា ​ក្នុង​រយៈ​ពេល​ប៉ុន្មាន​ខែ​ប៉ុណ្ណោះ បន្ទាប់ពី​​អ្នកស្រី​ត្រូវ​បាន​ដោះ​លែង​ពី​​ពន្ធនាគារ​នៅ​កន្លែង​ធ្វើ​បាតុកម្ម​មួយ​ចំនួន​។

លោក​បាន​មាន​ប្រសាសន៍​ថា “ខ្ញុំ​បាន​សម្លឹង​​​​មើល​គាត់​ ហើយ​នៅ​ពេល​ណា​​​ក៏​​​ដោយ​​​ដែល​យើង​ជួប​គ្នា​ ​យើង​តែង​តែ​និយាយ​​សួស្ដី​ដាក់​គ្នា។ ខ្ញុំ​យក​គាត់​ធ្វើ​ជា​ប្រពន្ធ​ ពីព្រោះ​គាត់​មាន​បំណង​ដូច​ខ្ញុំ​ ដើម្បី​ជួយ​សង្គម ហើយ​គាត់​មិន​ក្រអឺត​ក្រទម​ តែ​ក្លាហាន និង​រឹងមាំ​”៕ សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស