28 C
Phnom Penh

ឧត្តម​​​សេនីយ៍ទោ ថោង សារ៉ាត់ ទទួល​​​បាន​​​មេធាវី​​​ក្នុង​​​ករណី​​​មនុស្សឃាត

ដោយ ឌឹ ខេមបូឌា ដេលី

បទវិភាគ

លោក ថោង សារ៉ាត់ មន្ត្រី​​​ក្រសួង​​​ការ​​​ពារ​​​ជាតិ​​​ដែល​​​កំពុង​​​ស្ថិត​​​ក្រោម​​​ការ​​​តាម​​​ចាប់​​​ខ្លួន​​​តាម​​​ការ​​​ចោទ​​​ប្រកាន់​​​ពី​​​បទរៀបចំ​​​ការ​​​​​​​​​ធ្វើឃាត​​​ពាណិជ្ជករ​​​ដ៏​​សំខាន់ម្នាក់​​​នៅ​​​ក្នុង​​​រាជធានី​​​ភ្នំពេញ​​​កាល​​​ពី​​ខែ​​​មុន​​​នោះ ឥឡូវនេះ​​​ទទួល​​​បាន​​​មេធាវី​​​ការ​​​ពារ​​​។

លោក គា អ៊ាវ មេធាវីការ​​​ពារ​​​​​​​​​បាន​​​មាន​​​ប្រសាសន៍​​​កាលពី​​​ម្សិលមិញ​​​ថា លោក​​​ក៏​​​នឹង​តំណាង​ឲ្យ​អង្គរក្ស​​បួន​នាក់​របស់​ឧត្ដម​សេនីយ៍​​​ទោ ថោង សារ៉ាត់ ដែរ​​​ដែល​កំពុង​​​ត្រូវ​ឃុំខ្លួន​បណ្ដោះ​​​​អាសន្ន​​​​តាម​ការ​ចោទ​ប្រកាន់​ពី​​​បទ​សម្លាប់​លោក អុឹង ម៉េងជឺ ប្រធាន​ក្រុមហ៊ុន Shimmex ដែល​ត្រូវ​បាន​បាញ់​​ប្រាំមួយ​គ្រាប់​នៅ​ក្រៅ​ហាង​លក់​ផ្លែ​ឈើ​មួយ​​កាលពី​ថ្ងៃ​ទី​២២ ខែ​កញ្ញា។

នៅ​ក្នុង​រូបភាព​វីដេអូ​ដែល​បាន​បង្ហោះ​តាម​​យូ​​​ធូប​កាលពី​ថ្ងៃ​សុក្រ ឧត្ដម​សេនីយ៍​ទោ ថោង សារ៉ាត់ ដែល​ស្ថិត​ក្នុង​បញ្ជី​របស់​នគរ​បាល​អាំង​​​ទែ​​​ប៉ូល​ជា​ឧក្រិដ្ឋជន​ដែល​​​កំពុង​​​​តាម​រក​ចាប់​ខ្លួន​កាលពី​សប្ដាហ៍​​​មុន​​​នោះ បាន​អះអាង​ពី​ភាព​គ្មាន​ទោស​របស់​ខ្លួន ហើយ​បាន​​សុំ​ឲ្យ​លោក​នាយក​​​រដ្ឋ​មន្ត្រី​ ហ៊ុន សែន ជួយ​អន្តរាគមន៍​។

កាលពី​ម្សិលមិញ លោក គា អ៊ាវ បាន​មាន​ប្រសាសន៍​ថា ម្ដាយ​របស់​ឧត្ដម​សេនីយ៍​​​ទោ ថោង សារ៉ាត់ ដែល​កំពុង​ជាប់​ពន្ធនាគារ​ជាមួយ​ប្ដី​របស់​ខ្លួន​តាម​ការ​ចោទ​ប្រកាន់​ពី​​​បទ​មាន​អាវុធ​ខុស​ច្បាប់​ បន្ទាប់ពី​ការ​ចាប់​ខ្លួន​អំឡុង​ការ​ឆ្មក់​ចូល​របស់​នគរ​បាល​​ទៅ​លើ​​ភូមិគ្រឹះ​មួយ​ចំនួន​របស់​ឧត្ដម​សេនីយ៍​រូប​នេះ​កាលពី​ថ្ងៃទី៣ ខែ​ធ្នូ ហើយ​បាន​សុំ​ឲ្យ​លោក​ការ​ពារ​កូន​ប្រុស​របស់​គាត់​។

លោក​បាន​មាន​ប្រសាសន៍​ថា “កាលពី​ថ្ងៃ​ទី​១៨ ខែ​ធ្នូ ម្ដាយ​របស់​គាត់​បាន​សុំ​ឲ្យ​ខ្ញុំ​ជួយ​ការ​ពារ​គាត់​។ ខ្ញុំ​បាន​ទៅ​​ពន្ធនាគារ​ដើម្បី​ជួប​អ្នកស្រី។ ខ្ញុំ​បាន​ដាក់​ពាក្យ​​ដើម្បី​ការ​ពារ​គាត់​នៅ​សាលា​ដំបូង​រាជធានី​ភ្នំពេញ​កាលពី​ថ្ងៃ​ទី​១៩ ខែ​ធ្នូ”។

លោក​ គា អា៊វ បាន​បន្ថែម​ថា លោក​ក៏​បាន​ការ​ពារ​​ក្ដី​ឲ្យ​​​អង្គរក្ស​ទាំង​បួន​នាក់​ផង​ដែរ បន្ទាប់​ពី​មាន​ការ​បណ្ដេញ​លោក ចុង អ៊ាវហេង មេធាវី​ដំបូង​របស់​ពួកគេ​​នៅ​ថ្ងៃ​​ដែលអង្គរក្ស​ទាំង​នេះ​ត្រូវ​បាន​ចោទ​ប្រកាន់​នោះ បាន​មាន​ប្រសាសន៍​ថា គ្មាន​​​អ្វី​​​ដែល​​​លោក​​​អាច​​​ជួយ​ពួកគេ​បាន​ទេ ពីព្រោះ​​​ពួកគេ​បាន​សារភាព​ប្រាប់​នគរ​បាល​អស់​ទៅ​ហើយ។

លោក គា អា៊វ បាន​មាន​ប្រសាសន៍​​កាលពី​ម្សិលមិញ​ថា “មាន​​ការ​សារភាព​ពី​អង្គរក្ស​ម្នាក់​ ឬពីរ​នាក់​ ប៉ុន្តែ​តាម​ច្បាប់​វា​​ត្រូវ​​​ស៊ីគ្នា​នឹង​ភ័ស្តុ​​​​តាង​។ បច្ចុប្បន្ន​នេះ​គ្មាន​ភ័ស្តុ​តាង​ដើម្បី​ដាក់​បន្ទុក​លើ​ពួកគេ​ឡើយ​”។ លោក​បាន​មាន​ប្រសាសន៍​ថា លោក​មិន​បាន​និយាយ​ទៅកាន់​ឧត្ដម​សេនីយ៍​​​ទោ ថោង សារ៉ាត់ ទេ​ ហើយ​​​លោក​ក៏​មិន​ដឹង​ពី​កន្លែង​លាក់​ខ្លួន​របស់​គាត់​ដែរ​។

លោក​ ចុង អ៊ាវហេង ដែល​ជា​​មេធាវី​ដំបូង​របស់​អង្គរក្ស​ទាំង​នេះ​បាន​មាន​ប្រសាសន៍​ថា គេ​​​ឲ្យ​​​លោក​​​ឈប់​​​ ពី​​​ព្រោះ​​​អង្គរក្ស​​​​ទាំង​បួន​នាក់​នេះ​មិន​ចុះ​សម្រុង​ជាមួយ​​លោក​។ លោក​បាន​មាន​ប្រសាសន៍​ថា “ជន​សង្ស័យ​ទាំង​បួន​នាក់​នេះ​បាន​សុំ​ឲ្យ​បណ្ដេញ​ខ្ញុំ​ចេញ ពីព្រោះ​ពួកគេ​មិន​​​ពេញ​ចិត្ត​ខ្ញុំ​”៕ សារុន​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស