ក្រសួង​សេដ្ឋកិច្ច​ និង​ហិរញ្ញវត្ថុ​​បន្ទោស​កង្វះ​តម្លាភាព​ថវិកា​លើ​បច្ចេកវិទ្យា​

លោក អូន ព័ន្ធ​មុនីរ័ត្ន រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ ​បាន​ឲ្យ​ដឹង​កាលពីម្សិលមិញ​ថា ដំណើរ​ការ​ធ្វើ​សេចក្ដី​ព្រាង​ថវិកា​ដែល​ត្រូវ​បាន​រិះគន់​ជាយូរ​មក​ហើយ​របស់​ប្រទេស​កម្ពុជា​នៅ​តែ​​មាន​ភាព​មិន​ច្បាស់​លាស់​ ដោយ​សារ​ខ្វះ​បច្ចេកវិទ្យា​ដែល​នឹង​ធ្វើ​ឲ្យ​ក្រសួង​របស់​លោក​មាន​ដំណើរ​ការ​លឿន​ និង​ចែក​រំលែក​ព័ត៌មាន​បាន​ទាន់​ពេល​វេលា​ដល់​សាធារណជន។

ថ្លែង​នៅ​ក្នុង​វេទិកា​មួយ​ស្ដីពី​កិច្ច​ខិត​ខំប្រឹង​ប្រែង ​ដើម្បី​ធ្វើ​ឲ្យ​តម្លាភាព​ថវិកា​មាន​ភាព​ប្រសើរ​ឡើង​នៅ​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធ​មុនីរ័ត្ន បាន​លើក​ឡើង​ថា ព័ត៌មាន​លម្អិត​នៃ​សេចក្ដី​ព្រាង​ថវិកា​ត្រូវ​បាន​ចេញ​យឺត​ពេល​ជារៀង​រាល់​ឆ្នា​ំ​នោះ ដោយ​សារ​វា​ត្រូវ​ការ​ចំណាយ​ពេល​វេលា​យូរ​ពេក​ក្នុង​ការ​រៀបចំ​ឯកសារ ហើយ​​បង្ហោះ​​វា​លើ​គេហទំព័រ​របស់​ក្រសួង។

រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ​រូប​នេះ​បាន​មាន​ប្រសាសន៍​ថា ” បញ្ហា​​គឺ​នៅ​ត្រង់​ថា ព័ត៌មាន​ត្រូវ​បាន​ចេញ​យឺត​នៅ​ក្នុង​គេហទំព័រ​របស់​យើង ព្រោះ​​យើង​ខ្វះ​បច្ចេកវិទ្យា​ដើម្បី​អភិវឌ្ឍ​របាយការណ៍​ហិរញ្ញវត្ថុ​ ដោយ​សារ​តែ​មាន​គណនេយ្យ​ជាតិ​ជាច្រើន​ ហើយ​​យើង​ត្រូវ​ការ​ពេល​វេលា​បន្ថែម​”។

ថវិកា​ចំនួន​​៣,៨ពាន់​លាន​ដុល្លារ​ សម្រាប់​ឆ្នាំ​២០១៥ ត្រូវ​បាន​ឆ្លង​​​សភា​កាលពី​ចុង​ខែ​វិច្ឆិកា ទោះ​បី​ជា​សមាជិក​​សភា​មកពី​គណបក្ស​ប្រឆាំង​រិះគន់​ថា ខ្វះ​សេចក្ដី​លម្អិត​ ហើយ​ទីបំផុត​បាន​បោះ​ឆ្នោត​អនុប្បវាទ​ក្ដី​។

ទោះ​ជា​យ៉ាង​ណា លោក​ អូន ព័ន្ធ​មុនីរ័ត្ន បាន​លើក​ឡើង​កាលពី​ម្សិលមិញ​ថា ដោយ​ចាប់​ផ្ដើម​ពី​ឆ្នាំ​ក្រោយ​ទៅ រដ្ឋាភិបាល​​នឹង​ប្រើ​ប្រាស់​ប្រព័ន្ធ​​ព័ត៌មាន​វិទ្យា​ដែល​ល្អ​ប្រសើរ​ និង​​ប្លង់​គណនេយ្យ​ថ្មី ដែល​នឹង​​ធ្វើ​ឲ្យ​​ក្រសួង​អាច​​បង្ហោះ​ព័ត៌មាន​ស្ដីពី​ថវិកា​​នៅ​លើ​ប្រព័ន្ធ​អុីនធើណិត​បាន​ទាន់​ពេល​វេលា។

លោក​បាន​មាន​ប្រសាសន៍​ថា ” បច្ចេកវិទ្យា​​​នឹង​ជួយ​ឲ្យ​​អាច​ធ្វើ​ដូច្នោះ ហេតុដូច្នេះ របាយ​ការណ៍​ហិរញ្ញវត្ថុ​ត្រូវ​បាន​ទទួល​ទាន់​ពេល​វេលា និង​ស្រប​តាម​បទដ្ឋាន​អន្តរជាតិ​ ដែល​មាន​ន័យ​ថា សាធារណជន​នឹង​ដឹង​អំពី​សេចក្ដី​លម្អិត​នៃ​ថវិកា”។

ទោះ​បី​ជា​ក្រសួង​ខិត​ខំ​ធ្វើ​កំណែទម្រង់​ដំណើរ​ការ​​ធ្វើ​​សេចក្ដី​ព្រាង​ថវិកា​ក៏​ដោយ ក៏​លោក សុន ឆ័យ សមាជិក​សភា​មកពី​គណបក្ស​សង្គ្រោះជាតិ និងជា​​អនុប្រធាន​គណៈកម្មការ​ហិរញ្ញ​វត្ថុ និងធនាគារ​នៅ​រដ្ឋសភា​​បាន​លើក​ឡើង​កាលពី​ម្សិលមិញ​ថា លោក​គ្មាន​សង្ឃឹម​ថា នឹង​មាន​ការ​ផ្លាស់​ប្ដូរ​ទេ​​។

លោក សុន ឆ័យ បាន​មាន​ប្រសាសន៍​ថា ” ខ្ញុំ​សង្ស័យ​ថា វា​នឹង​មិន​កើត​ឡើង​ទេ។ ទាល់​តែ​ដំណើរ​ការ​នេះ​មានការ​បើក​ចំហរ​ច្រើន​ជាង​មុន ហើយ​​មាន​ការ​ផ្ដល់​មតិយោបល់​បន្ថែម​ពី​មនុស្ស​គ្រប់​លំដាប់​ថ្នាក់​នៅ​ក្នុង​សង្គម​ បើ​ពុំដូច្នោះ​ទេ​យើង​នឹង​នៅ​តែ​​បន្ត​មាន​បញ្ហា​ថវិកា​ដដែល​”។

លោក ព្រាប កុល នាយក​ប្រតិបត្តិ​អង្គការ​តម្លាភាព​កម្ពុជា ដែល​ចូល​រួម​ក្នុង​វេទិកា​កាលពី​ម្សិលមិញ​បាន​លើក​ឡើង​​ពេល​បន្ទាប់​មក​ថា ព្រឹត្តិការណ៍​នេះ​គឺ​ជា​ “ជំហាន​វិជ្ជមាន​ដំបូង”។

លោក​បាន​បន្ថែម​ថា ” ទោះ​ជា​យ៉ាង​ណាយើង​គិត​ថា វា​នឹង​​​មាន​ការ​ប្រសើរ​ឡើង​ ប្រសិន​បើ​ការ​ពិគ្រោះ​យោបល់​ និង​វេទិកា​បែប​នេះ​​ត្រូវ​បាន​ធ្វើ​ឡើង​អំឡុង​ដំណើរ​ការ​​នៃ​ការ​ធ្វើ​សេចក្ដី​ព្រាង​ថវិកា​នោះ​”៕ ស៊ុយឈាង

(រាយការណ៍​បន្ថែម​ដោយ​ Chris Meuller)​​​​​​​​​​​​​

 

© 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.