នគរបាលខេត្តស្ទឹងត្រែងបានរឹបអូសឈើខុសច្បាប់ពេញមួយរថយន្តកាលពីថ្ងៃអាទិត្យ ហើយកំពុងស៊ើបអង្កេតមន្ត្រីរដ្ឋបាលព្រៃឈើម្នាក់ដែលបានព្យាយាមមកយកឈើ្ររបស់ខ្លួនបន្ទាប់ពីការរឹបអូស។
លោក ផាត សុផាណា នាយនគរបាលព្រហ្មទណ្ឌប្រឆាំងបទល្មើសសេដ្ឋកិច្ចខេត្តបានមានប្រសាសន៍កាលពីម្សិលមិញថា មន្ត្រីរបស់លោកបានឃាត់រថយន្តនេះនៅប៉ុស្តិ៍ត្រួតពិនិត្យមួយតាមផ្លូវជាតិលេខ៧ ក្នុងក្រុងស្ទឹងត្រែងដើម្បីពិនិត្យរកអាជ្ញាប័ណ្ណដឹកឈើ។
លោកបានមានប្រសាសន៍ថា ប៉ុន្តែ បន្ទាប់ពីឃាត់រថយន្ត អ្នកបើកបរ និងបុរសម្នាក់ទៀត បានលោតចេញ ហើយរត់គេចខ្លួនតែម្តង ដោយបន្សល់ទុកឈើប្រភេទលេខ១ និងលេខ២ជាច្រើន។
លោក សុផាណា បានមានប្រសាសន៍ថា “ឥឡូវនេះ យើងបានយករថយន្តនិងឈើទាំងនេះទៅរក្សាទុកនៅការិយាល័យខណ្ឌរដ្ឋបាលព្រៃឈើក្នុងក្រុងស្ទឹងត្រែង ហើយយើងកំពុងកសាងសំណុំរឿងដើម្បីបញ្ជូនទៅតុលាការ”។ លោកបានបន្ថែមថា យើងកំពុងគណនាអំពីបរិមាណឈើដែលរឹបអូសនេះ។
លោកបានបន្ថែមថា “អ្នកបើកបរ និងអ្នករួមដំណើរបានគេចខ្លួន ប៉ុន្តែយើងស្គាល់អត្តសញ្ញាណជនទាំងពីរនាក់នេះហើយ។ ពួកគេមកពីខេត្តក្រចេះ”។
លោក សុផាណា បានមានប្រសាសន៍ថា លោកស្គាល់អត្តសញ្ញាណជនទាំងពីរនាក់នេះពីកូនចៅរបស់លោក ប៉ុន្តែថា លោកមិនដឹងថា តើមន្ត្រីទាំងនេះស្គាល់ឈ្មោះជនទាំងនេះដោយវិធីណានោះឡើយ ពីព្រោះពួកគេបានរត់គេចខ្លួនបាត់ទៅហើយ។ លោកបានបដិសេធមិនផ្តល់ព័ត៌មានទាក់ទងសម្រាប់មន្ត្រីទាំងនោះឡើយ។
នាយនគរបាលរូបនេះលើកឡើងថា លោកបានសង្ស័យលោក សំ សារិន នាយរងខណ្ឌរដ្ឋបាលព្រៃឈើថាឡាបរិវ៉ាត់ ថាជាអ្នកដែលជាប់ពាក់ព័ន្ធក្នុងការកាប់ឈើនេះ ពីព្រោះគាត់បានព្យាយាមមកយកឈើទាំងនេះចេញពីប៉ុស្តិ៍ត្រួតពិនិត្យដោយសំអាងថាមានអាជ្ញាប័ណ្ណ។
លោកបានមានប្រសាសន៍ថា ” លោក បូរិន បានមកកន្លែងកើតហេតុ ហើយបានប្រាប់យើងថា គាត់ចង់យកឈើទាំងនេះឲ្យអ្នកដែលជាម្ចាស់ឈើ ហើយមានលិខិតអនុញ្ញាតឲ្យដឹកឈើ ប៉ុន្តែគាត់មិនបានបង្ហាញឯកសារដល់យើងឡើយ”។
លោកបានបន្ថែមថា ” ប្រសិនបើយើងរកឃើញថា លោក បូរិន ជាប់ពាក់ព័ន្ធក្នុងរឿងនេះមែន យើងនឹងចាត់វិធានការតាមច្បាប់”។
បុរសម្នាក់ដែលលើកទូរស័ព្ទដៃរបស់លោក បូរិន ដែលបុគ្គលិកមន្ត្រីរដ្ឋបាលព្រៃឈើបានផ្តល់លេខនេះដល់អ្នកយកព័ត៌មាន បានអះអាងថា មិនមែនជាលោក បូរិន ទេ។
លោក ហ៊ូ សំអុល អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តនេះ ដែលមានវត្តមាននៅប៉ុស្តិ៍ត្រួតពិនិត្យនោះកាលពីថ្ងៃអាទិត្យ បានបញ្ជាក់ថា លោក បូរិន បានព្យាយាមមកយកឈើនេះ ហើយមានទំនាស់ជាមួយនគរបាលនៅពេលពួកគេមិនព្រមអនុញ្ញាតដល់រូបគាត់៕ សារុន