29 C
Phnom Penh

ក្រុមហ៊ុន​ Toll Group លក់​ភាគហ៊ុន​​ផ្លូវ​ដែក​ទាំង​​​អស់​​​ឲ្យ​ទៅ​ក្រុម​ហ៊ុន​ Royal Group

ដោយ ឌឹ ខេមបូឌា ដេលី

បទវិភាគ

ក្រុម​ហ៊ុន​ភ័ស្តុភារ​ Toll Group របស់​​​​​ប្រទេស​​​អូស្ត្រាលី​ បាន​ប្រកាស​កាលពី​ម្សិលមិញ​ថា ខ្លួន​បាន​លក់​ភាគហ៊ុន​​​ទាំង​​​​​៥៥​ភាគរយ​របស់​ខ្លួន​នៅ​ក្នុង​គម្រោង​ផ្លូវ​ដែក​​​​នៅ​​​​កម្ពុជា ឲ្យ​ទៅ​ក្រុម​ហ៊ុន Royal Group ដែល​ជា​ដៃគូ​វិនិយោគ​រួម​គ្នា​​​របស់​​​ខ្លួន​​​​ក្នុង​ចំនួន​ទឹក​ប្រាក់​មិន​បង្ហើប​ឲ្យ​ដឹង ដោយ​លើក​​​ហេតុ​​​ផល​​​ថា មិន​សូវ​​ចំណេញ និងគ្មាន​​​​​ការ​​​​រីក​ចម្រើន​។

នៅ​ក្នុង​សេចក្ដី​ប្រកាស​ព័ត៌មាន​​​មួួយ​ លោក ប្រាយអ៊ែន គ្រូហ្គើ (Brian Kruger) នាយក​គ្រប់​គ្រង​របស់​ក្រុម​ហ៊ុន Toll Group បាន​មាន​ប្រសាសន៍​ថា​ ក្រុម​ហ៊ុន Royal Group របស់​អ្នក​ឧកញ៉ា​ គិត ម៉េង នឹង​គ្រប់​គ្រង​​ជា​ម្ចាស់​ភាគហ៊ុន​១០០​ភាគរយ​លើ​សម្បទាន​ផ្លូវ​ដែក​របស់​ក្រុម​ហ៊ុន​​ Toll Royal Railway បន្ទាប់​ពី​ការ​វិនិយោគ​រួម​គ្នា​នេះមិន​សម​​​បំណង​​​ដូច​ការ​
រំពឹង​ទុក។

លោក​មាន​ប្រសាសន៍​ទៀត​ថា ” ការ​សម្រេច​​ដក​ការ​ចាប់​អារម្មណ៍​របស់​យើង​លើ​សម្បទាន​នេះ​មិន​មែន​ជា​រឿង​តូច​តាច​ទេ ប៉ុន្តែ​វា​ជា​​​ការ​​​សម្រេច​ចិត្ត​​​ច្បាស់​​​លាស់​ បន្ទាប់ពី​​​​ការ​​​វិនិយោគ​​រួម​​​គ្នានេះផ្ដល់​ចំណូល​តិច​ជាង​ការ​រំពឹង​ទុក​ក្នុង​មួយ​រយៈ​ពេល​មក​នេះ”។

លោក​មាន​​​ប្រសាសន៍​​​ទៀត​​​ថា ការ​អាក់​ខាន​​ការ​ស្ដារ​ផ្លូវ​ដែក​ក្រោម​គម្រោង​មួយ​ដែល​មាន​ទំហំ​ទឹក​ប្រាក់​១៤៣​លាន​ដុល្លារ​ដឹកនាំ​ដោយ​ធនាគារ​អភិវឌ្ឍន៍​អាស៊ី បាន​ធ្វើ​ឲ្យ​​​ការ​វិនិយោគ​រួម​គ្នា​នេះ​មិន​ផ្ដល់​ប្រាក់​ចំណេញ​។

លោក​​​បាន​​​លើក​​​ឡើង​​​បន្ត​ថា ” បន្ថែម​​ពី​លើ​នេះ ​ការ​​​មិន​​​រីក​​​ចម្រើន​​​ទៅមុខ​​ និង​ការ​ពន្យារ​ពេល​ការ​ងារ​ស្ដារ​ផ្លូវ​ដែក​ដោយ​ក្រុម​ហ៊ុន​ម៉ៅការពី​​​ខាង​ក្រៅ​ក្នុង​រយៈ​ពេល​២​ឆ្នាំ​មក​នេះ​ដូច​ដែល​យើង​បាន​មើល​ឃើញ​​ស្រាប់​ ក៏​បាន​​ធ្វើ​ឲ្យ​ប្រតិបត្តិការ​​មាន​ប្រសិទ្ធភាព​ជួប​​​ការ​​​លំបាក​​​ផង​ដែរ​ ហើយ​នោះ​គឺ​ការ​ផ្ដល់​​ផល​ចំណេញ​ផ្នែក​សេដ្ឋកិច្ច​សម្រាប់​ក្រុម​ហ៊ុន​ Toll”។

ធនាគារ​ ADB ​​​​បានបា៉ន់​ស្មាន​ថា គម្រោង​ផ្លូវ​ដែក​​ក្នុង​ឆ្នាំ​២០០៦​​​​នេះ​​​នឹង​​​ធ្វើ​ឲ្យ​សេដ្ឋកិច្ច​របស់​កម្ពុជា​ មាន​ការ​ប្រកួត​ប្រជែង​ជាង​មុន​តាម​រយៈ​ការ​សម្រាល​ការ​ដឹក​ជញ្ជូន​ទំនិញ​នៅ​ទូទាំង​ប្រទេស។

នៅ​ក្នុង​ឆ្នាំ​២០០៩​ រដ្ឋាភិបាល​ និង​ក្រុម​ហ៊ុន Toll Royal Railway បាន​ចុះ​កិច្ច​ព្រមព្រៀង​សម្បទាន​មួយ​​មាន​រយៈ​ពេល​៣០​ឆ្នាំ ដែល​ក្នុង​នោះ​​​​ក្រុម​​​ហ៊ុន​​​វិនិយោគ​​​រួម​​​គ្នា​​​​ឯកជន​​​​នេះ​​​ត្រូវ​​​បន្ត​ទទួល​ខុស​ត្រូវ​ចំពោះ​​ប្រតិបត្តិការ​ និង​ការ​ថែទំា​ផ្លូវ​ដែក​។

ប៉ុន្តែ​បច្ចុប្បន្ន​​មាន​តែ​ផ្លូវ​ដែក​​​​មួយ​​​ខ្សែប្រវែង​២៥៦​គីឡូម៉ែត្រ​​​​​​​ប៉ុណ្ណោះ​​​ពី​រាជ​ធានី​ភ្នំពេញ​ឆ្ពោះ​ទៅ​​ខេត្ត​ព្រះសីហនុ ដែល​​កំពុង​​​​ដំណើរ​ការ​ ចំណែក​​​ឯ​​​គម្រោង​​អភិវឌ្ឍ​​​ផ្លូវ​ដែក​ប្រវែង​៣៣៥​គីឡូម៉ែត្រពី​រាជ​ធានី​ភ្នំពេញ​ឆ្ពោះ​ទៅ​ក្រុង​ប៉ោយប៉ែត​ កំពុង​នៅ​គាំងទ្រឹង​ដោយ​សារ​​ខ្វះ​មូលនិធិ​។

ធនាគារ​ ADB បាន​ទទួល​ស្គាល់​នៅ​ក្នុង​របាយការណ៍​មួយ​កាលពី​ដើម​ឆ្នាំ​នេះ​​​ថា ការ​​​​​​ធ្វើ​ផែន​ការ​​​ខ្វះការ​ប្រុង​ប្រយ័ត្ន​​ និង​​​ការ​​អនុវត្ត​​គម្រោង​នេះ​​​មិន​​​បាន​​​ល្អ បាន​បណ្ដាល​ឲ្យ​ប្រជា​ពលរដ្ឋ​រាប់​ពាន់​គ្រួសារ​ដែល​ត្រូវ​បោះ​បង់​ដី​ធ្លី​របស់​ខ្លួន​​ដើម្បី​​បើក​ផ្លូវ​សម្រាប់​​​គម្រោង​ផ្លូវ​ដែក​នេះ មាន​ជីវភាព​​​​កាន់​​​តែ​​​យ៉ាប់​យឺន​ជាង​​មុន​ពេល​គម្រោង​​​នេះ​​​​ចាប់​ផ្ដើម​ទៅ​ទៀត​។

ពេល​ទាក់​ទង​កាលពី​ម្សិលមិញ លោក ចន ហ្គាយរី (John Guiry)​ ប្រធាន​ផ្នែក​​​ប្រតិបត្តិ​​​ការ​នៅ​ក្រុម​ហ៊ុន Toll Roya Railway បាន​មាន​ប្រសាសន៍​ថា ផ្លូវ​ដែក​នេះ​នឹង​បន្ត​ធ្វើ​ប្រតិ​​​បត្តិ​​​ការ​ធម្មតា ទោះបី​ជា​ក្រុមហ៊ុន​ Toll Group លែង​មាន​ភាគហ៊ុន​នៅ​ក្នុង​ការ​វិនិយោគ​រួម​គ្នា​នេះ​ក្ដី។

លោក​មាន​ប្រសាសន៍​ថា ” នឹង​​​មិន​​​​​ខុស​គ្នា​អ្វីទាំង​​​អស់ អាជីវកម្ម​នៅ​​​តែ​​​ដំណើរ​​​ការ​​​ធម្មតា​។ ក្រុម​ហ៊ុន Toll នឹង​ផ្ដល់​យោបល់​ និង​ការ​តម្រង់​ទិស​ដល់​ក្រុម​ហ៊ុន Royal Group ​ដោយ​ផ្ដល់​[ជំនាញ​] ភ័ស្តុភារ​ និង​សម្ភារ​ឃ្លាំង​”។

លោក​បាន​មាន​ប្រសាសន៍​ទៀត​ថា ចំណាត់​ការ​របស់​ក្រុម​ហ៊ុន​ Toll Group ធ្វើ​ឡើង​ស្រប​​​ពេល​​​​ក្រុម​ហ៊ុន​នេះពិនិត្យ​ផ្ទៀង​ផ្ទាត់​ និង​​​​ដក​​​​គម្រោង​វិនិយោគ​ដែល​មិន​សូវ​ផ្ដល់​ផល​​ចំណេញ​របស់​ខ្លួន​​​ចេញ​​​​។ លោក​​​​​បាន​​​បន្ត​​​ថា ” និយាយ​ដោយ​ស្មោះ​ត្រង់ទៅ​ ខ្ញុំ​គិត​ថា ក្រុម​ហ៊ុន Toll ចង់​ដក​ខ្លួន​ចេញពី​វា​​​​។ ហើយ​ពួកគេ​កំពុង​សម្លឹង​មើល​មក​យើង ហើយ​និយាយ​ថា វា​នឹង​មិន​សម្រេច​បាន​ដូច​អ្វី​ដែល​យើង​គិត​ទេ ដូច្នេះ​ហេតុអ្វី​យើង​ត្រូវ​ការ​វា?”។

លោក ម៉ាក ហានណា (Mark Hanna) ប្រធាន​ផ្នែក​ហិរញ្ញវត្ថុ​​នៅ​ក្រុម​ Royal Group មិន​អាច​ទាក់​ទង​​​​សុំ​​​ការ​​​បំភ្លឺ​​​បាន​ទេ​កាលពី​ម្សិលមិញ​៕ សុខុម​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស