27 C
Phnom Penh

អង្គការ​​​ឃ្លាំ​​​មើល​​​សិទ្ធិ​​​មនុស្ស​​​​​​ចង់ឲ្យ​​​រដ្ឋាភិបាល​​​លើក​​​លែង​​​ការ​​​ចោទ​​​ប្រកាន់​​​ លើ​​​ក្រុម​​​សកម្មជន​​​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​ អង្គការ​ឃ្លាំ​មើល​សិទ្ធិ​មនុស្ស​បាន​​​ជំរុញ​ឲ្យ​រដ្ឋាភិបាល​លើក​លែង​​​ការ​​​ចោទប្រកាន់​​​ពី​​​ការ​​​ធ្វើ​កុបកម្ម​​លើ​សកម្មជន​គណបក្ស​ប្រឆាំង​មួយ​ក្រុម ដែល​គ្រោង​បន្ត​​​បើក​​សវនាការ​ជំនុំជម្រះ​នៅ​ថ្ងៃ​ព្រហស្បតិ៍ ពី​​​បទ​ជាប់​ពាក់​ព័ន្ធ​ក្នុង​ការ​តវ៉ា​ប្រឆាំង​នឹង​ការ​បិទ​ទីលាន​ប្រជា​ធិប​​​តេយ្យ​ក្នុង​រាជ​ធានី​ភ្នំពេញ ដែល​បាន​​​ប្រែ​ក្លាយ​ជា​ហិង្សា​។

សកម្មជន​ទាំង​នោះ​ត្រូវ​បាន​សាលា​ដំបូង​រាជ​ធានី​ភ្នំពេញ ធ្វើ​ការ​ចោទ​ប្រកាន់​ពី​​​បទ​​ដឹក​នាំ​ ឬ​ចូល​រួម​ក្នុង​កុបកម្ម បន្ទាប់ពី​ការ​តវ៉ា​កាលពី​ថ្ងៃ​ទី​១៥ ខែ​កក្កដា នៅ​ទីលាន​ប្រជាធិបតេយ្យ​ ដែល​ក្នុង​នោះ​យ៉ាង​ហោច​ណាស់​សន្តិសុខ​ខណ្ឌ​ដូន​ពេញ​ពីរ​នាក់​ត្រូវ​​​បាន​​​វាយ​​​ដំ​​​ធ្ងន់​​​ធ្ងរ​។

យោង​តាម​ព័ត៌មាន​​​​​​​មួយ​​​ចំនួន​​​ និង​រូប​ភាព​វីដេអូ​នៅ​កន្លែង​កើត​ហេតុ ហើយ​បាន​ដាក់​បង្ហោះ​តាម​ប្រព័ន្ធ​អុីន​​​ធើ​​​ណិត​បាន​​ឲ្យ​ដឹង​ថា ក្រុម​អ្នក​តវ៉ា​បាន​​​ធ្វើការ​​​តប​​​ត​បន្ទាប់ពី​ក្រុម​សន្តិសុខ​បាន​ព្យាយាម​​បំបែក​ការ​ជួប​ជុំ​គ្នា​ដោយ​ប្រើ​កម្លាំង​តែប៉ុណ្ណោះ។

នៅ​ក្នុង​សេចក្ដី​ថ្លែង​ការណ៍​របស់​ខ្លួន​ លោក​ Phelim Kine​ ​នាយករង​ប្រចាំ​តំបន់​អាស៊ី​របស់​អង្គការ​ឃ្លាំ​មើល​សិទ្ធិ​មនុស្ស​បាន​ហៅ​ការ​ចោទ​ប្រកាន់​ពី​ការ​ធ្វើ​កុបកម្ម​នេះ​ថា គ្មាន​មូលដ្ឋាន។

អង្គការ​សិទ្ធិ​មនុស្ស​ដែល​មាន​មូលដ្ឋាន​នៅ​សហរដ្ឋអាមេរិក​បាន​លើក​ឡើង​ថា ក្រុម​សន្តិ​​​សុខ​​​ត្រូវ​​​បាន​​​បញ្ជា​​​ឲ្យ​​​ធ្វើការ​​​ឆ្លើយ​​​តប​​​ដ៏​​​ហិង្សា​​​​​ពី​​​សំណាក់​​​ក្រុម​​​អ្នក​​​តវ៉ា​​​ជា​លេស​​ដើម្បី​ធ្វើ​ការ​ចាប់​ខ្លួន​។

សេចក្ដី​ថ្លែង​ការណ៍​ដដែល​នេះ​បន្ត​ថា “ប្រទេស​ផ្ដល់​ជំនួយ​ដល់​ប្រទេស​កម្ពុជា​ត្រូវ​​​ប្រាប់​រដ្ឋា​​​ភិ​​​បាល​​ថា ការ​ប្រើ​ប្រាស់​កម្លាំង​សន្តិសុខ​ និង​ប្រព័ន្ធ​តុលាការ​​​ក្នុង​​​ការ​​​ធ្វើឲ្យ​​​​ប៉ះពាល់​ដល់​គណបក្ស​ប្រឆាំងនោះ​ មិន​អាច​ទទួល​យក​បាន​​ទេ​”។

អង្គការ​ឃ្លាំ​មើល​សិទ្ធិ​មនុស្ស​បាន​លើក​ឡើង​ពី​ចំនួន​​​សកម្មជន ដែល​គ្រោង​នឹង​ចូល​រួម​សវនាការ​ជំនុំ​​​ជម្រះ​នៅ​ថ្ងៃ​ព្រហស្បតិ៍​​ថា មាន​ចំនួន​១១នាក់​។

ប៉ុន្តែ​​​​លោក កែវ សុជាតិ ព្រះ​​​រាជ​​​អាជ្ញា​​​រង​អម​សាលា​ដំបូង​រាជធានី​ដែល​ទទួល​បន្ទុក​រឿង​ក្ដី​នេះ​បាន​បដិសេធ​មិន​ផ្ដល់​តួលេខ​ជាក់​លាក់​ឡើយ​។

លោក ចាន់ ចេន មេធាវី​តំណាង​សកម្មជន​ម្នាក់​ក្នុង​ចំណោម​សកម្មជន​ទាំង​នោះ​បាន​មាន​ប្រសា​​​សន៍​ថា លោក​មិន​ដឹង​ពី​ទំហំ​​​ពិត​ប្រាកដ​នៃ​ក្រុម​នេះ​ទេ ប៉ុន្តែ​លោក​បាន​បន្ថែម​ថា បច្ចុប្បន្ន​នេះ​ ចុង​ចោទ​បួន​នាក់​ក្នុង​ចំណោម​ចុង​ចោទ​ទាំង​នោះ​ស្ថិត​​​ក្នុង​​​ការ​​​ឃុំខ្លួន​បណ្ដោះ​អាសន្ន៕ សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស