28 C
Phnom Penh

ការ​សិក្សា​អំពី​ប្រភព​ដែល​នាំ​ឲ្យ​មាន​ការ​ឆ្លង​រាល​ដាល​នៃ​មេរោគ​អេដស៍​

ដោយ ឌឹ ខេមបូឌា ដេលី

បទវិភាគ

មន្ត្រី​មួយ​រូប​បាន​ឲ្យ​ដឹង​ថា ក្រុម​ការ​ងារ​ដឹក​នាំ​ដោយ​រដ្ឋាភិបាល​​ ដែល​មាន​ភារកិច្ច​ត្រូវ​កំណត់​ពី​ប្រភព​​ដែល​ធ្វើ​ឲ្យ​មាន​ការ​ឆ្លង​រាល​ដាល​នៃ​មេរោគ​អេដស៍​នៅ​ក្នុង​ឃុំ​រកា ខេត្ត​បាត់​ដំបង បាន​ចាប់​ផ្ដើម​ការ​ស្ទង់​មតិ​របស់​ខ្លួន​កាលពី​ម្សិលមិញ ក្នុង​គោល​បំណង​កំណត់​ថា តើ​មេរោគ​អេដស៍​នេះ​ឆ្លង​រាល​ដាល​តាម​របៀប​ណា។

ពលរដ្ឋ​ជាង​១០០​នាក់​ ដែល​រួម​​មាន​ដូចជា ​ក្មេងៗ អ្នកភូមិ​វ័យ​ចំណាស់ៗ និង​ព្រះសង្ឃ​ចំនួន​ពីរ​អង្គ​​ត្រូវ​បាន​ធ្វើ​តេស្ត​ឈាម​នៅ​មណ្ឌល​សុខភាព​ឃុំ​ក្នុង​ស្រុក​សង្កែ កាលពី​ថ្ងៃ​ព្រហស្បតិ៍ ​ដោយ​រក​ឃើញ​ថា មាន​ឆ្លង​មេរោគអេដស៍។ ហើយ​មនុស្ស​យ៉ាង​តិច​ចំនួន​៩០​នាក់​ត្រូវ​បាន​បញ្ជាក់​ថា បាន​ឆ្លង​មេរោគអេដស៍​បន្ទាប់ពី​ត្រូវ​បាន​ធ្វើ​តេស្ត​ឈាម​ជាលើក​ទី៣​កាលពី​ថ្ងៃ​សុក្រ នៅ​វិទ្យាស្ថាន​បា៉ស្ទ័រក្នុង​រាជ​ធានី​ភ្នំពេញ។ មន្ត្រី​សុខាភិបាល​​ដែល​គេ​ទាក់​ទង​នៅ​ក្នុង​សប្ដាហ៍​នេះ បាន​បដិសេធ​មិន​ប្រាប់ពី​​តួលេខ​ថ្មីៗ​ឡើយ​។

កាលពី​ថ្ងៃ​ច័ន្ទ សាលា​ដំបូង​ខេត្ត​បាត់​ដំបងបាន​ចោទ​ប្រកាន់​លោក យ៉ែម ជ្រិន គ្រូពេទ្យ​គ្មាន​អាជ្ញាប័ណ្ណ​ប្រចាំ​ភូមិ​​ ដែល​អ្នក​ភូមិ​បាន​បន្ទោស​ថា ជា​អ្នក​​ធ្វើ​ឲ្យ​​មេរោគ​អេដស៍​ឆ្លង​រាល​ដាល​នោះ​​​​ពីបទ​មនុស្ស​ឃាត​ អម​ដោយ​ទារុណកម្ម អំពើ​ព្រៃផ្សៃ​ ឬចាប់​រំលោភ​។ លោក យ៉ែម ជ្រិន កំពុង​ត្រូវ​បាន​ឃុំ​ខ្លួន​នៅ​ពន្ធនាគារ​ខេត្ត​នៅ​ឡើយ​។

កាលពី​ម្សិលមិញ លោក ម៉ាសាមិ ហ្វូជីតាក់ (Masami Fujita) ប្រធាន​ក្រុម​ការ​ងារ​ទទួល​បន្ទុក​មេរោគ​អេដស៍​នៅ​អង្គការ​សុខភាព​ពិភព​លោក​ប្រចាំ​ប្រទេស​កម្ពុជា​​ ដែល​កំពុង​ជួយ​រដ្ឋាភិបាល​នៅ​ក្នុង​ការ​ស៊ើបអង្កេត​របស់​ខ្លួន​លើ​ការ​ឆ្លង​រាល​ដាល​នៃ​មេរោគ​អេដស៍​នេះ​ បាន​លើក​ឡើង​ថា ការ​ស្ទង់​មតិ​​លើ​កត្តា​ដែល​អាច​​​​ធ្វើ​ឲ្យ​មេរោគ​អេដស៍​ឆ្លង​រាល​ដាល​ ​កំពុង​មាន​ដំណើរ​ការ​ហើយ​។

លោក​ ហ្វូជីតាក់ បានមាន​ប្រសាសន៍​ថា ” ការ​ប្រមូល​ទិន្នន័យ​បានចាប់​ផ្ដើម​នៅ​ថ្ងៃ​នេះ​ យើង​សង្ឃឹម​ថា ​នឹង​អាច​បញ្ចប់​ការ​សិក្សា​នេះ​នៅ​ពីរ​បី​ថ្ងៃ​ខាង​មុខ​នេះ​។ យើង​កំពុង​តែ​សិក្សា​ស្វែង​រក​គ្រប់​កត្តា​ហានិភ័យ​អាច​ទៅ​រួច​ទាំងអស់​​​​ដែល​ធ្វើ​ឲ្យ​មាន​ការ​ឆ្លង​​រាល​ដាល​នៃ​មេរោគ​អេដស៍​​នៅ​ទីនេះ​”។ លោក​បាន​បន្ថែម​ថា ការ​ស្ទង់​មតិ​គឺ​ផ្ដោត​លើ​​​កត្តា​ចំនួន​បី ដែល​មេរោគ​អេដស៍​​អាច​ឆ្លង​ពី​មនុស្ស​ម្នាក់​ទៅ​មនុស្ស​ម្នាក់ ដូច​ជា ការ​រួម​ភេទ តាម​រយៈ​ឈាម និង​ពីម្ដាយ​ទៅ​កូន​។

លោក ហ្វូជីតាក់ បាន​លើក​ឡើង​ទៀត​ថា ដោយ​ផ្អែក​លើ​លទ្ធផល​នៃ​ការ​ស្ទង់មតិ​ ក្រុម​ការ​ងារ​ដែល​កំពុង​ស៊ើបអង្កេត​​​​លើ​ការ​ឆ្លង​រាល​ដាល​នៃ​មេរោគ​អេដស៍​នេះ និង​ដែល​ដឹកនាំ​ដោយមជ្ឈមណ្ឌល​​​ជាតិ​​​ប្រយុទ្ធ​​​នឹង​​​ជំងឺអេដស៍ សើស្បែក និង​​​កាម​​​រោគ ហើយ​មាន​ការ​ចូល​រួម​ពី​មជ្ឈមណ្ឌល​​គ្រប់​គ្រង​ និង​ទប់ស្កាត់​ជំងឺ​ឆ្លង​របស់​សហរដ្ឋអាមេរិក UNAIDS និង Unicef នោះ​​ ប្រហែល​ជា​ត្រូវ​​ធ្វើ​ការ​សិក្សា​តាម​ដាន​មួយ។

លោក​បាន​មាន​ប្រសាសន៍​ថា “ដោយ​ផ្អែក​លើ​លទ្ធផល​ យើង​​​អាច​​ឈាន​ដល់​ការ​សន្និដ្ឋាន​មួយ​ ឬ​​​អាច​​ឈាន​ទៅ​រក​ការ​សម្រួច​សំណួរ​សម្រាប់​ការ​ស្ទង់​មតិ​មួយ​ផ្សេងទៀត”។

ចាប់​តាំង​ពី​ការ​ធ្វើ​តេស្ត​ឈាម​រក​មេរោគ​អេដស៍​ជា​លើក​ដំបូង​បាន​ចាប់​ផ្ដើម​កាលពី​ថ្ងៃ​ទី៨ ខែ​ធ្នូ​មក អ្នក​ភូមិ​នៅ​ឃុំរកា​ត្រូវ​បាន​គេ​ប្រាប់​ថា ពួកគាត់​ត្រូវ​ទៅ​មន្ទីរ​ពេទ្យ​បង្អែក​ខេត្ត​ដើម្បី​បើក​ថ្នាំ​ពន្យារ​ជីវិត​។

លោក អ៊ុំ សុភាព ​នាយកប្រតិបត្តិ​អង្គការ Khana ដែល​ឧបត្ថម្ភ​គាំទ្រ​អង្គការ​ព្រះពុទ្ធ​សាសនា​ដើម្បី​ការ​អភិវឌ្ឍន៍​ និង​ដែល​ជា​អង្គការ​មិន​មែន​​រដ្ឋាភិបាល​ធំបំផុត​នៅ​ក្នុង​ប្រទេស​កម្ពុជា​ ​ធ្វើ​ការ​ផ្នែក​ប្រយុទ្ធ​ប្រឆាំង​ជំងឺ​អេដស៍​បាន​ឲ្យ​ដឹង​ថា អង្គការ​ព្រះពុទ្ធសាសនា​ដើម្បី​ការ​អភិវឌ្ឍន៍ ជា​អង្គការ​មិន​មែរ​រដ្ឋាភិបាល​​ក្នុង​ស្រុក​បាន​ចេញ​ថ្លៃ​ធ្វើ​ដំណើរ​ទៅ​កាន់​មន្ទីរ​ពេទ្យ​បង្អែក​ខេត្ត​ឲ្យ​អ្នកភូមិ​ដែល​ឆ្លង​មេរោគអេដស៍។ ប៉ុន្តែ​មូលនិធិ​របស់​អង្គការ​នេះ​នឹង​អស់​នៅ​ដំណាច់​ខែ​នេះ​។

លោក សុភាព បាន​មាន​ប្រសាសន៍ទាក់​ទិន​នឹង​អ្នក​ផ្ដល់​ហិរញ្ញវត្ថុ​ថា “​តាម​លក្ខណៈ​​បច្ចេកទេស ​​ពួកគេ​នឹង​បញ្ចប់​ការ​ផ្ដល់​​មូលនិធិ​​នៅ​ក្នុង​ខែ​ធ្នូ​នេះ​។ ប៉ុន្តែ​សម្រាប់​អង្គការ​ព្រះពុទ្ធសាសនា​ដើម្បី​ការ​អភិវឌ្ឍន៍ យើង​នឹង​ព្យាយាម​ជួយ​ ហេតុដូច្នេះ​វា​នឹង​គ្មាន​បញ្ហា​ផ្នែក​ហិរញ្ញវត្ថុ​ឡើយ​។

លោកវេជ្ជបណ្ឌិត ហ្វូជីតាក់ បាន​លើក​ឡើង​ទៀត​ថា ជម្រើស​មួយ​ផ្សេង​ទៀត​នោះ​ គឺនឹង​មាន​ការ​បង្កើត​​កន្លែង​ផ្ដល់​​ថ្នាំ​ពន្យារ​ជីវិត​នៅ​ឃុំរកា​តែម្ដង។ លោក​បាន​មាន​ប្រសាសន៍​ថា ” មាន​ជម្រើស​​មួយ​ផ្សេងទៀត​ដែល​អាជ្ញាធរ​មូលដ្ឋាន​កំពុង​គិត​។ ប៉ុន្តែ​​កន្លែង​នេះ​តម្រូវ​ឲ្យ​មាន​​មន្ទីរ​ពិសោធន៍[មួយ] និង​អ្នក​ជំនាញ​ដែល​មាន​បទពិសោធន៍​ និង​ក្រុម​ជួយ​​គាំទ្រ​ ហើយ​កត្តា​ផ្សេងៗ​ត្រូវ​តែ​យក​មក​ពិចារណា”៕ ស៊ុយឈាង​​ (រាយការណ៍​បន្ថែម​ដោយ Alex Consiglio)​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស