យោងតាមលោក កែវ ធា ប្រធានការិយាល័យប្រឆាំងការជួញដូរមនុស្ស និងការពារអនីតិជនបានឲ្យដឹងថា ជនជាតិចិនបីនាក់និងខ្មែរពីរនាក់ត្រូវបានចាប់ខ្លួនក្នុងក្រុងភ្នំពេញកាលពីថ្ងៃអង្គារ ពីបទប៉ុនប៉ងបញ្ជូនក្មេងស្រីបួននាក់ទៅប្រទេសចិន កាត់តាមប្រទេសថៃ ដោយប្រើឯកសារធ្វើដំណើរក្លែងក្លាយ។
លោក កែវ ធា បានឲ្យដឹងថា ក្រុមនេះមានគម្រោងនាំស្ត្រីទាំងនោះទៅក្រុងប៉ោយប៉ែត កន្លែងដែលពួកគេនឹងជួបឈ្មួញកណ្តាលដែលនឹងដឹកពួកគេទៅក្រុងបាងកក ហើយឲ្យពួកគេជិះយន្តហោះទៅប្រទេសចិន។
លោកបាននិយាយទៀតថា “យើងបានចាប់មនុស្សប្រាំនាក់ពេលកំពុងប្រព្រឹត្តបទល្មើសមានកាន់លិខិតឆ្លងដែនចំនួនប្រាំមួយ និងជួលរថយន្តមួយគ្រឿងតម្លៃ៩០ដុល្លារ ដើម្បីដឹកស្ត្រីបួននាក់ធ្វើដំណើរទៅក្រុងប៉ោយប៉ែត”។ លោកគិតថា ជនសង្ស័យទំនងមានផែនការប្រើផ្លូវពង្វាងទៅប្រទេសចិន ដោយសារមានការចាប់ខ្លួនស្រដៀងគ្នាជាបន្តបន្ទាប់នៅអាកាសយានដ្ឋានអន្តរជាតិភ្នំពេញនៅពេលថ្មីៗនេះ។
លោកបានឲ្យដឹងថា “យើងដកហូតបានលិខិតឆ្លងដែនចំនួនប្រាំមួយមានទិដ្ឋាការចិន ទាំងលិខិតឆ្លងដែន ទាំងទិដ្ឋាការ គឺសុទ្ធតែក្លែងក្លាយទំាងអស់។ យើងបានចោទពួកគេពីបទប៉ុនប៉ងជួញដូរឆ្លងដែន និងផ្តល់ឯកសារក្លែងក្លាយ”។
លោក កែវ ធា បាននិយាយថា ប៉ូលិសកំពុងសាកសួរជនសង្ស័យនៅឡើយកាលពីយប់មិញ បន្ទាប់ពីការចាប់ខ្លួនពួកគេនៅពេលថ្ងៃត្រង់។
របាយការណ៍ប៉ូលិសឲ្យដឹងថា មនុស្សប្រាំពីរនាក់ មានក្មេងស្រីបួននាក់ អ្នកបើកតាក់ស៊ីម្នាក់ ម៉ូតូឌុបម្នាក់ និងកម្មកររោងចក្រម្នាក់ ត្រូវបាននគរបាលសាកសួរ ហើយដោះលែងវិញ។
ជនសង្ស័យប្រាំនាក់ជាជនជាតិចិនមានឈ្មោះ Xie Teo Sheng អាយុ៥០ឆ្នាំ Hu De Hua អាយុ៣៥ឆ្នាំនិង Zhou Yanping អាយុ៤១ឆ្នាំ ហើយនិងជនជាតិខ្មែរឈ្មោះ លីវ ហ៊ន អាយុ៥៣ឆ្នាំ និង វង់ យីតា អាយុ៤៨ឆ្នាំ។
របាយការណ៍ឲ្យដឹងថា “ឥឡូវនេះ ការិយាល័យ[ប្រឆាំងការជួញដូរមនុស្ស]កំពុងសាកសួរពួកគេនិងកសាងសំណុំរឿងដើម្បីប្តឹងទៅតុលាការក្រុងភ្នំពេញ។ ក្មេងស្រីបួននាក់ត្រូវបានគេអប់រំ និងបញ្ជូនទៅស្រុកកំណើតរបស់ពួកគេវិញ”។
ទាំងប្រទេសកម្ពុជា ទាំងប្រទេសចិន បានកត់សម្គាល់ឃើញកំណើនអត្រាធ្វើដំណើររបស់ស្ត្រីខ្មែរទៅប្រទេសចិន ហើយពួកគេទទួលរងគ្រោះ ឬត្រូវគេធ្វើបាប។
អង្គការសិទ្ធិមនុស្សអាដហុក កាលពីថ្ងៃអង្គារបានចេញសេចក្តីថ្លែងការណ៍មួយឲ្យដឹងថា ស្ត្រីខ្មែរម្នាក់ទៀតនឹងត្រូវគេបញ្ជូនពីប្រទេសចិនមកប្រទេសខ្មែរវិញនៅថ្ងៃព្រហស្បតិ៍ បន្ទាប់ពីស្វែងរកជំនួយពីខាងក្រៅ៕មានិត