ន្ត្រីអន្តោប្រវេសន៍ម្នាក់បាននិយាយថា សាសនទូតអាមេរិកម្នាក់ ដែលត្រូវបានផ្តន្ទាទោសឲ្យជាប់ពន្ធនាគាររយៈពេលមួយឆ្នាំកាលពីខែមិថុនា ពីបទរំលោភផ្លូវភេទកុមារប្រាំនាក់នៅមណ្ឌលកុមារកំព្រាដែលលោកគ្រប់គ្រងក្នុងក្រុងភ្នំពេញ ត្រូវបាននិរទេសទៅអាមេរិកកាលពីព្រឹកថ្ងៃអង្គារ។
លោក អ៊ុក ហៃសិលា ប្រធាននាយកដ្ឋានផ្នែកស៊ើបអង្កេតនៅនាយកដ្ឋានអន្តោប្រវេសន៍ក្រសួងមហាផ្ទៃបានមានប្រសាសន៍ថា នាយកដ្ឋានរបស់លោកបានប្រគល់លោក ដាញ៉ែល ចនសុន (Daniel Johnson) អាយុ៣៦ឆ្នាំទៅការិយាល័យអនុព័ន្ធអេហ្វប៊ីអាយក្នុងក្រុងភ្នំពេញ តាមសំណើស្ថានទូតអាមេរិក។
លោក ហៃសិលា បាននិយាយថា លោក ចនសុន ដែលបានរស់នៅក្នុងប្រទេសកម្ពុជារយៈពេលជាងមួយទសវត្សរ៍ នឹងមិនត្រូវអនុញ្ញាតឲ្យវិលមកប្រទេសកម្ពុជាវិញទេ។ លោកបាននិយាយថា “ពេលណាយើងបណ្តេញនរណាម្នាក់ អ្នកនោះមិនអាចវិលត្រឡប់មកវិញទេ”។
ការចាប់ខ្លួនលោក ចនសុន នៅឆ្នាំ២០១៣ ជាលទ្ធផលនៃការស៊ើបអង្កេតដែលធ្វើឡើងរួមគ្នាដោយអេហ្វប៊ីអាយនិងប៉ូលិសប្រឆាំងការជួញដូរមនុស្សក្រសួងមហាផ្ទៃ។ នៅពេលនោះ លោក ប៉ុល ភិធេយ្យ ប្រធាននាយកដ្ឋានប្រឆាំងការជួញដូរមនុស្សបាននិយាយថា អេហ្វប៊ីអាយ បានស៊ើបអង្កេតជនជាតិអាមេរិករូបនេះពាក់ព័ន្ធនឹងការចោទប្រកាន់នឹងការរំលោភកុមារនៅអាមេរិក។
អ្នកនាំពាក្យស្ថានទូតអាមេរិក លោក ចេ រ៉ាម៉ាន បានបដិសេធមិនធ្វើអត្ថាធិប្បាយទេកាលពីថ្ងៃអង្គារ។
យោងតាមអត្ថបទឆ្នាំ២០០៣ក្នុងកាសែត Yamhill Valley News-Register បានឲ្យដឹងថា កាលពីឆ្នាំ២០០០និង២០០១ ការិយាល័យមេធាវីសង្កាត់ លីនខុន រដ្ឋអូរេហ្គិន បានចោទលោក ចនសុន ប្រាំមួយករណីទាក់ទិននឹងការរំលោភ និងការរួមភេទនឹងប្រុសគ្នាឯងប្រព្រឹត្តលើក្មេងបីនាក់ក្រោមការមើលថែទាំរបស់គាត់។
អត្ថបទកាសែតបានឲ្យដឹងថា យោងតាមមេធាវីរងនៅ លីនខុន លោក អ៊ើល វ៉ូដស៍ បានឲ្យដឹងថា ការចោទប្រកាន់នោះក្រោយមកត្រូវបានទម្លាក់ចោលវិញ ពីព្រោះក្រុមមន្ត្រីស៊ើបអង្កេតមិនជឿការផ្តល់សក្ខីកម្មពីក្មេងប្រុស ដែលបានទទួលស្គាល់ការកុហកអំពីការរំលោភដែលប្រព្រឹត្តដោយម្តាយបង្កើតរបស់ខ្លួន។ ម្តាយបង្កើតរបស់ពួកគេត្រូវបានកាត់ទោសឲ្យជាប់ពន្ធនាគារ១១៦ឆ្នាំ តែបន្ទាប់មក បានរួចទោស នៅពេលដែលក្មេងប្រុសទាំងនោះបានឲ្យដឹងថា ការនិយាយកន្លងមកមិនពិតនោះទេ។
បន្ទាប់ពីការចាប់លោក ចនសុន នៅប្រទេសកម្ពុជា ការស៊ើបអង្កេតមួយដោយឡែកដោយអង្គការសកម្មភាពដើម្បីកុមារ (NGO Action Pour Les Enfants, APLE) ជាអង្គការប្រឆាំងសកម្មភាពរួមភេទជាមួយកុមារ បានបញ្ចេញការអះអាងអំពីការរំលោភជាច្រើនដែលប្រព្រឹត្តដោយលោក ចនសុន នៅមណ្ឌលកុមារកំព្រា ផ្ទះក្តីសង្ឃឹម ក្នុងសង្កាត់បឹងទំពុន ខណ្ឌមានជ័យ ដែលចិញ្ចឹមថែក្មេងនិងក្មេងជំទង់យ៉ាងហោចណាស់៣០នាក់៕មានិត