31 C
Phnom Penh

ឃាតករ​សម្លាប់​ស្ត្រី​ជនជាតិ​ហូឡង់ និង​កូនស្រី​​​​ ត្រូវ​បាន​ផ្ដន្ទាទោស​ឲ្យ​ជាប់​ពន្ធនាគារ​រយៈពេល​១៣​ឆ្នាំ​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ សាលា​ដំបូង​រាជ​ធានី​​ភ្នំពេញ​បាន​ផ្ដន្ទាទោស​​បុរស​អនាថា​អាយុ​៣៥​ឆ្នាំ​ម្នាក់ ឲ្យ​ជាប់​​ពន្ធនាគារ​រយៈ​ពេល​១៣​ឆ្នាំ ពីបទ​មនុស្ស​ឃាត​កាលពី​ខែ​មេសា លើ​ស្ត្រី​ជនជាតិ​ហូឡង់​ម្នាក់ និង​កូនស្រី​អាយុ​១៩​ខែ​​របស់​គាត់​នៅ​ក្នុង​ផ្ទះ​មួយ​​ក្នុង​ខណ្ឌ​ចំការ​មន។

ជា ភិន ដើរចេញពីតុលាការ​ក្រុងភ្នំពេញ បន្ទាប់ពីសាលា​ដំបូង​រាជ​ធានី​​ភ្នំពេញ​​ផ្ដន្ទាទោស​​ឲ្យ​ជាប់​​ពន្ធនាគារ​រយៈ​ពេល​១៣​ឆ្នាំ ពីបទ​មនុស្ស​ឃាត​កាលពីម្សិលមិញ។ ស៊ីវ ចាន់ណា
ជា ភិន ដើរចេញពីតុលាការ​ក្រុងភ្នំពេញ បន្ទាប់ពីសាលា​ដំបូង​រាជ​ធានី​​ភ្នំពេញ​​ផ្ដន្ទាទោស​​ឲ្យ​ជាប់​​ពន្ធនាគារ​រយៈ​ពេល​១៣​ឆ្នាំ ពីបទ​មនុស្ស​ឃាត​កាលពីម្សិលមិញ។ ស៊ីវ ចាន់ណា

ជា ភិន ជនសង្ស័យតែ​មួយ​គត់​នៅ​ក្នុង​ករណី​ធ្វើ​ឃាត​លោកស្រី Daphna Beerdsen ​និង​កូនស្រី​របស់​គាត់​ឈ្មោះ Dana បាន​និយាយ​អំឡុង​ការ​បើក​សវនាការ​កាលពី​ថ្ងៃ​ទី​២ ខែ​ធ្នូ​ថា បន្ទាប់ពី​ផឹក​ស្រា​ស​អស់​កន្លះ​លីត្រ​ ខ្លួន​បាន​លួច​ចូល​ទៅ​ក្នុង​ផ្ទះ​របស់​ស្ត្រី​រងគ្រោះ​ក្នុង​សង្កាត់​ទន្លេបាសាក់ ដើម្បី​លួច​កង់​មួយ​គ្រឿង​។

ជា ភិន បាន​​រៀបរាប់​ថា នៅ​ពេល​លោកស្រី​ Daphna Beerdsen អាយុ​៣១​ឆ្នាំ បានឃើញ​ខ្លួន​​​ក៏​ហៅ​គេ​ឯង​ឲ្យ​​ជួយ​ ហើយ​​បាន​យក​ដង​ជូត​ឥដ្ឋ​មក​វាយ​ខ្លួន​។

ជា ភិន បាន​និយាយ​អំឡុង​ពេល​បើក​សវនាការ​ថា “បន្ទាប់​មក​យើង​បាន​ប្រ​វាយ​ប្រតប់​​គ្នា ហើយ​ខ្ញុំ​បាន​យក​តួណឺវីស​​ចាក់​គាត់​ជា​ច្រើនដង​”។ ជន​នេះ​បាន​បន្ថែម​ថា ខ្លួន​បាន​បិទ​ភ្នែក​ ខណៈ​ពេល​ចាក់​​លោកស្រី Daphna Beerdsen ហើយ​មិន​ដឹង​ថា បាន​ធ្វើ​ឲ្យ​កូនស្រី​របស់​​គាត់​រង​របួស​ដល់​ថ្នាក់​​ស្លាប់​​ទេ​។​ បន្ទាប់​មក​ជននេះ​បាន​លួច​កុំព្យូទ័រ​យូ​ដៃ​ម៉ាក​ Apple មួយ​គ្រឿង ទូរស័ព្ទ​ដៃ​មួយ​គ្រឿង និង​ប្រាក់​ប្រហែល​៥០​ដុល្លារ រួម​ទាំង​កង់​មួយ​គ្រឿង​ផង​ដែរ​។

លោកស្រី Daphna Beerdsen ត្រូវ​បាន​រក​ឃើញ​ថា ស្លាប់​នៅ​ថ្ងៃ​ទី​២៨ ខែ​មេសា ដោយ​មាន​ស្នាម​​ចាក់​​ប្រាំមួយ​កន្លែង។ កូនស្រី​របស់​គាត់​ត្រូវ​បាន​រក​ឃើញ​ថា នៅ​រស់​ប៉ុន្តែ​​បាន​រង​របួស​ធ្ងន់​ត្រង់​ក្បាល​ និង​ស្នាម​​ចាក់​នៅ​លើ​ដង​ខ្លួន​។ នាង​ត្រូវ​បាន​គេ​ដឹក​​តាម​យន្តហោះ​ទៅ​កាន់​​​មន្ទីរ​ពេទ្យ​ព្យាបាល​ជំងឺ​ទូទៅ​មួយ​ក្នុង​ទីក្រុង​បាងកក ជា​ទី​ដែល​នាង​បានស្លាប់​ដោយ​សារ​របួស​។

កាលពី​ម្សិលមិញ​ ចៅក្រម​ប្រធាន​ក្រុម​ប្រឹក្សា​ជំនុំជម្រះ​ នូ វាសនា បាន​ប្រាប់​ទៅ​កាន់​បន្ទប់​​សវនាការ​ថា ​ជា ភិន ត្រូវ​បាន​ផ្ដន្ទាទោស​ឲ្យ​ជាប់​ពន្ធនាគារ​រយៈ​ពេល​១៣​ឆ្នាំ​តាម​មាត្រា​១៩៩​នៃ​ក្រម​ព្រហ្មទណ្ឌ ពីបទ​មនុស្ស​ឃាត​ “ដោយ​គ្មាន​ស្ថាន​ទម្ងន់​ទោស​”។

បទ​មនុស្ស​ឃាត​អាច​មានទោស​ជាប់​ពន្ធនាគារ​ពី​១០ឆ្នាំ​ទៅ​១៥​ឆ្នាំ​។ ចៅក្រម​ វាសនា បាន​លើក​ឡើង​ថា លោក​​មិន​បាន​​ផ្ដន្ទាទោស​ ជា​ ភិន ឲ្យ​ជាប់​ពន្ធនាគារ​ច្រើន​ឆ្នាំ​បំផុត​នោះ​ដោយ​សារ​បញ្ហា​មួយ​ចំនួន។ លោក​បាន​មាន​ប្រសាសន៍​ដោយមិន​រៀប​រាប់​ច្រើន​ថា “ជន​អនាថា​​នេះ​គ្មាន​ការ​អប់រំ​ទេ។ ហើយ​រូប​គេ​​ដឹង​កំហុស​របស់​ខ្លួនហើយ”។

លោក សេង ស៊ីងហេង មេធាវី​​របស់​ជនរងគ្រោះ​បាន​លើក​ឡើង​ថា លោក​ពេញ​ចិត្ត​ចំពោះ​សេចក្ដី​សម្រេច​របស់​តុលាការ​។ លោក​បាន​មាន​ប្រសាសន៍​ថា “ការ​​ផ្ដន្ទាទោស​នេះ​គឺ​អាច​ទទួល​យក​បាន ព្រោះ​ការ​ធ្វើ​ឃាត​នេះ​មាន​ជាប់​ពាក់​ព័ន្ធ​ជាមួយ​គ្រឿង​ស្រវឹង​ ហើយ​គ្មាន​ផែន​ការ​ទុក​ជាមុន​ទេ”។

លោក​ ឡាយ ណូរ៉ា មេធាវី​ដែល​ចាត់​តាំង​ដោយ​តុលាការ​ដើម្បី​ការ​ពារ​ ជា ភិន ​មិន​មាន​វត្តមាន​ទេ​អំឡុង​ពេល​បើក​សវនាការ​កាលពី​ម្សិលមិញ ហើយ​លោក​បាន​និយាយ​តាម​ទូរស័ព្ទ​ថា លោក​មិន​ច្បាស់​ទេ​ថា តើ​កូនក្ដី​របស់​លោក​នឹង​ប្ដឹង​ទាស់​ចំពោះ​សេចក្ដី​សម្រេច​នេះ​ឬក៏​អត់​នោះ​។

លោកស្រី Daphna Beerdsen ធ្វើ​ការ​ជា​អ្នក​ផ្ដល់​ប្រឹក្សា​​នៅ​អង្គការ​សហប្រជា​ជាតិ​។ ប្ដី​របស់​គាត់​ឈ្មោះ Joris Oele ដែល​ធ្វើ​ការ​​នៅ​អង្គការ​ Habitat របស់​អង្គការ​សហប្រជា​ជាតិ​​បានទៅ​​ខេត្ត​ព្រះសីហនុ ដើម្បី​បើក​សន្និសីទ​មួយ​​ទាក់​ទង​នឹង​ការ​ងារ​នៅ​ពេល​ហេតុការណ៍​នេះ​បាន​កើត​ឡើង​។

អំឡុង​ពេល​បើក​សវនាការ​កាលពី​ថ្ងៃ​ទី២ ខែ​ធ្នូ ជា ភិន បាន​ស្នើ​ឲ្យ​តុលាការ​ដាក់​ទោស​ខ្លួន​ឲ្យ​បាន​សាកសម​ពីបទ​មនុស្ស​ឃាត​នេះ​។ ជា ភិន បាន​និយាយ​បន្ថែម​ថា ” ប៉ុន្តែ​ប្រសិន​បើ​អាច​ទៅ​រួច ខ្ញុំ​ចង់​ឃើញ​ព្រះអាទិត្យ​ម្ដង​ទៀត​”។

នៅ​ម៉ោង​ប្រហែល​១១ព្រឹក​​​ម្សិលមិញ ជា ភិន ដែល​ត្រូវ​បាន​ដាក់​ខ្នោះ​ជាប់​ជាមួយ​អ្នក​ទោស​ម្នាក់​ទៀត ​ត្រូវ​បាន​បញ្ជូន​ចេញ​​ពី​បន្ទប់​សវនាការ​ទៅ​កាន់​រថយន្ត​កំពុង​រង់ចាំ​មួយ​គ្រឿង​ ហើយ​បន្ទាប់​មក​ត្រូវ​បាន​ដឹក​ទៅ​កាន់​ពន្ធនាគារ​ព្រៃស។ នៅ​ពេល​គេ​សួរ​ថា តើ​ខ្លួន​​​ពេញ​ចិត្ត​ចំពោះ​សេចក្ដី​សម្រេច​នេះ​ឬក៏​អត់ ជន​​អនាថា​នេះ​បាន​ឱន​ក្បាល​ចុះ​ហើយ​នៅ​ស្ងៀម។ ហើយ​នៅពេល​គេ​សួរ​ថា តើ​ខ្លួន​បាន​សម្លាប់​ជន​រងគ្រោះ​ដែរ​ឬទេ ជន​នេះ​បាន​និយាយ​តិចៗ​ថា “បាន​”៕ ស៊ុយឈាង​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស