ក្រុមមន្ត្រីបានឲ្យដឹងកាលពីម្សិលមិញថា ស្ពានអ្នកលឿងដែលនឹងតភ្ជាប់ខេត្តកណ្ដាល និងខេត្តព្រៃវែងត្រូវបានតភ្ជាប់គ្នាហើយកាលពីថ្ងៃច័ន្ទ ហើយនឹងត្រូវបើកឲ្យធ្វើដំណើរមុនចូលឆ្នាំខ្មែរ ក្នុងខែមេសា។
បច្ចុប្បន្ន អ្នកដំណើរដែលធ្វើដំណើរឆ្លងកាត់ខេត្តទាំងពីរតាមផ្លូវជាតិលេខ១ត្រូវឆ្លងសាឡាងកាត់ទន្លេមេគង្គ។
លោក ផៃ ប៊ុនឈឿន អភិបាលខេត្តកណ្ដាលបានឲ្យដឹងកាលពីម្សិលមិញថា ការសាងសង់ស្ពានអ្នកលឿងដែលគេរង់ចំាជាយូរមកហើយនេះនឹងបញ្ចប់នៅខែក្រោយ។
លោក ផៃ ប៊ុនឈឿន បានមានប្រសាសន៍ថា “ស្ពានអ្នកលឿងត្រូវបានតភ្ជាប់កាលពីថ្ងៃទី២២ ខែធ្នូ។ ហើយឥឡូវនេះ ស្ពាននេះត្រូវបានសាងសង់រួចរាល់៩៥ភាគរយហើយ”។ លោកបានមានប្រសាសន៍បន្ថែមថា “ស្ពាននេះនឹងត្រូវសាងសង់រួចរាល់នៅពាក់កណ្ដាលខែមករា ឆ្នាំ២០១៥ ហើយសម្ដេចនាយករដ្ឋមន្ត្រី [ហ៊ុន សែន] នឹងទៅសម្ពោធមុនចូលឆ្នាំខ្មែរ”។
លោក ផៃ ប៊ុនឈឿន បានលើកឡើងទៀតថា “នៅពេលស្ពាននេះត្រូវបានបើកឲ្យដំណើរការ សាឡាងអ្នកលឿងនឹងនៅតែបន្តប្រតិបត្តិការ ប៉ុន្តែប្រហែលជាត្រូវយកទៅកន្លែងផ្សេងដែលអាចមានប្រយោជន៍ជាងនេះ”។
លោកស្រី អ៊ូច សុខន អនុប្រធានគ្រប់គ្រងសាឡាងអ្នកលឿងបានលើកឡើងថា គាត់សន្និដ្ឋានថា សាឡាងនេះនឹងត្រូវយកទៅប្រើប្រាស់នៅកន្លែងផ្សេង ប៉ុន្តែថាមិនទាន់មានសេចក្ដីសម្រេចជាផ្លូវការនៅឡើយទេ។ លោកស្រីបានមានប្រសាសន៍ថា “ឥឡូវនេះក្រសួងសាធារណការ និងដឹកជញ្ជូនកំពុងតែប្រជុំគ្នាអំពីផែនការទៅថ្ងៃអនាគតសម្រាប់សាឡាងទាំងនេះ”។
លោក ត្រាំ អុីវតឹក រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា រដ្ឋាភិបាលកំពុងតែពិចារណាថា តើត្រូវធ្វើយ៉ាងដូចម្ដេចចំពោះសាឡាងទាំងនេះ។ លោកបានមានប្រសាសន៍ថា “ដំបូងឡើយ យើងមានផែនការបញ្ជូនសាឡាងទាំងនេះទៅកាន់ផែល្វាឯម [ក្បែររាជធានីភ្នំពេញ] ប៉ុន្តែវាហាក់ដូចជាមិនអាចរកប្រាក់ចំណេញបានទេ ហេតុដូច្នេះ ប្រសិនបើមានក្រុមហ៊ុនឯកជនណាចង់ជួលសាឡាងទាំងនេះ យើងនឹងជួលឲ្យ”។
ស្ពានអ្នកលឿងកំពុងត្រូវបានសាងសង់ក្រោមជំនួយទឹកប្រាក់ប្រមាណ១១៨លានដុល្លារ ពីរដ្ឋាភិបាលជប៉ុន ដែលក៏ផ្ដល់មូលនិធិសម្រាប់ការជួសជុលផ្លូវជាតិលេខ១ឡើងវិញផងដែរនោះ។ ដំបូងឡើយគេគ្រោងសាងសង់ស្ពាននេះឲ្យចប់នៅត្រឹមឆ្នាំ២០១២៕ ស៊ុយឈាង