30 C
Phnom Penh

រដ្ឋាភិបាល​​នឹង​រំសាយ​និស្សិត​ស្ម័គ្រ​ចិត្ត​ពី​កម្មវិធី​​ផ្ដល់​ប័ណ្ណ​កម្មសិទ្ធិ​ដីធ្លី​​ដ៏ចម្រូងចម្រាស​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ ក្រសួង​រៀបចំ​ដែន​ដី​ នគរូបនីយកម្ម និង​សំណង់ បាន​​ប្រកាស​ថា រដ្ឋាភិបាល​បាន​ចែក​ប័ណ្ណ​កម្មសិទ្ធិ​ដីធ្លី​ថ្មី​ចំនួន​៦១០.០០០​​ដល់​អ្នកភូមិ​ចាប់​តាំង​ពី​លោក​នាយក​រដ្ឋមន្ត្រី​ ហ៊ុន សែន ​បាន​ប្រកាស​ចាប់​ផ្ដើម​​​កម្មវិធី​​ផ្ដល់​ប័ណ្ណ​កម្មសិទ្ធិ​ដីធ្លី​កាលពី​ខែ​មិថុនា ឆ្នាំ​២០១២​មក ប៉ុន្តែ​ក្រសួង​បាន​លើក​ឡើង​ថា និស្សិត​ស្ម័គ្រ​ចិត្ត​ដែល​ជា​កម្លាំង​ស្នូល​នៃ​កម្មវិធី​ផ្ដល់​ប័ណ្ណ​កម្មសិទ្ធិ​ដីថ្លី​នេះ​នឹង​ត្រូវ​រំសាយ​ចោល។

នៅ​ពេល​បញ្ចប់​កិច្ច​ប្រជុំ​រយៈ​ពេល​១២​ថ្ងៃ​​ស្ដីពី​បញ្ហា​ដីធ្លី​ ដែល​រៀបចំ​ឡើង​ដោយ​អង្គការ​ ស្តារកម្ពុជា​ (Star Kampuchea) ជា​អង្គការ​មិន​មែន​រដ្ឋាភិបាល​​ លោក ស សុវណ្ណ រដ្ឋលេខាធិការ​ក្រសួង​រៀបចំ​ដែនដី នគរូបនីយកម្ម និង​សំណង់ បាន​លើក​ឡើង​ថា ប័ណ្ណ​កម្មសិទ្ធិ​ដីធ្លី​ថ្មី​ត្រូវ​បាន​ចែក​ជូន​អ្នក​ភូមិ​ប្រមាណ​៤០០.០០០គ្រួសារ​ ហើយ​បាន​គ្រប​ដណ្ដប់​លើ​ផ្ទៃ​ដី​​ទំហំ​១,២លាន​ហិកតា​​​​នៅ​ក្នុង​ខេត្ត​ចំនួន​២០​។

លោក​បាន​ប្រាប់​​និស្សិត​ និង​អ្នកភូមិ​ជាង​២០០​នាក់​មក​ពី​ទូទាំង​ប្រទេស​ថា “យើង​បាន​ដោះ​ស្រាយ​បញ្ហា​​របស់​ប្រជាពលរដ្ឋ​ ហើយ​យើង​ឃើញ​ថា វិវាទ​ដីធ្លី​មាន​ការ​ធ្លាក់​ចុះ​យ៉ាង​ខ្លាំង​”។

ខ្មែរ​ក្រហម​បាន​លុប​បំបាត់​ការ​កាន់​កាប់​អចលនទ្រព្យ​ឯកជន​ទាំង​អស់​នៅ​ក្នុង​​ទសវត្សរ៍​​ឆ្នាំ១៩៧០​ ដោយ​បន្សល់​ឲ្យ​ពលរដ្ឋ​ខ្មែរ​រាប់​លាន​នាក់​គ្មាន​ប័ណ្ណ​កម្មសិទ្ធិ​ដីធ្លី។ កេរ្តិ៍​ដំណែល​នេះ​បាន​ធ្វើ​ឲ្យ​​កើត​មាន​វិវាទ​ដីធ្លី​យ៉ាង​ច្រើន​ ដោយ​សារ​រដ្ឋាភិបាល​បាន​យក​ដីធ្លី​ជា​ច្រើន​ជួល​ឲ្យ​ក្រុម​ហ៊ុន​ឯកជន​ និង​ក្រុម​ហ៊ុន​រុក​រក​រ៉ែ ឬក្រុម​ហ៊ុន​កសិកម្ម​ធំៗ​​ភាគច្រើន។

លោក ហ៊ុន សែន បាន​ប្រកាស​កម្មវិធី​ផ្ដល់​ប័ណ្ណ​កម្មសិទ្ធិ​ដីធ្លី​របស់​លោក​កាលពី​ឆ្នាំ​២០១២​ ក្នុង​គោល​បំណង​ជួយ​ដោះស្រាយ​វិវាទ​មួយ​ចំនួន​ក្នុង​ចំណោម​វិវាទ​ដីធ្លី​ទាំង​នោះ​ ហើយ​បាន​ជ្រើសរើស​និស្សិត​ស្ម័គ្រ​ចិត្ត​រាប់​ពាន់​នាក់​ ដើម្បី​ជួយ​វាស់​វែង​ដីធ្លី​។ ទោះបី​ជា​តួលេខ​ចុង​ក្រោយ​នេះបាន​សម្រេច​គោល​ដៅ​​គ្រប​ដណ្ដប់​លើ​ផ្ទៃ​ដីទំហំ​១,២លាន​ហិកតា​ ដែល​លោក​នាយក​រដ្ឋមន្ត្រី​បាន​កំណត់​តាំង​ពី​ដំបូង​ឡើយ​ក្ដី តែ​វា​នៅ​តែ​មិន​ទាន់​សម្រេច​គោល​ដៅ​ដែល​​កំណត់​លើក​ក្រោយ​​ដោយ​គ្រប់​ដណ្ដប់​លើ​ផ្ទៃ​ដី​១,៨លាន​ហិកតា​នៅ​ឡើយ​ទេ។

ទោះបី​ជា​នៅ​មាន​ផ្ទៃ​ដី​ប្រមាណ​៦០០.០០០​ហិកតា​​ត្រូវ​វាស់​វែង​បន្ត​ក្ដី​ តែ​លោក​ ស សុវណ្ណ បាន​លើក​ឡើង​កាលពី​ម្សិលមិញ​ថា រដ្ឋាភិបាល​​លែង​ផ្អែក​លើ​និស្សិត​​ស្ម័គ្រ​ចិត្ត​ទៀត​ហើយ​។

លោក​បាន​មាន​ប្រសាសន៍​ទៀត​ថា “យើង​មាន​ផែន​ការ​វាស់​វែង​ដីធ្លី​ទំហំ​២លាន​ហិកតា​បន្ថែម​ទៀត​នៅ​ឆ្នាំ​ក្រោយ​ ហើយ​យើង​នឹង​មិន​ប្រើ​និស្សិត​ស្ម័គ្រ​ចិត្ត​សម្រាប់​កម្មវិធី​នេះ​ទៀត​ទេ ព្រោះ​​យើង​មាន​មន្ត្រី​ជំនាញ​គ្រប់គ្រាន់​ដើម្បី​៊ធ្វើ​រឿង​នេះ​”។

​កម្មវិធី​នេះ​បាន​រង​ការ​រិះគន់​យ៉ាង​ខ្លាំង​ពី​សំណាក់​អង្គការ​សិទ្ធិ​មនុស្ស​ដែល​ចោទ​ប្រកាន់​រដ្ឋាភិបាល​ថា បាន​បដិសេធ​មិន​ឲ្យ​ស្ថាប័ន​ឯករាជ្យ​ឃ្លាំមើល​ការ​អនុវត្ត​របស់​ខ្លួន​។ អង្គការ​សិទ្ធិ​មនុស្ស​ក៏​បាន​លើក​ឡើង​ផង​ដែរ​ថា កម្មវិធី​​នេះ​ជួយ​ដោះ​ស្រាយ​វិវាទ​ដីធ្លី​បាន​តែ​បន្តិច​បន្តួច​ប៉ុណ្ណោះ ព្រោះ​វា​មាន​ចេតនា​គេច​ចេញ​ពី​តំបន់​ភាគច្រើន​ដែល​កសិករ​ក្រីក្រ​កំពុង​មាន​វិវាទ​ជាមួយ​ក្រុម​ហ៊ុន​ឯកជន៕ ស៊ុយឈាង​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស