26.3 C
Phnom Penh

បុរស​បី​នាក់​ត្រូវ​បាន​ផ្ដន្ទាទោស​​ឲ្យ​ជាប់​ពន្ធនាគារ​អស់​មួយ​ជីវិត​ ពីបទ​ធ្វើ​ឃាត​ស្ត្រី​អ្នក​ជំនួញ​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ សាលា​ដំបូង​រាជ​ធានី​ភ្នំពេញ បាន​ផ្ដន្ទាទោស​បុរស​បី​នាក់​​ ដោយ​មាន​ពីរ​នាក់​ត្រូវ​ផ្ដន្ទាទោស​កំបាំង​មុខ​នោះ​​ឲ្យ​ជាប់​ពន្ធនាគារ​អស់​មួយ​ជីវិត​ ពីបទ​​ប្រព្រឹត្ត​អំពើ​មនុស្ស​ឃាត​ដ៏ព្រៃ​ផ្សៃ​លើ​ស្ត្រី​អ្នក​​ជំនួញ​ជនជាតិ​ចិន​ម្នាក់​កាលពី​ថ្ងៃ​ទី​២ ខែ​ឧសភា នៅ​​ក្នុង​ផ្ទះ​របស់​គាត់​ដែល​​ជា​រោងចក្រ​ផលិត​មួក​តូច​មួយ​ក្នុងខណ្ឌ​ពោធិ៍សែន​ជ័យ។

អំឡុង​ពេល​បើក​សវនាការ​កាលពី​ថ្ងៃ​ច័ន្ទ សយ ហួង អាយុ​២៣​ឆ្នាំ​បាន​សារភាព​ថា មាន​ជាប់​ពាក់ព័ន្ធ​នៅ​ក្នុង​ការ​ធ្វើ​ឃាត​អ្នកស្រី លី ចាង អាយុ​៤៣​ឆ្នាំ ដោយ​ឈរ​យាម​ផ្លូវ​នៅ​ខាង​ក្រៅអគារ​​ខណៈ​​​ស្ត្រី​រូប​នេះ​ត្រូវ​គេ​សម្លាប់ និង​បាន​ជួយ​ក្នុង​ការ​យក​សព​ស្ត្រី​រងគ្រោះ​ទៅ​បោះ​ចោល​។

ប៉ុន្តែ​ សយ ហួង ​បាន​និយាយ​ថា ចុងចោទ​ចំនួន​ពីរ​រូប​ដែល​មានឈ្មោះ សយ សុភា អាយុ​២១​ឆ្នាំ និង​​ យឹម វន្ថា អាយុ​៣៨​ឆ្នាំ​ ដែល​ឥឡូវ​កំពុង​រត់គេច​ខ្លួន គឺ​ជា​អ្នក​​ប្រព្រឹត្ត​អំពើមនុស្សឃាត​នេះ​។

សយ ហួង បាន​និយាយ​អំឡុង​ពេល​បើក​សវនាការ​ថា “ស្ត្រី​ឈ្មោះ​ [លី ចាង​] នេះ​កំពុង​​បូក​បញ្ជី​នៅ​លើ​តុ​​ ហើយ​ វន្ថា ​បាន​ទៅ​​ទាញ​គាត់​ទម្លាក់​មក​លើ​ឥដ្ឋ​​។ វន្ថា បាន​ខ្ទប់​មាត់​គាត់​ បន្ទាប់​មក​បាន​យក​ដំបង​ឆក់​ឆក់គាត់ រួច​យក​កន្ត្រៃ​ចាក់​គាត់​ថែម​ទៀត​។​ រីឯ​ឈ្មោះ ភា វិញ​បាន​យក​ឡាម​អារ​បំពង់​ករ​របស់​គាត់​”។

ចៅក្រម​ប្រធាន​ក្រុម​ប្រឹក្សា​ជំនុំជម្រះ​ ឈុន ហេង បាន​ឲ្យ​ដឹង​កាលពី​ម្សិលមិញ​ថា ​បុរស​ទាំង​បី​នាក់​នេះ​ជាប់​ទោស​​ពីបទ​មនុស្ស​ឃាត​ដោយ​គិត​ជាមុន​​តាម​មាត្រា ២០០​ នៃ​ក្រម​ព្រហ្មទណ្ឌ​។

ចៅក្រម​ ឈុន ហេង បាន​ប្រកាស​សាលក្រម​ថា “សយ ហួង អាយុ​២៣​ឆ្នាំ ត្រូវ​ជាប់​ពន្ធ​នាគារ​អស់​មួយ​ជីវិត។ សយ សុភា អាយុ​២១​ឆ្នាំ និង​ យឹម វន្ថា អាយុ​៣៨​ឆ្នាំ​ក៏​ជាប់​ទោស​អស់​មួយ​ជីវិត​ដែរ”។ ចៅក្រម ឈុន ហេង បាន​បន្ថែម​ថា លោក​បាន​ចេញ​ដីកា​​​ចាប់​ខ្លួន​​ សយ សុភា និង​ យឹម វន្ថា ហើយ។

យោង​តាម​របាយការណ៍​របស់​នគរ​បាល​ដែល​គេ​អាន​អំឡុង​ពេល​បើក​សវនាការ​កាលពី​ថ្ងៃ​ច័ន្ទ បាន​ឲ្យ​ដឹង​ថា​ ដើម្បី​ជា​ការ​សងសឹក សយ សុភា បាន​សម្រុក​ចូល​ផ្ទះ​របស់​អ្នកស្រី លី ចាង ក្នុង​សង្កាត់​ចោមចៅ ​ត្រឹម​តែ​រយៈ​ពេល​៥ម៉ោង​ប៉ុណ្ណោះ​បន្ទាប់ពី​អ្នកស្រី​បាន​បណ្ដេញ​ជន​នេះ​ចេញ​ពីបទ​លួច​លុយ​ប្រហែល​១០៧​ដុល្លារ​ពី​ថត​តុ​​​នៅ​ក្នុង​រោងចក្រ​ដ៏តូច​មួយ​នេះ​​។

របាយការណ៍​នគរ​បាល​បាន​ឲ្យ​ដឹង​បន្ត​ថា បន្ទាប់ពី​សម្លាប់​អ្នកស្រី លី ចាង រួច​បុរស​ទាំង​បី​នាក់​នេះ​យក​បាន​​​ប្រាក់​ប្រហែល​៥០​ដុល្លារ​ និង​កុំព្យូទ័រ​យួរ​ដៃ​មួយ​គ្រឿង​។ បើ​យោង​តាម​ចម្លើយ​សារភាព​​របស់​ សយ ហួង បាន​ឲ្យ​ដឹង​ថា សយ សុភា បាន​ឲ្យ​កុំព្យូទ័រ​យួរ​ដៃ​មក​ខ្លួន ដើម្បី​សង​ប្រាក់​ជំពាក់​។

លោក​ យឹម សារ៉ាន់ អធិការ​នគរ​បាល​ខណ្ឌ​​បាន​ឲ្យ​ដឹង​ថា ​នគរ​បាល​ខណ្ឌ​របស់​លោក​​​កំពុង​តាម​ចាប់​ខ្លួន​អ្នក​ដែល​សម​គំនិត​ជាមួយ សយ ហួង។ លោក​បាន​ប្ដេជ្ញា​ថា “ខ្ញុំ​នឹង​តាម​រក​រហូត​ទាល់​តែ​ចាប់​ខ្លួន​ពួកគេ​បាន​”៕ ស៊ុយឈាង​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស