32 C
Phnom Penh

កង​រក្សា​សន្តិភាព​ត្រឡប់​ពី​​បំពេញ​បេសកកម្ម​នៅ​ក្នុង​ប្រទេស​លីបង់​

ដោយ ឌឹ ខេមបូឌា ដេលី

បទវិភាគ

មុន​ពិធី​កាលពី​ម្សិលមិញ​នៅ​មូលដ្ឋាន​ទ័ពអាកាស​ក្នុង​រាជ​ធានី​ភ្នំពេញ ដើម្បី​ស្វាគមន៍​កង​រក្សា​សន្តិភាព​ជិត​២០០​នាក់​ ដែល​ត្រឡប់​មក​ដល់​ប្រទេស​កម្ពុជា​វិញ​កាលពី​យប់​ថ្ងៃ​ពុធ បន្ទាប់ពី​បំពេញ​បេសកកម្ម​អស់រយៈ​ពេល​ប្រហែល​​១ឆ្នាំ​នៅ​ក្នុង​ប្រទេស​លីបង់ មេបញ្ជាការ​អង្គភាព​​ដែល​បញ្ជូន​កង​រក្សា​សន្តិភាព​ទៅ​បំពេញ​បេសកកម្ម​នេះ​បាន​រៀបរាប់​ថា ​ប្រទេស​លីបង់​ជា​ប៉ុស្តិ៍​​​ “ដ៏ល្អបំផុត​មួយ​”។cam-photo-peacekeepers1

ដោយ​កង​រក្សា​សន្តិភាព​កម្ពុជា​បាន​ទៅ​បំពេញ​បេសកកម្ម​នៅ​ក្នុង​ប្រទេស​មួយ​ចំនួន​ រួួម​មាន​ដូច​ជា ប្រទេស​ម៉ាលី សាធារណរដ្ឋ​អាហ្វ្រិក​កណ្ដាល និង​ប្រទេស​ស៊ូដង់​ខាង​ត្បូង​នោះ ​វរសេនីយ៍​ឯក ម៉ម នាង អាយុ​៥៣​ឆ្នាំ​ជា​មេបញ្ជាការ​គ្រប់គ្រង​ទាហាន​ចំនួន​១៨៤​នាក់​នៅ​ក្នុង​កង​ពល​វិស្វកម្ម​លេខ​៦២១​ បាន​លើក​ឡើង​ថា ប្រទេស​លីបង់​គឺ​ជា​ប៉ុស្តិ៍​ដែល​ស្រួល​ជាង​ប្រទេស​ដទៃទៀត​។

វរសេនីយ៍​ឯក​​ ម៉ម នាង បាន​មាន​ប្រសាសន៍​ថា “ខ្ញុំ​គិត​ថា ប្រទេស​លីបង់​គឺ​ជា​ប្រទេស​ដ៏ល្អ​បំផុត​សម្រាប់​បេសកកម្ម​។ អាកាសធាតុ​ល្អ​ ឬឯ​​ពលរដ្ឋ​ក៏​ល្អ​ដែរ​។ វា​ដូច​នៅ​អឺរ៉ុប​អ៊ីចឹង​ ហើយ​ខុស​គ្នា​ឆ្ងាយ​ពី​តំបន់​មជ្ឈិម​បូពា៌ និង​តំបន់​អាហ្វ្រិក​”។

ប្រទេស​លីបង់​មាន​ព្រំដែន​ជាប់​ប្រទេស​ស៊ីរី​នៅ​ភាគ​ខាង​ជើង និង​ភាគ​ខាង​កើត ហើយ​ជាប់​ប្រទេស​អុីស្រាអែល​នៅ​ភាគ​ខាង​ត្បូង​។

វរសេនីយ៍​ឯក​ ម៉ម នាង បាន​លើក​ឡើង​ទៀត​ថា អង្គភាព​របស់​លោក​គឺ​​មានមូលដ្ឋាន​​នៅ​ក្នុង​ភាគអាគ្នេយ៍​នៃ​ស្រុក​ Marjeyoun។

វរសេនីយ៍​ឯក​ ម៉ម នាង ដែល​​ធ្លាប់​ចូលរួម​នៅ​ក្នុង​បេសកកម្ម​រក្សា​សន្តិភាព​​ចំនួន​ពីរ​លើក​រួច​មក​ហើយ​ដោយ​មួយ​ៗលើក​មាន​រយៈ​ពេល​១ឆ្នាំ​ នៅ​ក្នុង​ប្រទេស​លីបង់ និង​ប្រទេស​ស៊ូដង់ បាន​លើក​ឡើង​ថា ភារកិច្ច​ចម្បង​ចំនួន​ពីរ​របស់​អង្គភាព​លោក គឺ​ការ​សាងសង់ និង​ដោះមីន។

ប៉ុន្តែ​ដោយ​សារ​តែ​មិន​សូវ​សម្បូរ​មីន​ដោះ លោក​បាន​លើក​ឡើង​ថា អង្គភាព​របស់​លោក​​ផ្ដោត​សំខាន់​​​លើ​ការ​បោះ​បង្គោល​ព្រំដែន​រវាង​ប្រទេស​លីបង់ និង​ប្រទេស​អុីស្រាអែល​ ហើយ​ជួយ​ក្នុង​គម្រោង​សាង​សង់​សម្រាប់​ពលរដ្ឋ​។

លោក​បាន​មាន​ប្រសាសន៍​ថា “យើង​បាន​ផ្ដល់​ជំនួយ​ដល់​អ្នក​ភូមិ​មូលដ្ឋាន​ ដោយ​ជួយ​ស្ថាបនា​ផ្លូវ និង​ជួន​កាល​សម្អាត​ទន្លេ​ដើម្បី​ជួយ​ឲ្យ​ទឹក​អាច​ហូរ​បាន​​។ ខ្ញុំ​គិត​ថា វា​មិន​មែនជា​ការ​ងារ​ដែល​ស្មុគ្រស្មាញ​ខ្លាំង​ឡើយ”។

វរសេនីយ៍​ឯក​​ ម៉ម នាង បាន​លើក​ឡើង​ទៀត​ថា នៅ​ពេល​មាន​ការ​ប្រយុទ្ធ​គ្នា​រវាង​កង​កម្លាំង​អុីស្រាអែល និង​ក្រុម​ជីអាដ (jihad)​ អំឡុង​បេសកកម្ម​របស់​ពួកគាត់​ កង​កម្លាំង​រក្សា​សន្តិភាព​របស់​លោក​​មិន​ដែល​រង​ការ​បាញ់​ប្រហារ​ណាមួយ​ឡើយ​។ លោក​បាន​មាន​ប្រសាសន៍​បន្ថែម​ថា “តួនាទី​របស់​យើង​គឺ​គ្រាន់​តែ​រក្សា​សន្តិភាព​ប៉ុណ្ណោះ”។

អនុសេនីយ៍​ទោ សំ សារុំ អាយុ​៣០​ឆ្នាំ ដែល​បាន​ចូល​រួម​នៅ​ក្នុង​កង​កម្លាំង​​ការ​ពារ​របស់​កង​រក្សា​សន្តិភាព​ដែល​ទទួល​ខុស​ត្រូវ​ផ្នែក​សន្តិសុខ​ បាន​លើក​ឡើង​ថា អង្គភាព​របស់​លោក​ក៏​ជួយ​បោះ​បង្គោល​ព្រំដែន​រវាង​ប្រទេស​លីបង់ និង​ស៊ីរី​ផង​ដែរ​។

ថ្វីបើ​សង្គ្រាម​ស៊ីវិល​ដែល​កំពុង​តែ​បន្ត​ក្នុង​ពេល​បច្ចុប្បន្ន​ធ្វើ​ឲ្យ​ប្រទេស​ស៊ីរី​ខ្ទេច​ខ្ទី​ក៏ដោយ តែ​លោក សារុំ ​បាន​លើក​ឡើង​ថា ពួកគាត់​មិន​ដែល​ជួប​ប្រទះ​ជន​ភៀស​ខ្លួន​ ឬ​អ្នក​ប្រយុទ្ធ​​​​ដែល​ពាក់​ព័ន្ធ​នៅ​ក្នុង​សង្គ្រាម​​ណា​ម្នាក់​ឡើយ​។ លោក​បាន​និយាយ​ថា “វា​មិន​គ្រោះ​ថ្នាក់​ទេ”។

កង​រក្សា​សន្តិភាព​ចំនួន​១៨៤​នាក់​ផ្សេង​ទៀត បាន​ចាក​ចេញ​ពី​ប្រទេស​កម្ពុជា​ទៅ​កាន់​ប្រទេស​លីបង់​កាលពី​ថ្ងៃ​អង្គារ ដើម្បី​ជំនួស​កង​រក្សា​សន្តិភាព​ដែល​ទើប​​ត្រឡប់​មក​វិញ​ទាំង​នេះ៕ ស៊ុយឈាង​

​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស