ប៉ូលិសនៅខេត្តពោធិ៍សាត់បាននិយាយកាលពីថ្ងៃព្រហស្បតិ៍ថា ពួកគេបានកំណត់អត្តសញ្ញាណអ្នកនេសាទវៀតណាមបីនាក់ជាជនសង្ស័យសំខាន់ក្នុងការចាប់រំលោភនិងធ្វើឃាតក្មេងស្រីអាយុ១០ឆ្នាំម្នាក់កាលពីដើមខែនេះនៅស្រុកក្រគរ។ អ្នកទាំងបីស្ថិតនៅក្រៅឃុំនៅឡើយ។
កាលពីថ្ងៃទី១៦ខែធ្នូ ពីរថ្ងៃបន្ទាប់ពីក្មេងស្រីនេះបាត់ខ្លួន អ្នកភូមិមួយក្រុមបានប្រទះឃើញសពរបស់នាងអណ្តែតក្នុងបឹងទន្លេសាបនៅឃុំអន្សាចំបក់។ បន្ទាប់ពីពិនិត្យសពក្មេងស្រីនេះរួច ប៉ូលិសបានកំណត់ថា ក្មេងស្រីនេះត្រូវបានគេរំលោភនិងសម្លាប់ចោល។
ស្នងការរងខេត្តលោក កែវ សុគន្ធា បានមានប្រសាសន៍កាលពីថ្ងៃព្រហស្បតិ៍ថា មន្ត្រីរបស់លោកបានកំណត់អត្តសញ្ញាណជនជាតិវៀតណាមបីនាក់ជាជនសង្ស័យ ប៉ុន្តែមិនបានប្រាប់ឈ្មោះពួកគេទេ។
លោក សុគន្ធា បានឲ្យដឹងថា “យើងកំពុងសហការជាមួយប៉ូលិសអន្តោប្រវេសន៍ខេត្តដើម្បីរករូបថតរបស់ជនសង្ស័យហើយផ្តល់ទៅខេត្តផ្សេងៗទៀតនៅក្បែរ ដែលអាចជួយស្វែងរកនិងចាប់ខ្លួនពួកគេ”។ លោកបានបន្ថែមថា “យើងមិនអាចប្រាប់អ្នកនូវសេចក្តីលម្អិតច្រើនបានទេ…ប៉ុន្តែយើងសង្ឃឹមថា យើងនឹងចាប់ខ្លួនពួកគេបានក្នុងពេលឆាប់ៗនេះ”។
លោក តូ តាំងអេង នាយការិយាល័យបច្ចេកទេសនិងវិទ្យាសាស្ត្រនៃស្នងការដ្ឋាននគរបាលខេត្តពោធិ៍សាត់ បានមានប្រសាសន៍ថា ប៉ូលិសបានស្គាល់អត្តសញ្ញាណជនទាំងនោះ ដែលរស់នៅក្នុងឃុំកំពង់លួងដែលនៅជិតខាង ជាជនសង្ស័យបន្ទាប់ពីអ្នកស្រុកបាននិយាយថា ពួកគេបានបាត់ខ្លួនគួរឲ្យសង្ស័យ។
លោកបាននិយាយថា “យោងតាមក្រុមអ្នកភូមិឲ្យដឹង រាល់ថ្ងៃអ្នកនេសាទវៀតណាមពីរបីនាក់បានមករកត្រីនៅជិតកន្លែងកើតហេតុនេះ។ ប៉ុន្តែក្រោយពីមានឃាតកម្មកើតឡើង គ្មាននរណាម្នាក់បានឃើញពួកគេនៅទីនោះទេ”។
លោក តាំងអេង បានបន្ថែមថា អ្នកស្រុកឃុំកំពង់លួងបានក៏ប្រាប់ប៉ូលិសថា អ្នកនេសាទទាំងនោះបានបាត់មុខភ្លាមបន្ទាប់ពីក្មេងស្រីនោះបាត់ខ្លួន។ លោកបាននិយាយថា “ប្រសិនបើពួកគេមិនពាក់ព័ន្ធនឹងឃាតកម្មនេះ ហេតុអ្វីពួកគេព្យាយាមគេចខ្លួនពីប៉ូលិស?”។
លោក តាំងអេង បាននិយាយថា មុនពេលជនរងគ្រោះបាត់ខ្លួន នាងបានដើរទៅរើសអុសជាមួយជីដូនមួយអាយុ៨ឆ្នាំរបស់នាងជិះទូកពីរផ្សេងគ្នា។ ជីដូនមួយបានប្រាប់ប៉ូលិសថា ពេលពួកគេចេញទៅបឹង ក្មេងស្រីទាំងពីរបានលួចត្រីពីសំណាញ់អ្នកនេសាទ។ លោកបាននិយាយថា “ក្មេងស្រីបាននិយាយថា អ្នកនេសាទនោះខឹងណាស់”។ ប៉ូលិសសង្ស័យថា ការលួចត្រីជាដើមហេតុកើតមានឧក្រិដ្ឋកម្មនេះ។ យោងតាមលោក តាំងអេង ឲ្យដឹងថា ជីដូនមួយនោះបានមកផ្ទះមុនជនរងគ្រោះ ដែលបាននិយាយថា នាងនឹងមកតាមក្រោយ ប៉ុន្តែក៏បាត់រហូតតែម្តង៕មានិត