កាលពីថ្ងៃសុក្រ តុលាការកំពូលបានតម្កល់សាលដីកាផ្ដន្ទាទោសរបស់សាលាឧទ្ធរណ៍នៅក្នុងសំណុំរឿងលោក ឈូក បណ្ឌិត អតីតអភិបាលក្រុងបាវិត ដែលពេលនេះកំពុងគេចខ្លួននៅឡើយ និងត្រូវបានផ្ដន្ទាទោសកំបាំងមុខឲ្យជាប់ពន្ធនាគាររយៈពេល១៨ខែ ពីបទបាញ់ប្រហារកម្មការិនីរោងចក្របីនាក់អំឡុងការតវ៉ាមួួយកាលពីខែកុម្ភៈ ឆ្នាំ២០១២។
កម្មការិនីទាំងបីនាក់នេះបានចូលស្ដាប់សវនាការក្នុងតុលាការកំពូលកាលពីម្សិលមិញ ដោយសុំឲ្យតុលាការផ្តន្ទាទោសលោក ឈូក បណ្ឌិត ធ្ងន់ធ្ងរ និងសុំដំឡើងប្រាក់សំណងសរុបបញ្ចូលគ្នាពីចំនួន៩.៥០០ដុល្លារដែលសាលាដំបូងខេត្តស្វាយរៀង សម្រេចបង្គាប់ឲ្យលោក ឈូក បណ្ឌិត បង់ឲ្យពួកគេ ឲ្យដល់ចំនួនសរុប១៤០.០០០ដុល្លារ។
កាលពីខែវិច្ឆិកាឆ្នាំមុន សាលាឧទ្ធរណ៍បានតម្កល់សាលក្រមរបស់សាលាដំបូងដែលបានរកឃើញថា លោក ឈូក បណ្ឌិត ដែលពេលនោះមានឋានៈជាអភិបាលក្រុងបាវិត បានបាញ់ប្រហារលើក្រុមកម្មករដែលកំពុងធ្វើការតវ៉ានៅតំបន់សេដ្ឋកិច្ចពិសេសមួយកន្លែងក្នុងក្រុងនេះ បណ្តាលឲ្យស្ត្រីបីនាក់នេះរងរបួស។
ចៅក្រម តាំង ស៊ុនឡាយ នៅសាលាឧទ្ធរណ៍បានបកស្រាយអំពីសេចក្តីសម្រេចរក្សាទោសស្រាលនេះថា ការបាញ់ប្រហារទៅលើកម្មការិនីទាំងនោះ គឺជាឧបទ្ទវហេតុ។ ចៅក្រមរូបនេះមានប្រសាសន៍ទៀតថា “តុលាការយល់ថា ឈូក បណ្ឌិត គ្មានបំណងបាញ់កម្មការិនីទាំងបីនាក់ទេ ពីព្រោះគាត់មិនស្គាល់កម្មការិនីទាំងនោះឡើយ”។
កាលពីថ្ងៃសុក្រ ចៅក្រម ច័ន្ទ រង្សី នៅតុលាការកំពូលបានមានប្រសាសន៍ថា តុលាការកំពូលបានយល់ស្របតាម។ “សាលដីការបស់សាលាឧទ្ធរណ៍ត្រូវបានតម្កល់”។លោកបានបន្ថែមថា សំណើរបស់ជនរងគ្រោះសុំសំណងបន្ថែម ដើម្បីចេញថ្លៃការបន្តព្យាបាលរបួសរបស់ពួកគេ ត្រូវបានច្រានចោល។លោកបានលើកឡើងទៀតថា “តុលាការយល់ថា ជនរងគ្រោះកំពុងទាមទារសំណងសម្រាប់អនាគត ប៉ុន្តែ តុលាការមិនអាចពិចារណាការទាមទាររឿងនេះបានទេ”។
ពីរខែក្រោយពីការបាញ់ប្រហារនោះ លោក ឈូក បណ្ឌិត ត្រូវបានចោទប្រកាន់ពីបទបាញ់កម្មការិនីទាំងបីនាក់ “ដោយអចេតនា”។ ប៉ុន្តែ កាលពីខែធ្នូឆ្នាំ២០១២ តុលាការបានដកការចោទប្រកាន់ទាំងអស់លើអតីតអភិបាលក្រុងរូបនេះដោយគ្មានការពន្យល់បកស្រាយ ហើយងាកទៅចោទប្រកាន់លោក ស ចន្ថា មន្ត្រីនគរបាលក្រុងបាវិត ពីបទបាញ់ប្រហារជំនួសវិញ។
ចំពេលសាធារណជនធ្វើការតវ៉ា និងអះអាងថា លោក ឈូក បណ្ឌិត ត្រូវបានការពារដោយក្រុមអ្នកមានអំណាចនៅក្នុងជួរគណបក្សប្រជាជនកម្ពុជានោះ នៅខែមករាឆ្នាំ២០១៣ លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ បានបង្គាប់ឲ្យសាលាឧទ្ធរណ៍បើកការសើុបអង្កេតសំណុំរឿងនេះឡើងវិញ។
ពេលនោះសវនាការជាថ្មីនៅសាលាដំបូងខេត្តបានរកឃើញថា លោក ឈូក បណ្ឌិត ជាប់ពិរុទ្ធភាពពីបទបាញ់ប្រហារស្ត្រីទាំងនេះដោយអចេតនា ហើយបានច្រានចោលបទចោទប្រកាន់ដូចគ្នាលើលោក ស ចន្ថា មន្ត្រីនគរបាល ដោយផ្តន្ទាទោសលោកពីបទរក្សាទុកនិងប្រើប្រាស់អាវុធខុសច្បាប់ជំនួសវិញ។
ចៅក្រម ច័ន្ទ រង្សី បានមានប្រសាសន៍កាលពម្សិលមិញថា ការផ្តន្ទាទោសលោក ស ចន្ថាថា ក៏ត្រូវបានតម្កល់ដែរ។
លោក ស៊ុន ប៉ុណ្ណារិទ្ធ មេធាវីការពារលោក ឈូក បណ្ឌិត បានមានប្រសាសន៍បន្ទាប់ពីតុលាការកំពូលចេញសេចក្តីសម្រេចថា តុលាការកំពូលមិនបានពិចារណា “អង្គហេតុពិតប្រាកដ” នៃសំណុំរឿងនេះឲ្យបានល្អិតល្អន់ទេ។ លោកមានប្រសាសន៍ទៀតថា ” លោក ឈូក បណ្ឌិត កូនក្តីរបស់ខ្ញុំមិនបានបាញ់ជនរងគ្រោះទាំងនោះទេ។ តាមរយៈការតម្កល់សាលដីកាផ្តន្ទាទោសនេះបង្ហាញថា តុលាការមិនបានពិចារណាអំពីអង្គហេតុពិតប្រាកដទេ។ វាអយុត្តិធម៌ណាស់សម្រាប់កូនក្តីរបស់ខ្ញុំ”។
លោក ស៊ុន ប៊ុណ្ណារិទ្ធ បានមានប្រសាសន៍ថា លោកនឹងពិចារណាជំហានបន្ទាប់ នៅពេលទទួលបានសេចក្តីសម្រេចផ្លូវការពីតុលាការកំពូល។ លោកបានបន្ថែមថា លោកមិនដឹងថា កូនក្តីរបស់លោកកំពុងលាក់ខ្លួននៅទីណាទេ។ លោកបានបន្តថា “ខ្ញុំមិនដឹងថា គាត់នៅទីណាទេ បើខ្ញុំដឹងខ្ញុំទូរស័ព្ទហៅគាត់ឲ្យចូលរួមការកាត់ក្តីនេះបាត់ទៅហើយ”។
កម្មការិនី នុត សាខន អាយុ២៥ឆ្នាំ ដែលក្នុងចំណោមកម្មការិនី រងការបាញ់ប្រហារពីលោក ឈូក បណ្ឌិត បាននិយាយបន្ទាប់ពីតុលាការកំពូលចេញសេចក្តីសម្រេចកាលពីថ្ងៃសុក្រថា បុរសដែលបាញ់នាងមួយគ្រាប់ពីក្រោយខ្នង បានគេចរួចពីពន្ធនាការដោយសារតែគាត់មានខ្នងបង្អែកក្រាស់។
នាងនិយាយទៀតថា “ខ្ញុំគិតថា លោក ឈូក បណ្ឌិត មានអ្នកមានអំណាចនៅពីក្រោយគាត់។ ពួកគេឲ្យគាត់នៅក្រៅពន្ធនាគារ។ បើគាត់ជាមនុស្សធម្មតា ម្លេ៉ះគាត់ត្រូវចាប់ខ្លួនជាយូរមកហើយ”។
កម្មការិនី កែវ នី អាយុ២២ឆ្នាំ ជាជនរងគ្រោះម្នាក់ទៀតបាននិយាយបន្ទាប់ពីតុលាការកំពូលចេញសេចក្តីសម្រេចនេះថា នៅក្នុងប្រទេសកម្ពុជាគ្មានតុលាការណាមួយអាចផ្តល់យុត្តិធម៌ដល់នាង និងជនរងគ្រោះជាមួយនាងបានឡើយ។ នាងនិយាយថា “ពីតុលាការខេត្តស្វាយវៀង មកដល់សាលាឧទ្ធរណ៍ និងរហូតដល់តុលាការកំពូល នៅតែគ្មានយុត្តិធម៌សម្រាប់យើង។ ដូច្នេះខ្ញុំអស់សង្ឃឹមហើយ ពីព្រោះយើងគឺជាអ្នកក្រ”។
នាង កែវ នី និយាយបន្តថា ជិតបីឆ្នាំបន្ទាប់ពីហេតុការណ៍បាញ់ប្រហារនោះ និងក្រោយពីប្រើគ្រប់មធ្យោបាយផ្លូវច្បាប់ នាងនៅតែភ័យខ្លាចចំពោះបុរសដែលបានបាញ់ប្រហារនាង។ នាងនិយាយថា “យើងភ័យខ្លាចលោក ឈូក បណ្ឌិត មកសងសឹកយើង”៕សុខុម