ជំនួយការម្នាក់ក្នុងចំណោមជំនួយការផ្ទាល់របស់លោក កឹម សុខា អនុប្រធានគណបក្សសង្គ្រោះជាតិ ប្រឈមនឹងវិធានការវិន័យពីគណបក្សប្រឆាំងមួយនេះ បន្ទាប់ពីជំនួយការរូបនេះបានចោទប្រកាន់លោក កឹម សុខា កាលពីថ្ងៃសៅរ៍ថាបានរិះគន់លោក សម រង្ស៊ី ប្រធានគណបក្សសង្គ្រោះជាតិថាមានជាប់ពាក់ព័ន្ធនៅក្នុងអំពើពុករលួយ។
ថ្លែងនៅក្នុងកិច្ចប្រជុំជាលើកដំបូងរបស់បណ្ដាញសង្គម ” ខ្មែរដើម្បីខ្មែរ” ដែលដឹកនាំដោយលោក កែម ឡី អ្នកវិភាគនយោបាយឯករាជ្យ លោកស្រី លក្ខណ៍ សុភាព ដែលបានចោទប្រកាន់គ្នាជាសាធារណៈជាមួយលោក កឹម សុខា កាលពីខែមុនបានលើកឡើងថា លោក កឹម សុខា បានធ្វើការរិះគន់ដូច្នេះអំឡុងកិច្ចប្រជុំគណៈកម្មាធិការអចិន្ត្រៃយ៍បក្សមួយ ដែលធ្វើឡើងនៅដើមខែនេះ។
លោកស្រីបានមានប្រសាសន៍ថា ” កាលពីថ្ងៃទី៥ [ខែធ្នូ] លោក កឹម សុខា បានរិះគន់ថា ក្នុងទឹកប្រាក់ចាប់ពីប្រហែល៣០ឬ៤០លានដុល្លារ លោក សម រស្ស៊ី បានយកអស់២០លានដុល្លារទៅហើយ។ ខ្ញុំមិនអាចចូលរួមនៅក្នុងសង្គមមួយដែលមានមេដឹកនាំប្រព្រឹត្តអំពើពុករលួយបានឡើយ”។
លោកស្រី សុភាព ដែលបានចូលរួមពាក់ព័ន្ធនៅក្នុងចលនាប្រឆាំងក្នុងប្រទេសកម្ពុជាចាប់តាំងពីលោក សម រង្ស៊ី បានបង្កើតគណបក្សជាតិខ្មែរកាលពីខែវិច្ឆិកា ឆ្នាំ១៩៩៥មក មិនបានរៀបរាប់អំពីការអះអាងរបស់លោកស្រីទេ ប៉ុន្តែបានលើកសរសើរលោក កែម ឡី ជាសាធារណៈចំពោះការបង្កើតចលនានយោបាយថ្មីរបស់លោក។
លោកស្រីបានមានប្រសាសន៍បន្តថា ” ខ្មែរដើម្បីខ្មែរ គឺជាចលនាមួយបង្កើតឡើងសម្រាប់ឲ្យគណបក្សទាំងអស់ប្ដូរបទបញ្ជាផ្ទៃក្នុងរបស់ខ្លួន ដើម្បីឈានទៅរកប្រជាធិបតេយ្យពិប្រាកដដោយគ្មានការរើសអើង និងដោយគ្មានការប្រកាន់បក្សពួកក្នុងនាមជាមេដឹកនាំ។ ពលរដ្ឋបានរងការឈឺចាប់ដោយសារមេដឹកនាំ”។
នៅពេលទាក់ទងកាលពីម្សិលមិញ លោកស្រី សុភាព បានលើកឡើងថា លោកស្រីមិនអាចរៀបរាប់អំពីការអះអាងរបស់លោកស្រីបានឡើយ។ លោកស្រីបានលើកឡើងទៀតថា អំឡុងកិច្ចប្រជុំកាលពីថ្ងៃទី៥ ខែធ្នូ លោក កឹម សុខា បានយកលោកស្រីធ្វើជាប្រភពនៃការអះអាងអំពីការប្រព្រឹត្តអំពើពុករលួយនេះ ប៉ុន្តែតាមការពិតទៅលោកស្រីមិនដឹងអ្វីឡើយ។
លោកស្រីបានពន្យល់ថា ” លោក កឹម សុខា បាននិយាយថា ខ្ញុំបានប្រាប់គាត់ថា លោក សម រង្ស៊ី បានយកប្រាក់ ហើយខ្ញុំមានការតក់ស្លុតអំឡុងកិច្ចប្រជុំដែលគាត់ឆ្លើយដាក់ខ្ញុំដូច្នេះ។ ខ្ញុំមិនដឹងអ្វីនោះទេ ហេតុដូច្នេះទើបខ្ញុំបដិសេធ”។
លោក សម រង្ស៊ី ដែលបច្ចុប្បន្ននៅក្នុងប្រទេសបារាំងបានបដិសេធមិនធ្វើអត្ថាធិប្បាយលើការអះអាងនេះទេកាលពីម្សិលមិញ ហើយបានបង្វែរសំណួរទៅលោក យឹម សុវណ្ណ អ្នកនាំពាក្យគណបក្សសង្គ្រោះជាតិ ដែលគេមិនអាចទាក់ទងបាន។
ទោះជាយ៉ាងណា លោក មុត ចន្ថា នាយខុទ្ទកាល័យរបស់លោក កឹម សុខា បានលើកឡើងថា លោកស្រី សុភាព ដែលនៅតែជាជំនួយការរបស់លោក កឹម សុខា នៅឡើយបានប្រឌិតរឿងនេះ ហើយថា មេដឹកនាំគណបក្សសង្គ្រោះជាតិកំពុងតែពិចារណាវិធានការវិន័យ។ លោកបានមានប្រសាសន៍ថា ” ខ្ញុំសូមបដិសេធយ៉ាងដាច់អហង្ការចំពោះការចោទប្រកាន់ដែលមានបំណងមិនល្អបែបនេះ។ តាមអ្វីដែលយើងបានដឹង គាត់កំពុងតែព្យាយាមរកច្រកចេញទៅកន្លែងផ្សេង ហើយចោទប្រកាន់គេឯង។ យើងមិនខ្វល់ខ្លាំងពេកទេអំពីការចោទប្រកាន់នេះ ប៉ុន្តែគណបក្សនឹងចាត់វិធានការវិន័យចំពោះគាត់”។
លោក មុត ចន្ថា បានមានប្រសាសន៍បន្ថែមថា ” មកទល់ពេលនេះ យើងមិនទាន់និយាយអ្វីអំពីការដកគាត់ចេញពីបក្ស ឬពីតំណែងជាជំនួយការផ្ទាល់នៅឡើយទេ ប៉ុន្តែនៅក្នុងគណបក្សមានបទបញ្ជាផ្ទៃក្នុង”។
លោកបានមានប្រសាសន៍បន្ថែមទៀតថា ” ប្រសិនបើគាត់គឺជាមន្ត្រីបក្សមួយរូប និងជាសមាជិកគណៈកម្មាធិការអចិន្ត្រៃយ៍ គាត់គួរតែបានឆ្លងកាត់ប្រព័ន្ធផ្ទៃក្នុងរបស់គណបក្ស ដើម្បីដាក់ ពាក្យបណ្ដឹង។ ដោយលើកឡើងរឿងអ្វីមួយជាសាធារណៈអ៊ីចឹង វារំលោភបទបញ្ជាផ្ទៃក្នុងបក្សយ៉ាងជាក់ស្ដែង។ ជាសមាជិកគណបក្សមួយរូប គាត់ត្រូវតែធ្វើតាមបទបញ្ជាផ្ទៃក្នុង។ ជាការពិតណាស់ គាត់មានសិទ្ធិនិយាយស្ដី ប៉ុន្តែគាត់គួរតែរកមធ្យោបាយដ៏ល្អបំផុតមួយដើម្បីតបត ជាជាងធ្វើការតបតដោយធ្វើការចោទប្រកាន់គ្មានមូលដ្ឋានបែបនេះ”។
លោក កែម ឡី អ្នកវិភាគនយោបាយឯករាជ្យមួយរូប ដែលបង្កើតបណ្ដាញសង្គម “ខ្មែរដើម្បីខ្មែរ” កាលពីខែតុលា បានលើកឡើងថា ការអះអាងរបស់លោកស្រី សុភាព គឺធ្វើឡើងជាលក្ខណៈឯកជន ហើយវាមិនឆ្លុះបញ្ចាំងអំពីទស្សនរបស់ក្រុមលោកឡើយ។
លោក កែម ឡី បានមានប្រសាសន៍ថា ” ខ្ញុំមិនដឹងទេថា តើព័ត៌មាននេះពិតឬមិនពិតនោះ ព្រោះខ្ញុំមិនបានតាមដានព័ត៌មាននេះឡើយ”។ លោកបានមានប្រសាសន៍បន្ថែមថា ” នៅក្នុងកិច្ចប្រជុំកាលពីម្សិលមិញ ខ្ញុំសង្កេតឃើញមានសមាជិកគណបក្សសង្គ្រោះជាតិយ៉ាងតិចចំនួនប្រាំនាក់មកចូលរួម។ ពួកគេមិនមែនជាសមាជិករបស់ “ខ្មែរដើម្បីខ្មែរ” ទេ នៅក្នុងនោះក៏រួមមានលោកស្រី សុភាព ដែលមិនមែនជាសមាជិក “ខ្មែរដើម្បីខ្មែរ” ផងដែរ ព្រោះគាត់នៅក្នុងគណបក្សសង្គ្រោះជាតិ។ ខ្ញុំមិនដឹងថា តើពួកគេគឺជាចារកម្មរបស់គណបក្សសង្គ្រោះជាតិឬមិនមែននោះទេ”។
ចាប់តាំងពីបង្កើតបណ្ដាញសង្គម “ខ្មែរដើម្បីខ្មែរ” មក លោក កែម ឡី បានប្រឈមនឹងការចោទប្រកាន់មួយចំនួនពីគណបក្សសង្គ្រោះជាតិថា លោកមានបំណងប្រែក្លាយក្រុមរបស់លោកទៅជាគណបក្សនយោបាយមួយមុនពេលការបោះឆ្នោតក្រុមប្រឹក្សាឃុំ-សង្កាត់នាខែកុម្ភៈ ឆ្នាំ២០១៧។ លោកបានលើកឡើងថា លោកគ្រាន់តែមានបំណងលើកកម្ពស់ប្រជាធិបតេយ្យតែប៉ុណ្ណោះ៕ ស៊ុយឈាង