មន្ត្រីតុលាការម្នាក់បាននិយាយកាលពីម្សិលមិញថា សាលាដំបូងខេត្តរតនគិរី កាលពីថ្ងៃសៅរ៍បានចោទប្រកាន់នាយប៉ុស្តិ៍ឃុំម្នាក់ និងមេបញ្ជាការកងយោធពលខេរមភូមិន្ទម្នាក់ពីបទអនុញ្ញាតឲ្យមានការកាប់ឈើខុសច្បាប់នៅក្នុងខេត្ត។
លោក ម៉ម វណ្ណដា ព្រះរាជអាជ្ញារងអមសាលាដំបូងខេត្តបានមានប្រសាសន៍នៅពេលនោះថា លោក ពយ ច្រូច នាយប៉ុស្តិ៍ឃុំប៉ក់ញ៉ៃ ស្រុកអូរយ៉ាដាវ និងលោក រ៉ូចំ អែម មេបញ្ជាការការពារព្រំដែននៃកងយោធពលខេរមភូមិន្ទក្នុងឃុំសេសាន ត្រូវបានចាប់ខ្លួនកាលពីថ្ងៃសុក្រ ដោយសង្ស័យពីបទ ” ជាប់ពាក់ព័ន្ធ ” ក្នុងការកាប់ឈើខុសច្បាប់។
លោក ជ័យ មាលា ចៅក្រមស៊ើបសួរបានមានប្រសាសន៍កាលពីម្សិលមិញថា កាលពីថ្ងៃសៅរ៍ លោកទាំងពីរត្រូវបានចោទប្រកាន់តាមមាត្រា៩៨ និងមាត្រា១០០នៃច្បាប់ស្តីពីព្រៃឈើក្នុងប្រទេសកម្ពុជា ហើយកំពុងត្រូវឃុំខ្លួនបណ្ដោះអាសន្ន។
លោកចៅក្រម មាលា បានមានប្រសាសន៍ថា ” យើងបានសម្រេចឃុំខ្លួនជនសង្ស័យទាំងពីរ ហើយឥឡូវនេះពួកគាត់ស្ថិតក្នុងពន្ធនាគារខេត្ត ដើម្បីរង់ចាំការស៊ើបអង្កេត”។
លោកបានបន្ថែមថា លោកទាំងពីរប្រឈមនឹងការជាប់ពន្ធនាគាររហូតដល់៥ឆ្នាំ ប្រសិនបើត្រូវបានរកឃើញពិរុទ្ធភាព។
មាត្រា ៩៨ នៃច្បាប់ស្តីពីព្រៃឈើចែងពីបទឧក្រិដ្ឋពាក់ព័ន្ធការប្រមូលអនុផលព្រៃឈើខុសច្បាប់ រីឯមាត្រា ១០០ ចែងពីអាជ្ញាធររដ្ឋដែល ” អនុញ្ញាតឲ្យមានការធ្វើអាជីវកម្មព្រៃឈើដោយផ្ទាល់ ឬដោយប្រយោល”។
កាលពីថ្ងៃសុក្រ លោក ឆាយ ធី អ្នកស៊ើបអង្កេតនៅអង្គការសិទ្ធិមនុស្សអាដហុកប្រចាំខេត្តនេះ បានមានប្រសាសន៍ថា លោកទាំងពីរត្រូវគេដឹងថា ជាប់ពាក់ព័ន្ធក្នុងការជួញដូរឈើទៅប្រទេសវៀតណាម ហើយត្រូវបានចាប់ខ្លួនបន្ទាប់ពីអ្នកកាប់ឈើជនជាតិវៀតណាមប្រាំមួយនាក់ដែលត្រូវបានឃុំខ្លួនកាលពីខែវិច្ឆិកា បានសារភាពប្រាប់អាជ្ញាធរថា លោកទាំងពីរបានអនុញ្ញាតឲ្យពួកគេកាប់ឈើក្នុងទឹកដីកម្ពុជា៕ សារុន