ក្រុមប្រឆាំងដែលបច្ចុប្បន្ននេះ មេដឹកនាំរបស់ខ្លួនកំពុងប្រឈមការបើកសវនាការជំនុំជម្រះពីបទមានផែនការផ្ដួលរំលំរដ្ឋាភិបាល បានយល់ព្រមចំពោះសំណើរបស់ក្រសួងមហាផ្ទៃឲ្យប្ដូរឈ្មោះ បាវចនា និងរូបសញ្ញានៃសំណើសុំបង្កើតគណបក្សនយោបាយរបស់ខ្លួន ដោយសង្ឃឹមថា នឹងទទួលបានការយល់ព្រមពីរដ្ឋាភិបាល។
លោក សួន សេរីរដ្ឋា ប្រធានចលនាអំណាចពលរដ្ឋខ្មែរដែលនិរទេសខ្លួនឯង និងបុរសបីនាក់ទៀតដែលកំពុងជាប់ឃុំក្នុងពន្ធនាគារក្នុងប្រទេសកម្ពុជា ប្រឈមនឹងការចោទប្រកាន់នៅសាលាដំបូងរាជធានីភ្នំពេញ ពីបទមានផែនការផ្ដួលរំលំរដ្ឋាភិបាល និងរារាំងការបោះឆ្នោត ជាការចោទប្រកាន់ដែលពួកគេបានបដិសេធ។
បើទោះណាជាលោកនាយករដ្ឋមន្ត្រី ហ៊ុន សែន បានចាត់ទុកចលនាអំណាចពលរដ្ឋខ្មែរជាអង្គការភេរវកម្មក៏ដោយ ក៏ក្រសួងមហាផ្ទៃកាលពីដើមខែនេះបានលើកឡើងថា ខ្លួននឹងពិចារណាផ្ដល់ការយល់ព្រមចំពោះការដាក់ពាក្យសុំរបស់ក្រុមនេះក្នុងការបង្កើតគណបក្សនយោបាយ ប្រសិនបើក្រុមនេះមានការផ្លាស់ប្ដូរខ្លះៗ។ កាលពីម្សិលមិញ ក្រុមនេះបានលើកឡើងថា ខ្លួននឹងដាក់ពាក្យសុំទៅក្រសួងមហាផ្ទៃ។
លោក សៀង សុភារក្ស អ្នកនាំពាក្យចលនានេះបានលើកឡើងតាមទូរស័ព្ទថា ” មានគណបក្សនយោបាយដែលមានស្រាប់ឈ្មោះ គណបក្សអំណាចពលរដ្ឋខ្មែរ ដូច្នេះយើងបានប្ដូរឈ្មោះពីគណបក្សអំណាចពលរដ្ឋខ្មែរទៅជាគណបក្សអំណាចខ្មែរ”។
របាយការណ៍មួយដែលចលនាអំណាចពលរដ្ឋខ្មែរបានបង្ហោះតាមប្រព័ន្ធអុីនធើណិតកាលពីម្សិលមិញ លើកឡើងថា ក្រុមនេះក៏បានយល់ព្រមប្ដូរបាវចនារបស់គណបក្សពី “ជាតិ សាសនា វីរជន” ទៅជា ” ជាតិ សេរីភាព វីរជន”។ នៅក្នុងរូបសញ្ញារបស់គណបក្សគឺរូបព្រះវិស្ណុឈរលើនាគ នឹងត្រូវជំនួសដោយវីរបុរសសម័យអង្គរ ដែលចលនានេះមិនបាននិយាយថា ជាវីរបុរសរូបណាឡើយ ឈរនៅលើនាគនោះ។ រូបថតអង្គរវត្តនៅក្នុងរូបសញ្ញានឹងត្រូវជំនួសដោយរូបឥន្ទ្រីស។
លោក សុភារក្ស បានមានប្រសាសន៍ថា ” យើងបានយកការដាក់ពាក្យសុំចាស់របស់យើងមកធ្វើការកែតម្រូវខ្លះៗ ហើយយើងនឹងចុះឈ្មោះម្ដងទៀត”។ លោកបានបន្ថែមថា លោករំពឹងថា នឹងដាក់ពាក្យសុំជាថ្មីទៅក្រសួងមហាផ្ទៃប្រហែលជានៅសប្ដាហ៍នេះ។
នៅពេលលោក សួន សេរីរដ្ឋា បានប្រកាសជាសាធារណៈលើកដំបូងអំពីគម្រោងរបស់លោកថានឹងបង្កើតគណបក្សនយោបាយកាលពីខែមេសានោះ លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា ឱកាសរបស់គាត់មានតិចតួចណាស់ ដោយពិចារណាទៅលើការដែលថា គាត់កំពុងត្រូវបានតាមចាប់ខ្លួន។
សាលាដំបូងរាជធានីភ្នំពេញគ្រោងប្រកាសសាលក្រមនៅក្នុងរឿងក្ដីរបស់គាត់នៅខែក្រោយ។ លោក សួន សេរីរដ្ឋា កំពុងស្ថិតនៅបរទេសនៅឡើយ ហើយលោកកំពុងប្រឈមនឹងសវនាការផ្ដន្ទាទោសកំបាំងមុខ។
លោកបានអំពាវនាវជាចំហឲ្យ មានការបះបោរដើម្បីផ្ដួលរំលំលោក ហ៊ុន សែន ប៉ុន្តែបានបដិសេធថា មិនបានប្រើអំពើហិង្សាទេ៕ សារុន