39.8 C
Phnom Penh

ជនជាតិ​តៃវ៉ាន់​ពីរ​នាក់​ត្រូវ​បាន​ផ្ដន្ទាទោស​ឲ្យ​ជាប់​ពន្ធនាគារ​រយៈពេល​២០​ឆ្នាំ​ពីបទ​រក្សាទុក​ថ្នាំញៀន​អុិចស្តាស៊ី

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ សាលា​ដំបូង​រាជ​ធានី​ភ្នំពេញ​​​​បាន​ផ្ដន្ទាទោស​បុរស​ជនជាតិ​តៃវ៉ាន់​ចំនួន​ពីរ​នាក់​ឲ្យ​ជាប់​ពន្ធនាគារ​ម្នាក់ៗ​រយៈ​ពេល​២០​ឆ្នាំ ពីបទ​រក្សា​ទុក​ និង​ប្រើ​ប្រាស់​ថ្នាំញៀន​​ប្រភេទ​អុិចស្តាស៊ី​​ ក្រោយ​ពេល​នគរ​បាល​បាន​ចាប់​ខ្លួន​ពួកគេ​នៅ​ក្នុង​សណ្ឋាគារ​មួយ​កាលពី​ខែ​មករា ហើយ​​បាន​បង្គាប់​ឲ្យ​និរទេស​​ពួកគេ​ទៅ​​ប្រទេស​​របស់​ខ្លួន​វិញ បន្ទាប់ពីអនុវត្ត​ជាប់​ពន្ធនាគារ​ចប់​សព្វគ្រប់។

បុរស​ជនជាតិ​តៃវ៉ាន់ទី៣ ដែល​ពាក់​ព័ន្ធ​នៅ​ក្នុង​ករណី​នេះ​​ត្រូវ​បាន​ផ្ដន្ទាទោស​ឲ្យ​ជាប់​ពន្ធនាគារ​​រយៈ​ពេល​១ឆ្នាំ​ពីបទ​ប្រើ​ប្រាស់​ថ្នាំញៀន​ប្រភេទ​នេះ។

យោង​តាម​នគរ​បាល​បាន​ឲ្យ​ដឹង​ថា Lin Luy Chi អាយុ​៣៣​ឆ្នាំ និង​ Wupo Tsang អាយុ​២៩​ឆ្នាំ ត្រូវ​បាន​ចាប់​ខ្លួន​កាលពី​ថ្ងៃ​ទី​២៣ ខែ​មករា នៅ​សណ្ឋាគារ​ភ្នំពេញ​​ ក្នុង​ខណ្ឌដូនពេញ​ ជាទី​ដែល​ពួកគេ​ទើប​តែ​​​​ទៅ​យក​​ថង់​​ប្លាស្ទិក​មួយ​ ដែល​មាន​ថ្នាំ​ញៀន​ប្រភេទ​អុិចស្តាស៊ី​​​​ប្រមាណ​៣.០០០ក្រាម ដោយ​មាន​បំណង​យក​ថង់​នេះ​ទៅ​កាន់​សណ្ឋាគារ​អាស៊ី​នៅ​ក្បែរ​នោះ ជា​ទី ដែល​ពួកគេ​ស្នាក់​នៅ​ជា​មួយ​ជនជាតិ​តៃវ៉ាន់ទី៣ឈ្មោះ Chen Yung Lin។

ចៅក្រម​ប្រធាន​ក្រុម​ប្រឹក្សា​ជំនុំជម្រះ​ កែវ មុនី បាន​ប្រកាស​នៅ​ក្នុង​តុលាការ​កាលពី​​ម្សិល​មិញ​ថា លោក Lin និង លោក Wupo ត្រូវ​បាន​ផ្ដន្ទាទោស​ឲ្យ​ជាប់ពន្ធនាគារ​ម្នាក់​ៗ​រយៈ​ពេល​២០ឆ្នាំ ហើយ​ពិន័យ​ជាប្រាក់​ចំនួន​៦០​លាន​រៀល (ប្រហែល​១៥.០០០ដុល្លារ) រីឯ​លោក Cheng វិញ​នឹង​ត្រូវ​ជាប់​ពន្ធនាគារ​រយៈ​ពេល​១ឆ្នាំ​។

ចៅក្រម​ មុនី បាន​មាន​ប្រសាសន៍​ថា ” តុលាការ​បាន​បង្គាប់​ឲ្យ​​និរទេស​ Lin Luy Chi Wupo Tsang និង Chen Yung Lin ពី​ព្រះរាជាណាចក្រ​កម្ពុជា​ បន្ទាប់ពី​ពួកគេ​​អនុវត្ត​ទោស​ជាប់​ពន្ធនាគារ​ចប់​សព្វគ្រប់​”។

អំឡុង​ពេល​បើក​សវនាការ​​កាលពី​ថ្ងៃទី​១៩​ ខែ​វិច្ឆិកា លោក Lin បាន​លើកឡើង​ថា មិត្ត​ភក្ដិ​ម្នាក់​នៅ​កោះតៃវ៉ាន់​​បាន​​ហៅ​ទូរស័ព្ទ​មក​ខ្លួន ហើយ​ប្រាប់​ខ្លួន​ឲ្យ​ទៅ​ទទួល​យក​ថង់ប្លាស្ទិក​មួយ​ពី​បុរស​ជនជាតិ​ខ្មែរ​ម្នាក់ ហើយ​យក​វា​ទៅ​ទុក​ក្នុង​បន្ទប់​មួយ​នៅ​សណ្ឋាគារ​ភ្នំពេញ​។ ដោយ​សារ​តែ​ខ្លួន​ជាប់​រវល់​លេងល្បែង​ស៊ីសង​នៅ​កាស៊ីណូ ខ្លួន​បាន​ឲ្យ​លោក​ Wupo ធ្វើ​ការ​នេះ​ជំនួស​​។

លោក Lin បាន​និយាយ​ពេល​បើក​សវនាការ​ថា ” ខ្ញុំ​មិន​ដឹង​ថា មាន​អ្វី​នៅ​ក្នុង​កញ្ចប់​​នោះ​ឡើយ”។ លោក​បាន​បន្ថែម​ថា នៅ​ពេល​មិត្តភក្ដិ​​នៅ​កោះ​តៃវ៉ាន់​បាន​ហៅ​ទូរស័ព្ទ​មក​ម្ដង​ទៀត​​ពីរបីថ្ងៃ​ក្រោយ​​ដើម្បី​ប្រាប់​ថា ​ខ្លួន​មិន​អាច​មក​ប្រទេស​កម្ពុជា​ដើម្បី​យក​ថង់​នេះ​បាននោះ លោក​​​និង​​លោក Wupo បាន​ត្រឡប់​ទៅ​សណ្ឋាគារ​នេះ​ម្ដង​ទៀត​ដើម្បី​យក​ថង់​នោះមក​ទុក​នៅ​​សណ្ឋាគារ​អាស៊ី ត្រង់​ចំណុច​នេះ​​ហើយ​ដែល​នគរ​បាល​បាន​ចាប់​ខ្លួន​ពួកគេ។

លោក Lin និង​លោក Wupo ដែល​ក៏​បាន​បដិសេធ​ថា មិន​ដឹង​ថា​មាន​អ្វី​នៅ​ក្នុង​ថង់​នេះ​នោះ បាន​លើក​ឡើង​ថា នគរ​បាល​បាន​បង្ខំ​ឲ្យ​ខ្លួន​នាំ​​ទៅ​កាន់​​បន្ទប់​របស់​ខ្លួននៅ​ក្នុង​សណ្ឋាគារ​អាស៊ី ជា​ទី​ដែល​លោក Chen ក៏​ត្រូវ​បាន​ចាប់​ខ្លួន​ដែរ​នោះ៕ ស៊ុយឈាង​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស