យោងតាមអាជ្ញាធរមូលដ្ឋានបានឲ្យដឹងថា បុរសជនជាតិខ្មែរម្នាក់ត្រូវបានគេបាញ់ឲ្យរងរបួសកាលពីថ្ងៃអាទិត្យ ខណៈកំពុងកាប់ឈើដោយខុសច្បាប់នៅក្នុងទឹកដីថៃ ក្រោយពេលឆ្លងកាត់ព្រំដែនពីខេត្តបាត់ដំបង។ ហេតុការណ៍នេះបានកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីរដ្ឋមន្ត្រីក្រសួងការពារជាតិរបស់ប្រទេសថៃបានលើកឡើងថា ប្រទេសរបស់លោកគ្មានបំណងបាញ់ប្រហារពលរដ្ឋខ្មែរឡើយ។
លោក លី ប៊ួយ អធិការនគរបាលស្រុកសំឡូតបានឲ្យដឹងកាលពីម្សិលមិញថា លោក ណាត ស៊ីនួន អាយុ៣៤ឆ្នាំ ត្រូវទាហានការពារព្រំដែនថៃបាញ់ត្រូវចំត្រង់ពោះ ខណៈគាត់កំពុងកាប់ឈើនៅក្នុងទឹកដីថៃ។
លោក លី ប៊ូយ ដែលបានលើកឡើងថា លោកសង្ស័យថា ជនរងគ្រោះគឺជាទាហាននោះបានមានប្រសាសន៍ថា ” យើងទទួលបានសេចក្ដីរាយការណ៍ ប៉ុន្តែយើងមិនបានជួបជាមួយអ្នកភូមិរងរបួសម្នាក់នេះទេ ព្រោះសាច់ញាតិរបស់គាត់បានបញ្ជូនគាត់ទៅព្យាបាលនៅមន្ទីរពេទ្យយោធាខេត្តបាត់ដំបងបាត់ហើយ។ គាត់បានរងរបួសធ្ងន់”។
លោក អ៊ាម សេងអឿន មេបញ្ជាការមូលដ្ឋានកងរាជអាវុធហត្ថស្រុកបានអះអាងថា លោក ស៊ីនួន មិនមែនជាទាហានទេ ដោយលោកបានបង្វែរសំណួរបន្ថែមទៅលោក ប្រាក់ ថាន មន្ត្រីទំនាក់ទំនងនៅច្រកព្រំដែន ដែលបានលើកឡើងថា លោកគ្មានព័ត៌មានផ្លូវការអំពីករណីនេះនោះ។
ក្នុងមួយឆ្នាំៗ ពលរដ្ឋខ្មែររាប់សិបនាក់ត្រូវកងសន្តិសុខថៃបាញ់ប្រហារ ហើយជាទូទៅការបាញ់ប្រហារទាំងនេះបានកើតឡើងខណៈពួកគេកំពុងកាប់ឈើខុសច្បាប់ក្នុងទឹកដីថៃ។ អំឡុងពេលមកបំពេញទស្សនកិច្ចផ្លូវរដ្ឋមួយកាលពីសប្ដាហ៍មុន លោក ប្រាវីដ វង្សស៊ូវ៉ាន (Prawit Wongsuwan) រដ្ឋមន្ត្រីក្រសួងការពារជាតិថៃបានលើកឡើងថា រាល់ការបាញ់ប្រហារទាំងអស់សុទ្ធតែគ្មានចេតនា ” ប៉ុន្តែវាមានការយល់ច្រឡំ ហើយយើងត្រូវការធ្វើការជាមួយគ្នាដើម្បីដោះស្រាយបញ្ហានេះ”៕ ស៊ុយឈាង