27 C
Phnom Penh

គណបក្ស​សង្គ្រោះ​ជាតិ​បង្ហាញ​ពី​ចំណុច​ជាប់​គាំង​ចំនួន​បួន​នៅ​ក្នុង​ការ​ចរចា​ធ្វើ​កំណែទម្រង់​

ដោយ ឌឹ ខេមបូឌា ដេលី

បទវិភាគ

ប្រធាន​​​​ក្រុម​​ការងារ​មក​ពី​គណបក្ស​សង្គ្រោះ​ជាតិ ទទួល​បន្ទុក​ចរចា​​ធ្វើកំណែទម្រង់​បោះ​ឆ្នោត​ជាមួយ​គណបក្ស​ប្រជាជន​កម្ពុជា​កំពុង​កាន់​អំណាច ​បាន​មាន​ប្រសាសន៍​បន្ទាប់ពី​​ជំនួប​ចរចា​​របស់​ក្រុម​ការ​ងារ​​ទាំង​ពីរ​គណបក្ស​នៅ​ឯ​រដ្ឋសភា​កាលពី​ថ្ងៃ​សុក្រ​ថា គណបក្ស​ទាំង​ពីរ​មិនទាន់​ឈាន​ដល់​ការ​ព្រមព្រៀង​គ្នា​លើ​បញ្ហា​ចំនួន​បួន នៅ​ក្នុង​ការ​ធ្វើ​សេចក្ដី​ព្រាង​​ច្បាប់​​​បោះ​ឆ្នោតថ្មី។

លោក គួយ ប៊ុនរឿន ​ប្រធាន​​ក្រុម​ការងារ​​មកពី​គណបក្ស​សង្គ្រោះ​ជាតិ ​បាន​​ប្រាប់​ក្រុម​អ្នក​យកព័ត៌មាន​ថា គណបក្ស​ប្រឆាំង​​កំពុង​ជំរុញ​ឲ្យ​​បង្កើត​ចំនួន​អាសនៈ​សភា ការ​ចេញ​ប័ណ្ណ​បោះ​ឆ្នោត​ ការ​ការ​ពារ​រឹង​មាំ​ដើម្បី​បញ្ជាក់​អត្តសញ្ញាណ​អ្នក​បោះ​ឆ្នោត និង​សិទ្ធិ​សម្រាប់​អ្នក​បោះ​ឆ្នោត​ពី​​​បរទេស​។

លោក​បាន​លើក​ឡើង​ថា ឧបនាយករដ្ឋមន្ត្រី ប៊ិន​ ឈិន ប្រធាន​ក្រុម​ការងារ​​​មក​ពី​គណ​បក្ស​ប្រជាជន​កម្ពុជា ​បាន​ជំទាស់​​ចំណុច​ទាំង​អស់​នេះ​។ លោក​​មាន​ប្រ​សាសន៍​ថា” ដូច្នេះ យើង​ទុក​បញ្ហា​ទាំង​អស់​នេះ​ឲ្យ​ថ្នាក់​លើ​ជា​អ្នកសម្រេច ហើយ​យើង​នឹង​បន្ត​ពិភាក្សា​លើ​មាត្រា​ផ្សេងៗ​ទៀត ដើម្បី​ពន្លឿន​ការ​ចរចា​”។

លោក​បាន​បន្ត​ថា គណបក្ស​ទាំង​ពីរ​​​មាន​ការ​វិវឌ្ឍ​ខ្លះ​ហើយ​ជុំវិញ​ថា តើ​អ្នក​បោះ​ឆ្នោត​នឹង​ត្រូវ​ចុះឈ្មោះ​ដោយ​របៀប​ណា​សម្រាប់​ការ​បោះ​ឆ្នោត​នាពេល​អនាគត។

គណបក្ស​កាន់​អំណាច​ចង់​អនុញ្ញាត​​ឲ្យ​អ្នក​បោះ​ឆ្នោត​ប្រើ​ប្រាស់​អត្តសញ្ញាណ​ប័ណ្ណ​ដែល​រដ្ឋាភិបាល​ចេញ​ឲ្យ ចំណែក​ឯ​គណបក្ស​ប្រឆាំង​វិញ​ចង់​ឲ្យ​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប.) ចេញ​ប័ណ្ណ​បោះ​ឆ្នោត​​ដោយ​មាន​ស្នាម​ផ្ដិត​មេដៃ និង​រូប​ថត​​សម្រាប់​ការ​បញ្ជាក់​។

គណបក្ស​ប្រឆាំង​និយាយ​ថា ការ​ប្រើ​ប្រាស់​អត្តសញ្ញាណ​ប័ណ្ណ​គឺមិន​គ្រប់​គ្រាន់​ទេ ពីព្រោះ​​ប្រជាពលរដ្ឋ​ច្រើន​ណាស់​ដែល​មិន​​ទាន់​មាន​វា ជា​បញ្ហា​មួយ​ដែល​លោក​ ប៊ិន ឈិន មាន​ប្រសាសន៍​ថា អាច​ចៀស​វាង​បាន​។ លោក​មាន​ប្រសាសន៍​ថា គណបក្ស​ប្រជាជន​កម្ពុជា​បាន​ស្នើ​ឲ្យ​អនុញ្ញាត​អ្នក​ដែល​គ្មាន​អត្តសញ្ញាណ​ប័ណ្ណ​បង្ហាញ​វត្តមាន​នៅ​តាម​ឃុំ​-សង្កាត់​អម​ជាមួយ​ប្រជាពលរដ្ឋ​ពីរ​នាក់ ដែល​មាន​​ក្រដាសស្នាម​បញ្ជាក់​​អត្តសញ្ញាណ​ត្រឹម​ត្រូវអាច​បញ្ជាក់​ពី​​​​ទីលំនៅដ្ឋាន​របស់​ពួកគេ​បាន​។

នៅ​ក្នុងការ​បោះ​ឆ្នោត​ជ្រើស​តាំង​តំណាង​រាស្ត្រ​កាលពី​ឆ្នាំ​២០១៣ គណបក្ស​សង្គ្រោះ​ជាតិ​បាន​អះអាង​ថា មន្ត្រី​ឃុំ-សង្កាត់​​របស់​គណបក្ស​ប្រជាជន​កម្ពុជា ​ភាគច្រើន​​បាន​ប្រើ​ប្រាស់​បញ្ជី​ឈ្មោះ​បោះ​ឆ្នោត​ដើម្បី​កេង​ចំណេញ​បម្រើ​ឲ្យ​ផល​ប្រយោជន៍​របស់​គណបក្ស​កាន់​អំណាច​ ដោយ​អនុញ្ញាត​ឲ្យ​មនុស្ស​មួយ​ចំនួន​បោះ​ឆ្នោត​ច្រើន​ដង និង​ធ្វើ​ឲ្យ​ប្រជា​ពល​រដ្ឋ​​ជា​ច្រើន​​​ទៀត​គ្មាន​ឈ្មោះ​នៅ​ក្នុង​បញ្ជី​។

កាលពី​ថ្ងៃពុធ គ.ជ.ប.​ បាន​ចេញ​សេចក្ដី​ថ្លែងការណ៍មួយ​ស្ដីពី​បញ្ជី​ឈ្មោះ​បោះ​ឆ្នោត​ដែល​ត្រូវ​បាន​ធ្វើ​បច្ចុប្បន្ន​ភាព​សម្រាប់​ឆ្នាំ​២០១៤។ បញ្ជី​ដែល​ត្រូវ​បាន​ពិនិត្យ​ផ្ទៀង​ផ្ទាត់​​ដែល​មាន​អ្នក​បោះ​ឆ្នោត​សរុប​​ចំនួន៩.៨០១.៥៣៥​​នេះ ​មាន​ឈ្មោះ​ចំនួន​១០៨​.៨០០​ត្រូវ​បាន​លុប​ចេញ និង​ឈ្មោះ​ចំនួន​១៧៧​.៨០៤​ត្រូវ​បាន​បញ្ចូល​បន្ថែម​៕ សុខុម​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស