លោក យ៉ែម បុញ្ញឫទ្ធិ សមាជិកសភាគណបក្សសង្គ្រោះជាតិ ដែលជាប្រធានគណៈកម្មការអប់រំ កីឡា និងសាសនា នៅរដ្ឋសភាបានមានប្រសាសន៍កាលពីម្សិលមិញថា លោកនឹងធ្វើដំណើរទៅភ្នំបូកគោ ស្ថិតក្នុងខេត្តកំពតនៅខែក្រោយនេះ ដើម្បីពិនិត្យមើលផ្នូរជនជាតិវៀតណាម ដែលគេលើកឡើងថា ជាកន្លែងទាក់ទាញភ្ញៀវទេសចរវៀតណាម។
ព័ត៌មានមួយចំនួនដែលបង្ហោះតាមប្រព័ន្ធផ្សព្វផ្សាយសង្គមកាលពីប៉ុន្មានខែមុន បានលើកឡើងពីជនជាតិវៀតណាមមកទស្សនាទីសក្ការ និងផ្នូរនៅលើភ្នំបូកគោ ដែលតាមធម្មតាមានការលើកឡើងថា ការធ្វើបែបនេះមានផលប៉ះពាល់អវិជ្ជមានដល់វប្បធម៌ខ្មែរ។
លោក បុញ្ញឫទ្ធិ បានមានប្រសាសន៍កាលពីម្សិលមិញថា លោកមិនទាន់ច្បាស់អំពីការអះអាងតាមបណ្ដាញផ្សព្វផ្សាយសង្គមឡើយ ប៉ុន្តែលោកនឹងដឹកនាំគណៈកម្មការរបស់លោកទៅភ្នំនោះ ដើម្បីធ្វើការស៊ើបអង្កេត។ លោកបានមានប្រសាសន៍ថា “យើងនឹងទៅពិនិត្យមើលកន្លែងនេះ។ ខ្ញុំគ្រាន់តែទទួលបានព័ត៌មាននេះ បន្ទាប់ពីមនុស្សពីរបីនាក់បានលើកឡើងពីបញ្ហានេះតាមរយៈទូរស័ព្ទដៃ និងបណ្ដាញសង្គមតែប៉ុណ្ណោះ”។
លោក បុញ្ញឫទ្ធិ បានបដិសេធមិនធ្វើអត្ថាធិប្បាយបន្ថែមអំពីគម្រោងធ្វើដំណើរនោះទេ ដែលលោកលើកឡើងថា នឹងចាប់ផ្ដើមនៅថ្ងៃទី១១ និងទី១២ ខែកុម្ភៈ ហើយថា លោកនឹងរង់ចាំរហូតដល់គណៈកម្មការរបស់លោកទៅពិនិត្យកន្លែងនោះដើម្បីធ្វើការសន្និដ្ឋានអំពីបញ្ហានោះសិន។
លោក ខូយ ឃុនហួរ អភិបាលខេត្តកំពតបានរិះគន់គម្រោងធ្វើដំណើររបស់លោក បុញ្ញឫទ្ធិ ដោយពន្យល់ថា គ្មានផ្នូរជនជាតិវៀតណាមនៅលើភ្នំបូកគោទេ ប៉ុន្តែថា ភ្ញៀវទេសចរវៀតណាមមួយចំនួនគ្រាន់តែឡើងទៅលើភ្នំនោះដើម្បីបួងសួងតែប៉ុណ្ណោះ។
លោក ឃុនហួរ បានមានប្រសាសន៍ថា “មិនមានផ្នូរបែបនោះឡើយ។ នេះគឺជាបញ្ហាចាស់តែប៉ុណ្ណោះ ហើយអ្នកដែលស្រឡាញ់ជាតិមិនត្រូវនិយាយអំពីរឿងនេះទេ ពីព្រោះវាគ្មានប្រយោជន៍។ អ្វីដែលគេបានលើកឡើងអំពីផ្នូរជនជាតិវៀតណាមនោះ ធ្វើឲ្យយើងទទួលបានផលប្រយោជន៍”។ លោក ឃុនហួរ បានមានប្រសាសន៍ពីភ្ញៀវទេសចរជនជាតិវៀតណាម ដែលមកកម្សាន្តនៅភ្នំនោះថា “វាជាការធម្មតាទេសម្រាប់ពួកគេក្នុងការមកបួងសួងនោះ”។
ជនជាតិវៀតណាមគឺជាភ្ញៀវទេសចរដែលមកកម្សាន្តនៅប្រទេសកម្ពុជាច្រើនបំផុតច្រើនឆ្នាំមកហើយ បន្ទាប់ពីការមកកម្សាន្តរបស់ជនជាតិចិនកាន់តែច្រើនឡើងក្នុងរយៈពេលប៉ុន្មានឆ្នាំថ្មីៗនេះ។
លោក សំ អ៊ុក អធិការនគរបាលស្រុកទឹកឈូ ជាស្រុកដែលភ្នំបូកគោស្ថិតនៅនោះ បានមានប្រសាសន៍ថា លោក បុញ្ញឫទ្ធិ មិនទាន់បានជូនដំណឹងពីការធ្វើដំណើររបស់លោកនៅឡើយទេ ប៉ុន្តែនគរបាលនឹងជួយសម្របសម្រួលការធ្វើដំណើររបស់សមាជិកសភារូបនេះ។ លោកបានមានប្រសាសន៍ថា “យើងមិនទាន់បានទទួលព័ត៌មានអ្វីនៅឡើយទេ។ ប៉ុន្តែអាជ្ញាធរ និងកម្លាំងរបស់យើងនឹងផ្ដល់ការការពារប្រសិន បើថ្នាក់ដឹកនាំណាម្នាក់មកទស្សនកិច្ចកន្លែងនេះ”៕ សារុន