ពីរសប្តាហ៍បន្ទាប់ពីជនស្វែងរកសិទ្ធិជ្រកកោនម៉ុងតាញ៉ា១៣នាក់បានមកដល់ក្រុងភ្នំពេញ ដើម្បីដាក់ពាក្យសុំឋានៈជនភៀសខ្លួន ប៉ូលិសបាននិយាយកាលពីថ្ងៃអាទិត្យថា ពួកគេកំពុងស្វែងរកសមាជិកប្រាំនាក់ទៀតនៃជនជាតិដើមភាគតិចវៀតណាម ដែលបានឆ្លងចូលខេត្តរតនគិរីកាលពីថ្ងៃសៅរ៍។
អធិការស្រុកអូរយ៉ាដាវ លោក ជួប វ៉ាន់ណារៈ បាននិយាយថា កសិករមូលដ្ឋានបានរាយការណ៍ថា ជនម៉ុងតាញ៉ាមួយក្រុមមានគ្នាប្រាំនាក់កំពុងលាក់ខ្លួនក្នុងព្រៃ ហើយថា គាត់បានចាត់ឲ្យមន្ត្រីរបស់គាត់ស្វែងរកពួកគេហើយ។
លោក វ៉ាន់ណារៈ បាននិយាយថា “យើងមិនទាន់ប្រាកដ ថាតើពួកគេប្រាកដជាជនម៉ុងតាញ៉ា មែនឬយ៉ាងណាទេ ប៉ុន្តែយើងបានដាក់ប៉ូលិសមួយចំនួនដើម្បីស្វែងរកអ្នកទាំងនោះហើយ”។
លោក រ៉ូម៉ាស ឡឺត ជាជនជាតិចារ៉ាយ ដែលជាក្រុមកុលសម្ពន្ធមួយក្នុងចំណោមកុលសម្ពន្ធភ្នំ៣០ក្រុមដែលបង្កើតបានជាក្រុមម៉ុងតាញ៉ា រស់នៅក្នុងឃុំប៉ាកហាយ បាននិយាយថា មន្ត្រីជាង៣០នាក់ត្រូវបានដាក់ពង្រាយក្នុងស្រុកនោះកាលពីថ្ងៃសៅរ៍ ប៉ុន្តែមិនទាន់បានចាប់ផ្តើមស្វែងរកក្រុមនេះនៅឡើយទេរហូតដល់រសៀលថ្ងៃអាទិត្យនេះ។ លោក ឡឺត បាននិយាយថា “ប៉ូលិសបានសួរខ្ញុំថាតើខ្ញុំមានលាក់ម៉ុងតាញ៉ាឬទេ។ ខ្ញុំបានឆ្លើយថា ទេ។
អ្នកភូមិចារ៉ាយម្នាក់ទៀត ដែលសុំមិនប្រាប់ឈ្មោះព្រោះខ្លាចមានការសងសឹកបាននិយាយថា ជនជាតិភាគតិចម៉ុងតាញ៉ាប្រាំនាក់បានមកដល់ខេត្តរតនៈគិរីកាលពីថ្ងៃសៅរ៍។ អ្នកភូមិរូបនេះបានឲ្យដឹងទៀតថា “ជនជាតិភាគតិចម៉ុងតាញ៉ាប្រាំនាក់បានប្រាប់យើងថា ពួកគេបានរត់ភៀសខ្លួនពីប្រទេសវៀតណាមមកប្រទេសកម្ពុជា ពីព្រោះអាជ្ញាធររបស់ពួកគេបានធ្វើបាបពួកគេដោយសារតែជាគ្រិស្ទសាសនិក”។ គាត់បាននិយាយថា “យើងបានចាត់តាំងអ្នកភូមិពីរនាក់ដើម្បីមើលថែមនុស្សប្រាំនាក់ ដែលកំពុងស្នាក់នៅក្នុងកន្លែងសុវត្ថិភាពមួយក្នុងព្រៃនោះ”។
អ្នកភូមិរូបនេះជាជនជាតិចារ៉ាយមួយក្រុមដែលបានផ្តល់ជម្រកនិងអាហារដល់មនុស្សមួយក្រុមដំបូងមានគ្នា១៣នាក់ ដែលសមាជិករបស់អ្នកទាំងនោះក៏បានអះអាងថាបានរត់ភៀសខ្លួនពីការធ្វើទុក្ខបុកម្នេញដែរ។
បន្ទាប់ពីការលាក់ខ្លួនពីរខែ មន្ត្រីអង្គការសហប្រជាជាតិមួយក្រុមបានជួបក្រុមនេះ និងបានបញ្ជូនមកក្រុងភ្នំពេញ ហើយនាយកដ្ឋានអន្តោប្រវេសន៍ក្រសួងមហាផ្ទៃនឹងកំណត់ថាតើពួកគាត់បំពេញបានតាមលក្ខណៈវិនិច្ឆ័យសម្រាប់ឋានៈជនភៀសខ្លួនឬទេ។
លោកស្រី វីវៀន តាន (Vivian Tan) មន្ត្រីផ្នែកព័ត៌មានប្រចាំតំបន់នៅការិយាល័យឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានឲ្យដឹងតាមរយៈអីុម៉េលកាលពីថ្ងៃអាទិត្យថា ការិយាល័យរបស់លោកស្រីនឹងពិនិត្យរបាយកាណ៍អំពីក្រុមម៉ុងតាញ៉ាថ្មីនេះ។
លោកស្រី តាន បានមានប្រសាសន៍ថា “ខ្ញុំគិតថា នៅពេលនេះយើងមិនទាន់ទទួលបានព័ត៌មានផ្ទាល់ ហើយយើងនឹងពិនិត្យមើលរបាយការណ៍នេះជាមួយដៃគូអង្គការសហប្រជាជាតិរបស់យើង”។
លោក ឆាយ ធី អ្នកសម្របសម្រួលនៅអង្គការសិទ្ធិមនុស្សអាដហុកប្រចាំខេត្តនេះ ដែលបានធ្វើការការពារអ្នកស្វែងរកសិទ្ធិជ្រកកោនម៉ុងតាញ៉ាក្នុងពេលកន្លងមក បានមានប្រសាសន៍ថា អ្នកភូមិចារ៉ាយខ្មែរបានប្រាប់លោកអំពីក្រុមជនជាតិភាគតិចម៉ុងតាញ៉ាចុងក្រោយនេះ។ លោក ធី មានប្រសាសន៍ថា “យើងមិនមានផែនការជួបជនម៉ុងតាញ៉ាទាំងនោះទេ ប៉ុន្តែខ្ញុំបានជូនព័ត៌មានអង្គការសហប្រជាតិ និងបានសុំអន្តរាគមន៍”។
ក្រុមជនជាតិភាគតិចម៉ុងតាញ៉ារស់នៅផ្តុំគ្នានៅខ្ពង់រាបកណ្តាលប្រទេសវៀតណាមនិងត្រូវបានរដ្ឋាភិបាលវៀតណាមធ្វើទុក្ខបុកម្នេញជាយូរមកហើយ ព្រោះតែបានគាំទ្រទាហានបារាំងនិងទាហានអាមេរិក អំឡុងសង្គ្រាមឥណ្ឌូចិនលើកទី១និងលើកទី២។
ពួកគេប្រកាន់ជំនឿសាសនាគ្រិស្ទនិកាយប្រូតេស្តង់ដែលត្រូវរដ្ឋាភិបាលក្រុងហាណូយដាក់ឲ្យនៅក្រៅច្បាប់ដែរ និងប្រើជាលេសមួយដើម្បីឆ្នក់ចូលឆែកឆេរព្រះវិហារគ្រិះម៉ុងតាញ៉ា និងធ្វើការចាប់ខ្លួនបន្ទាប់ពីមានការតវ៉ាអំពីសិទ្ធិដីធ្លីនិងសិទ្ធិសាសនា ដែលផ្ទុះឡើងកាលពីឆ្នាំ២០០១។
ការឆ្មក់ចូលឆែកឆេរនិងចាប់ខ្លួនបណ្តាលឲ្យជនម៉ុងតាញ៉ារាប់ពាន់នាក់ភៀសខ្លួនមកប្រទេសកម្ពុជានៅរវាងឆ្នាំ២០០១និងឆ្នាំ២០១១ ដើម្បីស្វែងរកឋានៈជាជនភៀសខ្លួន។ ទោះជាយ៉ាងនេះក្តី នៅទីបញ្ចប់មនុស្សប្រហែល២.០០០នាក់បានតាំងទីលំនៅថ្មីនៅសហរដ្ឋអាមេរិក មនុស្សជាច្រើននាក់ទៀតត្រូវបានបញ្ជូនទៅប្រទេសវៀតណាមវិញ ដែលនៅទីនោះតាមសេចក្តីរាយការណ៍ ពួកអ្នកទាំងនោះត្រូវបានគេដាក់ពន្ធនាគារនិងធ្វើទារុណកម្ម។មានិត