កាលពីម្សិលមិញ នគរបាលខេត្តត្បូងឃ្មុំបានរារាំងអ្នកតវ៉ាមួយក្រុមមានគ្នាប្រហែល១០០នាក់ ដែលជាប់ពាក់ព័ន្ធវិវាទដីធ្លីក្នុងមូលដ្ឋានកុំឲ្យទៅជិតលោកនាយករដ្ឋមន្ត្រី ហ៊ុន សែន ដែលលោកបានចុះទៅកាន់តំបន់នោះដើម្បីបើកការដ្ឋានសាងសង់អគាររដ្ឋបាលសាលាខេត្តថ្មី។
អ្នកភូមិប្រហែល៥០០នាក់នៅស្រុកមេមត់ ក្នុងខេត្តនេះបានចោទប្រកាន់ដីសម្បទានរបស់ក្រុមហ៊ុនចម្ការកៅស៊ូមេមត់ ថាបានរំលោភយកដីទំហំប្រហែល២០ហិកតា ដែលពួកគាត់លើកឡើងថា ពួកគាត់បានរស់នៅតាំងពីឆ្នាំ១៩៨០ ជាឆ្នាំបន្ទាប់ពីការដួលរលំរបបខ្មែរក្រហម។
អ្នកភូមិជាច្រើនគ្រួសារអាចសាងសង់ផ្ទះសំបែងរបស់ខ្លួនរហូតមកទល់ពេលនេះ ប៉ុន្តែពួកគាត់កំពុងទាមទារប័ណ្ណកម្មសិទ្ធិកាន់កាប់ដីរបស់ខ្លួន។
ក្រុមអ្នកភូមិទទួលបានព័ត៌មានពីគម្រោងរបស់លោក ហ៊ុន សែន មកចូលរួមបើកការដ្ឋានសាងសង់អគាររដ្ឋបាលសាលាខេត្តស្ថិតក្នុងខេត្តត្បូងឃ្មុំ ដូច្នេះពួកគាត់បានធ្វើដំណើរតាមរថយន្តវ៉ែនពីរគ្រឿង និងម៉ូតូជាច្រើនគ្រឿងកាលពីព្រឹកម្សិលមិញ ដោយសង្ឃឹមថា នឹងដាក់ពាក្យបណ្ដឹងរបស់ពួកគាត់ទៅលោកនាយករដ្ឋមន្ត្រីដោយផ្ទាល់ ហើយសុំឲ្យលោកជួយ។
យោងតាមអ្នកស្រី អ៊ុន សុចេង ជាអ្នកតវ៉ាម្នាក់បានឲ្យដឹងថា ទោះជាយ៉ាងណា នគរបាលប្រហែល៨០នាក់បានបិទផ្លូវរបស់ពួកគាត់។
អ្នកស្រីបាននិយាយថា នគរបាលបានឃាត់ដំណើររបស់ពួកគាត់ចំនួនពីរលើកតាមផ្លូវជាតិលេខ៧ មុនពេលពួកគាត់ទៅកាន់ស្រុកមេមត់ ប៉ុន្តែទីបំផុតបានអនុញ្ញាតឲ្យពួកគាត់បន្តដំណើរទាំងពីរលើកនោះ មុនពេលឃាត់ពួកគាត់ជាលើកទី៣ម្ដងទៀត។
អ្នកស្រីបាននិយាយថា “ពួកគេបានរារាំងពួកយើង ពីព្រោះពួកគេមិនចង់ឲ្យលោកនាយករដ្ឋមន្ត្រីឃើញការឈឺចាប់របស់យើង…។ ពួកគេបារម្ភថា យើងអាចបង្កបញ្ហាដល់ពួកគេ។ ពួកគេបានរំលោភសិទ្ធិរបស់យើង ហើយព្យាយាមលាក់បាំងទង្វើអាក្រក់របស់ខ្លួនពីលោកនាយករដ្ឋមន្ត្រី”។
អ្នកស្រី សុឆេង បាននិយាយថា នគរបាលបានណែនាំឲ្យពួកគាត់ព្យាយាមទៅជួបលោក ហ៊ុន សែន នៅរាជធានីភ្នំពេញជំនួសវិញ។ អ្នកស្រីបាននិយាយថា ” យើងគ្រាន់តែចង់បានប័ណ្ណកម្មសិទ្ធិដីរបស់យើងតែប៉ុណ្ណោះ ពីព្រោះយើងបានរស់នៅទីនោះយូរមកហើយ”។
ច្បាប់ភូមិបាលក្នុងប្រទេសកម្ពុជាផ្ដល់សិទ្ធិកាន់កាប់ដីធ្លីដល់អ្នកដែលអាចបង្ហាញពីកម្មសិទ្ធិមកដល់ឆ្នាំ១៩៩៦ ឬមុននោះ។
លោក ចេង ប៉ុណ្ណារ៉ា អភិបាលស្រុកមេមត់បានមានប្រសាសន៍ថា លោកបានបញ្ជាឲ្យមន្ត្រីរបស់លោករារាំងកុំឲ្យអ្នកតវ៉ាចូលទៅកន្លែងបើកការដ្ឋាន ពីព្រោះពួកគាត់មិនត្រូវបានអញ្ជើញទេ។ លោកបានមានប្រសាសន៍ថា “មានមនុស្សប្រហែល១០០នាក់មកសុំឲ្យលោកនាយករដ្ឋមន្ត្រីជួយអន្តរាគមន៍ និងផ្ដល់ប័ណ្ណកម្មសិទ្ធិដីធ្លីដល់ពួកគាត់។ ប៉ុន្តែដោយសារយើងមិនបានអញ្ជើញពួកគាត់ ហើយយើងបារម្ភពីសុវត្ថិភាពរបស់ថ្នាក់ដឹកនាំ យើងបានរារាំងពួកគាត់មិនឲ្យចូលក្នុងពិធីនោះ”៕ សារុន