28 C
Phnom Penh

ជនជាតិ​ភាគ​តិច​ម៉ុងតាញ៉ា​ចំនួន​ប្រាំ​នាក់​ទៀត​កំពុង​លាក់​ខ្លួន​នៅ​ក្នុង​ខេត្ត​រតនគិរី​​នៅ​ឡើយ​

ដោយ ឌឹ ខេមបូឌា ដេលី

បទវិភាគ

អ្នកភូមិ​ម្នាក់​ដែល​មើល​ថែ​ក្រុម​ជនជាតិ​ភាគតិច​ម៉ុង​តាញ៉ា​បាន​ឲ្យ​ដឹង​កាលពី​ម្សិលមិញ​ថា អ្នកស្វែង​រក​សិទ្ធិ​ជ្រក​កោន​​​ជនជាតិ​ភាគតិច​ម៉ុង​តាញ៉ា​​ចំនួន​ប្រាំនាក់​ ដែល​ឆ្លង​ព្រំដែន​ពី​ប្រទេស​​​វៀតណាម​ចូល​មក​ខេត្ត​រតនគិរី​កាលពី​ថ្ងៃ​សៅរ៍ ​កំពុង​លាក់​ខ្លួន​នៅ​ឡើយ ខណៈ​ពួកគេ​​រង់ចាំ​ទទួល​​ដំណឹង​ពី​​អង្គការ​​សហប្រជាជាតិ​សហប្រជាជាតិ​ថា តើ​​ពួកគេ​នឹង​ត្រូវ​បញ្ជូន​ទៅ​រាជ​ធានី​ភ្នំពេញ​ឬយ៉ាង​ណា។

ជនជាតិ​ភាគតិច​ម៉ុង​តាញ៉ា​​ទាំង​ប្រាំ​នាក់​នេះ បាន​​មក​ដល់​ខេត្ត​រតនគិរី​ ខណៈ​ជនជាតិ​ភាគ​តិច​ម៉ុងតាញ៉ា​ចំនួន​១៣​នាក់ កំពុង​ត្រូវ​បាន​សាកសួរ​នៅ​ក្នុង​រាជធានី​ភ្នំពេញ ដោយ​នាយក​ដ្ឋាន​អន្តោប្រវេសន៍​​នៅ​ក្រសួង​មហាផ្ទៃ​ ដែល​នឹង​កំណត់​ថា តើ​ពួកគេ​​​មាន​លក្ខណៈ​សម្បត្តិ​គ្រប់​គ្រាន់​ដើម្បី​ទទួល​បាន​សិទ្ធិ​ជាជន​ភៀស​ខ្លួន​ឬក៏អត់​។ ក្រុម​ជនជាតិ​ភាគតិច​ម៉ុង​តាញ៉ា​ទំាង​នេះ​ជា​ក្រុម​ជនជាតិ​ភាគតិច​ដែល​​​ប្រមូលផ្ដុំគ្នា​រស់​នៅ​ក្នុង​តំបន់​ខ្ពង់រាប​ភាគ​កណ្ដាល​ប្រទេស​វៀតណាម​ និង​ដែល​បាន​គេច​ខ្លួន​មក​ប្រទេស​កម្ពុជា​កាលពី​ឆ្នាំ​មុន​។

អ្នកភូមិ​​ជនជាតិ​ដើម​ភាគតិច​ចារ៉ាយ​ម្នាក់​រស់​នៅ​ក្នុង​ខេត្ត​រតនគិរី ដែល​ស្នើ​សុំ​​មិន​បញ្ចេញ​ឈ្មោះ ព្រោះ​ខ្លាច​ក្រែង​មាន​ការ​ធ្វើ​ទុក្ខ​បុកម្នេញ​ពី​អាជ្ញាធរ​​បាន​ឲ្យ​ដឹង​កាលពី​ម្សិលមិញ​ថា ក្រុម​អ្នក​ស្វែង​រក​សិទ្ធិ​ជ្រក​កោន​ចុង​ក្រោយ​នេះ​កំពុង​​ស្នាក់​នៅ​ “កន្លែង​មាន​សុវត្ថិភាព​”។

អ្នកភូមិ​រូប​នេះ​បាន​និយាយ​ថា “ខ្ញុំ​ចង់​ស្នើ​ឲ្យ​ UNHCR និង​រដ្ឋាភិបាល​​សង្គ្រោះ​​អ្នក​ទាំង​នេះ​​ពី​ក្នុង​ព្រៃ​ឲ្យ​បាន​ឆាប់​ ព្រោះ​​ពួកគេ​កំពុង​​ជួប​ការ​ខ្វះ​ខាត​ស្បៀង​អាហារ និង​​មូស​ខាំ​”។

លោកស្រី វីវៀន តាន (Vivian Tan) មន្ត្រី​ផ្នែក​ព័ត៌មាន​ប្រចាំ​តំបន់​​នៅ​​​ការិយាល័យ​ឧត្ដម​ស្នង​ការ​អង្គការ​សហប្រជាជាតិ​​ទទួល​បន្ទុក​ជន​ភៀស​ខ្លួន (UNHCR) បាន​លើក​ឡើង​ថា ការិយាល័យ​របស់​លោកស្រី​កំពុង​​ធ្វើ​ការ​​នៅ​ឡើយ​ដើម្បី​បញ្ជាក់​ថា អ្នក​ទាំង​ប្រាំ​នាក់​នេះ​កំពុង​ស្វែង​រក​​សិទ្ធិ​ជ្រក​កោន​នៅ​ក្នុង​ប្រទេស​កម្ពុជា​។

លោកស្រី​​បាន​សរសេរ​នៅ​ក្នុង​អុីម៉េល​មួយ​ថា ​”UNHCR ​​មិន​អាច​បញ្ជាក់​​ពី​សេចក្ដី​រាយការណ៍​ណាមួយ​ឡើយ​ ហើយ​គ្មាន​ផែន​ការ​​ធ្វើ​ដំណើរ​ទៅ​កាន់​តំបន់​ដែល​គេ​បាន​រាយការណ៍​នេះ​ឡើយ​ក្នុង​ពេល​ភ្លាមៗ​នេះ​”។

លោក ថោង សាវុន អភិបាល​ខេត្ត​រតនគិរី​បាន​លើក​ឡើង​ថា លោក​មិន​បាន​ទទួល​ដំណឹង​​ណាមួយ​អំពី​ក្រុម​នេះ​​ទេ​ ប៉ុន្តែ​បាន​គំរាម​ដាក់​ពាក្យ​ប្ដឹង​​អ្នក​យក​ព័ត៌មាន​​​ម្នាក់ ប្រសិន​បើ​​អ្នក​យក​ព័ត៌មាន​រូប​នេះ​​​លាក់​បាំង​ព័ត៌មាន​អំពី​កន្លែង​លាក់​ខ្លួន​របស់​ក្រុម​នេះ។ លោក​បាន​មាន​ប្រសាសន៍​ថា “ប្រសិន​បើ​អ្នកឯង​លាក់​មនុស្ស​ទាំង​នោះ ខ្ញុំ​នឹង​​ដាក់​ពាក្យ​ប្ដឹង​អ្នក​ឯង​តាម​រយៈ​អង្គការ​អាដហុក”។

លោក ជួប វណ្ណារក្ស អធិការ​នគរ​បាល​ស្រុក​អូរយ៉ាដាវ​​បាន​លើក​ឡើង​​កាលពី​ថ្ងៃ​អាទិត្យ​ថា លោក​បាន​បញ្ជូន​មន្ត្រី​របស់​លោក​ឲ្យ​ទៅ​តាម​ស្វែង​​រក​​ជនជាតិ​ភាគតិច​ម៉ុងតាញ៉ា​ទាំង​នេះ​ហើយ។ នៅ​ពេល​ទាក់​ទង​កាលពី​ម្សិលមិញ លោក​បាន​បដិសេធ​មិន​ព្រម​​ធ្វើ​អត្ថាធិប្បាយ​នោះ​ទេ។

លោក ឆាយ ធី អ្នក​សម្រប​សម្រួល​នៅ​អង្គការ​សិទ្ធិ​មនុស្ស​អាដហុក​ប្រចាំ​ខេត្ត​​នេះ​បាន​លើក​ឡើង​ថា លោក​​ទទួលបាន​ការ​ហៅ​ទូរស័ព្ទ​ពី​មន្ត្រី​ស្ថានទូត​អាមេរិក​ម្នាក់ ដែល​សួរ​អំពី​អ្នក​ទាំង​ប្រាំ​នាក់​នេះ។

នៅ​ពេល​សួរ​ថា តើ​ហេតុ​អ្វី​បាន​ជា​​ស្ថានទូត​អាមេរិក​​​​ចង់​បាន​ដំណឹង​អំពី​ជនជាតិ​ភាគ​តិច​ម៉ុងតាញ៉ា ហើយ​ថាតើ​ស្ថានទូត​មានបាន​ពិភាក្សា​អំពី​ករណី​នេះ​ជាមួយ​រដ្ឋាភិបាល​កម្ពុជា​ហើយ​ឬនៅ លោក​ស្រី Courtney Wood អ្នកនាំពាក្យ​រង​របស់​ស្ថានទូត​​នេះ​បាន​បដិសេធ​មិន​ព្រម​ឆ្លើយ​សំណួរ​ឡើយ​។ លោកស្រី​បានមាន​ប្រសាសន៍​ថា “សហរដ្ឋអាមេរិក​នៅ​តែ​មាន​ក្ដី​ព្រួយបារម្ភ​យ៉ាង​ខ្លាំង​​អំពី​ការ​ការ​ពារ​អ្នក​ស្វែង​រក​សិទ្ធិ​ជ្រក​កោន និង​ជនអន្តោប្រវេសន៍​ងាយ​រងគ្រោះ”៕ ស៊ុយឈាង​ (រាយការណ៍​បន្ថែម​ដោយ Chris Mueller)​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស