32 C
Phnom Penh

នគរ​បាល​​បំបែក​​​ក្រុម​អ្នក​ភូមិ​ដែល​​ប្រវាយ​ប្រតប់​គ្នា​​ដោយ​សារ​​វិវាទ​ដីធ្លី​នៅ​ក្នុង​រាជ​ធានី​ភ្នំពេញ​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ អ្នក​តវ៉ា​​​ប្រហែល​៥០​នាក់​​បាន​ប្រឈម​មុខ​ដាក់​គ្នា​ជាមួយ​អ្នក​ភូមិ​ម្នាក់​​ដោយ​សារ​វិវាទ​ដីធ្លីមួយ​ដែល​បាន​​អូស​បន្លាយ​ពេល​រាប់​ឆ្នាំ​​ជុំវិញ​ដី​តិច​ជាង​១ហិកតា​នៅ​ក្នុង​ខណ្ឌសែន​សុខ រាជធានី​ភ្នំពេញ ដោយ​បាន​ប្រវាយ​ប្រតប់​គ្នា​មួយ​ប្រាវ​មុន​ពេល​អាជ្ញាធរ​មូលដ្ឋាន​សន្យា​ជួយ​ដោះ​ស្រាយ​វិវាទ​នេះ។front

អ្នកស្រី ព្រីង សុជាតិ ​​ជា​អ្នក​តវ៉ា​ម្នាក់​ក្នុង​ចំណោម​អ្នក​តវ៉ា​ទាំង​នេះ​បាន​និយាយ​ថា អ្នកស្រី​​និង​អ្នក​តវ៉ា​ផ្សេង​ទៀត​ តំណាង​ឲ្យ​ប្រជា​ពលរដ្ឋ​​១៦៣​គ្រួសារ​ដែល​កាលពី​ឆ្នាំ​២០១១ ត្រូវ​បាន​សាលា​ដំបូង​រាជធានី​ភ្នំពេញ​ សម្រេច​ផ្ដល់​ដីឡូត៍​មួយ​កន្លែង​​ទំហំ​៩.៩៨២​ម៉ែត្រក្រឡា បន្ទាប់ពី​មានក្តី​ក្តាំ​ឡើង​តុលាការ​អស់​រយៈ​ពេល​ជា​យូរ​ជាមួយ​ពាណិជ្ជករ​ក្នុង​ស្រុក​ម្នាក់។ ប៉ុន្តែ​អ្នក​ស្រី​និយាយ​ថា អ្នកស្រី ជា សារុំ ជា​អ្នក​ទទួល​សិទ្ធិ​ម្នាក់​ក្នុង​ចំណោម​អ្នក​ទទួល​សិទ្ធិ​​​កាន់​កាប់​ដីធ្លី​នេះ បាន​​អះអាង​កាន់​កាប់​​ដី​ទាំង​អស់​នោះ​តែ​ម្នាក់​ឯង ហើយ​មិន​ព្រម​​ឲ្យ​អ្នក​ផ្សេងតាំង​​លំនៅដ្ឋាន​ជាប់​ផ្ទះ​របស់​គាត់​ឡើយ​។

ទោះបីជា​សាលា​ឧទ្ធរណ៍​បាន​ចេញ​​សាល​ដីកា​កាលពី​ខែ​មិថុនា ហាម​ឃាត់​អ្នកស្រី ជា សារុំ មិន​ឲ្យ​លក់​ ឬជួល​ដីនោះ​ក្ដី ក៏អ្នក​តវ៉ា​ទាំង​នេះ​និយាយ​ថា គាត់​នៅ​តែ​បដិសេធ​មិន​ព្រម​ឲ្យ​ពួកគាត់​រើ​ចូល​ទៅ​រស​់​នៅ​​ទីនោះ។ ដោយ​ធុញ​ទ្រាន់​នឹង​ការ​រង់ចាំ​​ឲ្យ​តុលាការ​​ជួយ​រក​ដំណោះ​ស្រាយ​ ពួកគាត់​ក៏​បាន​ចុះ​ទៅ​ទីតាំង​ដីនោះ​កាលពី​ព្រឹក​ម្សិលមិញ ដោយ​នាំ​យក​​បង្គោល​​​ឈើ​​ទៅ​ជា​មួយ​ដែល​ពួកគាត់​មាន​បំណង​ប្រើ​ប្រាស់​សម្រាប់​​កំណត់​ព្រំប្រទល់​ចំណែក​ដី​ដែល​ពួកគាត់​ត្រូវ​បាន​ ប៉ុន្តែ​ក៏​ត្រូវ​​ប្រវាយប្រតប់​គ្នា​មួយ​ប្រាវ​ជាមួយ​អ្នកស្រី ជា សារុំ និង​សាច់ញាតិ​មួយ​ចំនួន​របស់​គាត់​ មុន​ពេល​នគរ​បាល​ និង​សន្តិសុខ​ខណ្ឌ​​អន្តរាគមន៍​បំបែក​ពួកគេ​ចេញ​ពីគ្នា​។

អ្នកស្រី​ ជា សុជាតិ​ និយាយ​ថា “យើង​មិន​អាច​​​នៅ​ស្ងៀម​ទៀត​បាន​ទេ បើ​​គាត់​​រក្សា​ទុក​ដីនោះ​ទាំង​អស់​តែម្នាក់​ឯង​ និង​ឲ្យ​ពួកយើង​រស់​នៅ​ខាង​ក្រៅ។ គាត់​ត្រូវ​តែ​ចែក​​ជាមួយ​ពួកយើង”។

ចំណែក​ឯ​អ្នកស្រី ជា សារុំ និយាយ​ថា អ្នក​តវ៉ា​ទាំង​នេះ​សុទ្ធ​តែ​ជា​ជន​បន្លំ​ខ្លួន ហើយ​មិន​ស្ថិត​ក្នុង​ចំណោម​ប្រជា​ពលរដ្ឋ​ទាំង​១៦៣​គ្រួសារដែល​តុលាការ​​សម្រេច​ប្រគល់​ដី​​នេះ​ឲ្យ​នោះ​ទេ។ គាត់​និយាយ​ថា ” ពួកគេ​ព្យាយាម​រំលោភ​ដី​របស់​ខ្ញុំ​ដោយ​គ្មាន​ការ​អនុញ្ញាត។ ខ្ញុំ​មិន​ស្គាល់​ពួកគេ​ទេ។ ប្រជាពលរដ្ឋ​ទាំង​១៦៣​គ្រួសារ​រស់​នៅ​ជាមួយ​ខ្ញុំ​រាល់​ថ្ងៃ ហើយ​អាជ្ញាធរ​​បាន​ប្រាប់​​ខ្ញុំ​នៅ​ថ្ងៃ​នេះ​ថា មិន​អនុញ្ញាត​ឲ្យ​អ្នក​ណា​ផ្សេង​ទៀត​មក​ទីនេះ​ទេ”។

លោក មូ ម៉ានិត អភិបាល​រង​ខណ្ឌ​សែន​សុខ ដែល​មាន​វត្តមាន​នៅ​កន្លែង​កើត​ហេតុ បាន​មាន​ប្រសាសន៍​ថា អាជ្ញាធរ​កំពុង​សហការ​ជាមួយ​សាលា​ដំបូង​រាជធានី​ភ្នំពេញ ដើម្បី​កំណត់​​ឲ្យ​ជាក់​លាក់​​​ថា តើ​អ្នក​ណា​​ខ្លះ​មាន​សិទ្ធិ​កាន់​កាប់​ដីនេះ។

លោក​បាន​មាន​ប្រសាសន៍​ទៀត​ថា “សាលា​រាជធានី​បាន​បង្កើត​ក្រុម​មួយ​ដើម្បី​​ធ្វើ​ការ​ស៊ើប​អង្កេត និង​ចែក​ដីនេះ​ជាមួយ​គ្រួសារ​ពិត​ប្រាកដ​ទាំង​១៦៣​គ្រួសារ។ សាលា​រាជធានី​បាន​ស្នើ​ឲ្យ​សាលា​ដំបូង​រាជធានី​ភ្នំពេញ​ផ្ដល់​ចំនួន និង​ឈ្មោះ​គ្រួសារ​​ដែល​ជា​ម្ចាស់​កម្មសិទ្ធិ​ដី​នេះ​មក​ឲ្យ​យើង​។ ថ្ងៃ​នេះ​ យើង​គ្រាន់​តែ​មក​ទប់​ស្កាត់​អំពើ​ហិង្សា​ប៉ុណ្ណោះ។ យើង​នឹង​មិន​អនុញ្ញាត​ឲ្យ​ពួកគាត់​រស់​នៅ​ទីនេះ​ទេ ព្រោះ​យើង​កំពុង​រង់ចាំ​ឲ្យ​សាលា​រាជធានី​ប្រគល់​​បញ្ជី​​ឈ្មោះ​គ្រួសារ​ទាំង​នេះ​មក​ឲ្យ​យើង។ ​បន្ទាប់​មក ​យើង​នឹង​ដោះស្រាយ​បញ្ហា​​នេះ”​៕ សុខុម​​​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស