31 C
Phnom Penh

ការ​ចាប់​ខ្លួន​ទាក់ទិន​នឹង​គ្រឿង​ញៀន​កើន​ឡើង​ក្នុង​ឆ្នាំ​២០១៤ ប៉ុន្តែ​ការ​ចាប់​បាន​ថ្នាំ​ញៀន​ថយ​ចុះ

ដោយ ឌឹ ខេមបូឌា ដេលី

បទវិភាគ

មន្ត្រី​ម្នាក់​បាន​និយាយ​កាលពី​ថ្ងៃ​អង្គារ​ថា ចំនួន​មនុស្ស​ដែល​ត្រូវចាប់​ខ្លួន​ទាក់ទិន​នឹង​បទ​ល្មើស​គ្រឿង​ញៀន​កាលពី​ឆ្នាំ​មុន​បាន​កើន​ឡើង​ស្ទើរ​តែ​ពីរ​ដង​បើប្រៀបធៀប​ទៅ​នឹង​ឆ្នាំ​២០១៣ ក៏​ប៉ុន្តែចំនួន​គ្រឿង​ញៀន​ដែល​ចាប់​បាន បាន​ថយ​ចុះ​ទៅ​វិញ។

ឧត្តមសេនីយ៍​ឯក មាស វីរិទ្ធ អគ្គលេខាធិការ​ នៃ​អាជ្ញាធរ​ជាតិ​ប្រយុទ្ធ​ប្រឆាំង​នឹង​គ្រឿង​ញៀន​បាន​មាន​ប្រសាសន៍​ថា ប៉ូលិស​បាន​ចាត់​វិធានការ​នឹង​ករណី​កើន​ឡើង​ក្នុង​ឆ្នាំ​២០១៤ ដែល​មាន​១.៣៣៩​ករណី​ធៀប​ទៅ​នឹង៨៨៩​ករណី​ក្នុង​ឆ្នាំ​មុន រីឯ​ចំនួន​មនុស្ស​ចាប់​ខ្លួន​បាន​កើន​ពី​១.៨៣០ក្នុង​ឆ្នាំ​២០១៣ ដល់​៣.១៣៨​កាលពី​ឆ្នាំ​មុន។

លោក​ឧត្តមសេនីយ៍​ឯក បាន​បន្ថែម​ថា ប៉ុន្តែ​គ្រឿងញៀន​តែ​៩០​គីឡូក្រាម​ប៉ុណ្ណោះ ក្នុង​នោះ​មាន​ទាំង​មេតំហ្វេតាមីន កូកាអិុន និង​ហេរ៉ូអិុន​ផង ត្រូវ​បាន​រឹបអូស​បាន​កាលពី​ឆ្នាំ​មុន ធៀប​ទៅ​នឹង​ចំនួន​១០០​គីឡូក្រាម​ក្នុង​ឆ្នាំ​២០១៣។

លោក​ឧត្តមសេនីយ៍​ឯក បាន​មាន​ប្រសាសន៍​ថា “មាន​កំណើន​[ក្នុង​ករណី]​ ពីព្រោះ​ប្រទេស​របស់​យើង​ជា​ប្រទេស​រងគ្រោះ ដែល​ពួក​ឧក្រិដ្ឋជន​ដឹក​ជញ្ជូន​និង​ចរាចរ​គ្រឿង​ញៀន ប៉ុន្តែ​គ្រឿង​ញៀន​មាន​នៅ​ជុំវិញ​ពិភព​លោក ហើយ​មិន​មែន​នៅ​តែ​ក្នុង​ប្រទេស​កម្ពុជា​ទេ”។

លោក មាស វីរិទ្ធ អគ្គលេខាធិការ នៃ​អាជ្ញាធរ​ជាតិ​ប្រយុទ្ធ​ប្រឆាំង​នឹង​គ្រឿង​ញៀន​បាន​មាន​ប្រសាសន៍​ថា ប៉ូលិស​បាន​អាក់​ខាន​ក្នុង​ការ​ចាប់​បាន​ច្រើន​ទៀត​ក្នុង​ឆ្នាំ​២០១៤ ដោយសារ​ប៉ូលិស​មមាញឹក​ពេក​ក្នុង​ការ​ដោះស្រាយ​ទាក់ទិន​នឹង​អ្នក​តវ៉ា ហើយ​ចាំបាច់​ត្រូវ​បណ្តុះ​បណ្តាល​បន្ថែម​ទៀត​ដើម្បីតាម​រក​ចាប់​ខ្លួន​ពួក​អ្នក​ជួញដូរ​គ្រឿងញៀន។

លោក​ឧត្តមសេនីយ៍​ឯក មាស វីរិទ្ធ បាន​មាន​ប្រសាសន៍​បន្ថែម​ថា “ឧក្រិដ្ឋកម្ម​គ្រឿង​ញៀន​គឺ​មិន​ដូចគ្នា​នឹង​ការ​កាប់​ឈើ​[ខុសច្បាប់]​ទេ ពីព្រោះ​គ្រឿញៀន​តូច​ ហើយ​មិន​ធំ​ដូច​ដើមឈើ​នោះ​ឡើយ ដូច្នេះ​យើង​មិន​អាច​មើល​ឃើញ​វា ឬ រក​វា​ឃើញ​ដោយ​ងាយ​ស្រួល​បាន​ឡើយ”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស