ក្រសួងបរិស្ថានបានលើកឡើងថា ខ្លួននឹងបញ្ជូនគណៈប្រតិភូមួយក្រុមទៅកាន់ខេត្តកោះកុង ដើម្បីព្យាយាមដោះស្រាយវិវាទដីធ្លីដ៏អូសបន្លាយមួយរវាងអ្នកភូមិ និងក្រុមហ៊ុនមួយរបស់ចិន បន្ទាប់ពីផ្ទុះអំពើហិង្សាវាយតប់គ្នារវាងអ្នកភូមិ និងសន្តិសុខក្រុមហ៊ុនកាលពីរសៀលម្សិលមិញ។
ក្រុមហ៊ុន Union Development Group (UDG) របស់ចិន បានបណ្ដេញប្រជាពលរដ្ឋជាង១.០០០គ្រួសាររួចទៅហើយ ដើម្បីបើកផ្លូវសម្រាប់គម្រោងអភិវឌ្ឍតំបន់ទេសចរណ៍មួយលើផ្ទៃដីទំហំ៤៥.០០០ហិកតា និងចំណាយអស់ទឹកប្រាក់៣,៨ពានលានដុល្លារ ដែលខ្លួនបានអភិវឌ្ឍនៅកណ្ដាលឧទ្យានជាតិបទុមសាគរចាប់តាំងពីឆ្នាំ២០១០មក។ ប្រជាពលរដ្ឋប្រមាណ៣០គ្រួសារ នៅតែតស៊ូប្រឆាំងនឹងក្រុមហ៊ុនដើម្បីរក្សាផ្ទះសំបែងរបស់ខ្លួន។
អ្នកស្រី ទេស សៀងហា៊ង តំណាងប្រជាពលរដ្ឋដែលត្រូវបណ្ដេញចេញ បាននិយាយថា ក្រុមហ៊ុន UDG បានចាប់ផ្ដើមចាក់អាចម៍ដីលើផ្លូវឆ្ពោះទៅភូមិរបស់ពួកគាត់ក្នុងស្រុកគិរីសាគរ កាលពីថ្ងៃទី២៣ ខែធ្នូ ដើម្បីបង្ខំឲ្យពួកគាត់រើចេញ។ អ្នកស្រីនិយាយទៀតថា ជាការឆ្លើយតប អ្នកភូមិទាំងនេះបានបិទផ្លូវធំឆ្ពោះទៅផែសាធារណៈក្នុងមូលដ្ឋាន ដោយសង្ឃឹមថា នឹងបញ្ចុះបញ្ចូលរដ្ឋាភិបាលឲ្យបង្ខំក្រុមហ៊ុន UDG បញ្ឈប់សកម្មភាពរបស់ខ្លួន។
អ្នកស្រីនិយាយទៀតថា “យើងបានសម្រេចចិត្តបិទផ្លូវ [ឆ្ពោះទៅផែ] ដោយសារតែអភិបាលស្រុកមិនព្រមអន្តរាគមន៍សម្អាតផ្លូវ ដែលអ្នកភូមិប្រើប្រាស់រាល់ថ្ងៃ”។
អ្នកស្រីនិយាយថា នៅពេលរថយន្តមួយគ្រឿងរបស់ក្រុមហ៊ុន UDG បង្ហាញវត្តមានកាលពីម្សិលមិញ ដើម្បីចាក់អាចម៍ដីបន្ថែមបិទផ្លូវចូលទៅកាន់ភូមិ អ្នកភូមិបានប្រមូលផ្ដុំគ្នាឃាត់រថយន្តទី២មិនឲ្យចាក់អាចម៍ដី ហើយនៅពេលនោះ សន្តិសុខប្រហែល៣០នាក់ដែលធ្វើការឲ្យក្រុមហ៊ុននេះ ក៏បានចូលអន្តរាគមន៍។ អំឡុងពេលប្រើហិង្សាដាក់គ្នា អ្នកភូមិបានគប់គ្រាប់បែកសាំងទៅលើរថយន្តទាំងនោះ ហើយសន្តិសុខបានគប់ដុំថ្មទៅលើអ្នកភូមិ។ អ្នកស្រីបានបន្តថា “អ្នកភូមិបួននាក់បានរងរបួសស្រាលអំឡុងពេលប៉ះទង្គិចគ្នាជាមួយសន្តិសខុ ដែលប្រើដុំថ្មគប់ទៅលើអ្នកភូមិ”។
លោក ខែម ចណ្ឌី អភិបាលស្រុកគិរីសាគរបានមានប្រសាសន៍កាលពីម្សិលមិញថា អាជ្ញាធរមូលដ្ឋានបានព្យាយាមបញ្ចុះបញ្ចូលអ្នកភូមិឲ្យឈប់បិទផ្លូវចូលទៅភូមិ ប៉ុន្តែមិនបានផល។ មុនពេលបង្វែរសំណួរបន្ថែមទៀតទៅក្រសួងបរិស្ថាន លោកបានមានប្រសាសន៍ថា “យើងមិនទាន់ចាត់វិធានការតាមផ្លូវច្បាប់នៅឡើយទេ ពីព្រោះខ្ញុំកំពុងរង់ចាំបញ្ជាពីថ្នាក់ដឹកនាំកំពូល”។
លោក សាយ សំអាល់ រដ្ឋមន្ត្រីក្រសួងបរិស្ថានបានមានប្រសាសន៍ថា លោកនឹងបញ្ជូនក្រុមការងារមួយក្រុមទៅកាន់តំបន់នោះ ដើម្បីព្យាយាមដោះស្រាយវិវាទនេះ ប៉ុន្តែមិនបានមានប្រសាសន៍ថា បញ្ជូនទៅពេលណាឲ្យប្រាកដទេ។ លោកបានមានប្រសាសន៍ថា “ក្រុមហ៊ុន UDG បានចាក់ដីបិទផ្លូវ ប៉ុន្តែយើងក៏ទទួលបានពាក្យបណ្ដឹងដែរថា អ្នកភូមិកំពង់បិទផ្លូវ។ ករណីនេះមានភាពស្មុគស្មាញ ហើយយើងកំពុងដោះស្រាយរឿងនេះ”៕ សុខុម