កាលពីម្សិលមិញ លោក ហេង សំរិន ប្រធានរដ្ឋសភាបានដឹកនាំការប្រារព្ធពិធីរំឭកខួបលើកទី៣៦នៃថ្ងៃដែលកងទ័ពវៀតណាម និងអ្នកផ្តាច់ខ្លួនខ្មែរក្រហមមួយក្រុមផ្តួលរំលំរបប ប៉ុល ពត ហើយបានបង្កើតសាធារណរដ្ឋប្រជាមានិតកម្ពុជា។
លោក ហេង សំរិន ដែលវៀតណាមបានលើកបន្តុបជាប្រមុខរដ្ឋក្នុងឆ្នាំ១៩៧៩ បានចូលរួមជាមួយថ្នាក់ដឹកនាំគណបក្សកាន់អំណាចដទៃទៀតដែលបានឡើងកាន់អំណាចក្រោមរបបថ្មីនោះ រួមមានលោកនាយករដ្ឋមន្ត្រី ហ៊ុន សែន ជាដើម។
ទោះជាយ៉ាងណា លោក ជា ស៊ីម ប្រធានគណបក្សប្រជាជនកម្ពុជាបានអវត្តមានពីពិធីនោះ ដែលតាមទម្លាប់លោកបានចូលរួមជាអធិបតីដែរ។ លោក ជា ស៊ីម អាយុ៨២ឆ្នាំមានបញ្ហាសុខភាពរយៈពេលច្រើនឆ្នាំមកហើយ។
ក្រុមមន្ត្រីគណបក្សប្រជាជនកម្ពុជាមិនអាចទាក់ទងសុំអត្ថាធិប្បាយបានទេអំពីអវត្តមានមេដឹកនាំគណបក្សរបស់ខ្លួន ប៉ុន្តែលោក ញឹក ប៊ុនឆៃ អគ្គលេខាធិការគណបក្សហ្វុ៊នស៊ិនប៉ិចដែលបានចូលរួមក្នុងពិធីនោះដែរបានមានប្រសាសន៍ថា លោក ជា ស៊ីម “មិនទាន់មានសុខភាពមាំទាំ” អាចចូលរួមបានឡើយ។ លោកបានមានប្រសាសន៍ថា “លោកមានជំងឺ ហើយវាលំបាកសម្រាប់លោកក្នុងការអានសុន្ទរកថាណាស់”។
លោក ញឹក ប៊ុនឆៃ ដែលឥឡូវនេះជាទីប្រឹក្សារដ្ឋាភិបាលមានឋានៈស្មើឧបនាយករដ្ឋមន្ត្រី ជាឧត្តមសេនីយ៍យោធាម្នាក់ក្នុងចំណោមឧត្តមសេនីយ៍យោធាកំពូលៗរបស់គណបក្សហ្វុ៊នស៊ិនប៉ិចអំឡុងសង្គ្រាមស៊ីវិលក្នុងទសវត្សរ៍ឆ្នាំ១៩៨០ នៅពេលគណបក្សនេះមានសម្ពន្ធភាពជាមួយខ្មែរក្រហមក្នុងការវាយប្រហារការកាន់កាប់របស់វៀតណាម។
នៅក្នុងទសវត្សរ៍ឆ្នាំ១៩៩០ គណបក្សរាជានិយមដែលពេលនោះមានអំណាចបានតវ៉ាប្រឆាំងនឹងការកំណត់យកថ្ងៃនេះជាថ្ងៃបុណ្យជាតិ។ ហើយសូម្បីក្នុងឆ្នាំ២០០៤ លោក ញឹក ប៊ុនឆៃ បានមានប្រសាសន៍ថា លោកចាត់ទុកថ្ងៃ៧ មករា ជា ” ថ្ងៃដែលវៀតណាមឈ្លានពានប្រទេសកម្ពុជា”។
ទោះជាយ៉ាងណា កាលពីម្សិលមិញលោកបានចូលរួមរំឭកជាមួយគណបក្សប្រជាជនកម្ពុជា ហើយបានជូនកម្រងផ្កាលោក ហេង សំរិន និងលោក ហ៊ុន សែន។
លោក ញឹក ប៊ុនឆៃ បានមានប្រសាសន៍បន្ទាប់ពីពិធីថា “ខ្ញុំទទួលស្គាល់ថា វៀតណាមបានជួយវាយប្រហារ និងផ្ដូលរំលំរបប ប៉ុល ពត។ ប្រសិនបើយើងមិនទទួលស្គាល់រឿងនេះ វាមានន័យថា យើងគាំទ្រខ្មែរក្រហម”។
នៅក្នុងសុន្ទរកថារបស់លោក លោក ហេង សំរិន បាននិយាយការពារកេរដំណែលថ្ងៃ៧ មករា ដែលនៅតែត្រូវបានរិះគន់ដោយគណបក្សសង្គ្រោះជាតិថា ជាថ្ងៃដែលរំឭកដល់ការចាប់ផ្ដើមការកាន់កាប់ប្រទេសកម្ពុជារបស់កងទ័ពវៀតណាមរយៈពេលដ៏យូរ។
លោក ហេង សំរិន បាននិយាយទៅកាន់អ្នកចូលរួមថា “សត្រូវតែមួយគត់នៃស្មារតី៧ មករា គឺរបបប្រល័យពូជសាសន៍ ប៉ុល ពត។ ហេតុដូច្នេះហើយអ្នកដែលប្រឆាំងស្មារតី៧មករា គឺអ្នកស្រឡាញ់របបប្រល័យពូជសាសន៍ ប៉ុល ពត និងជាអ្នកប្រឆាំងការរីកចម្រើនរបស់ប្រទេសជាតិ”។
លោក ហេង សំរិន ក៏បាននិយាយការពារការកាន់កាប់ប្រទេសកម្ពុជាយូរអង្វែងរបស់កងទ័ពវៀតណាមផងដែរ ដោយពន្យល់ថា វាចាំបាច់ណាស់ក្នុងការធានាថា ប៉ុល ពត មិនអាចត្រឡប់មកកាន់អំណាចវិញ។
លោកបានមានប្រសាសន៍ថា “ប្រសិនបើមិនមានការតស៊ូរបស់ប្រជាជនកម្ពុជា ការគាំទ្ររបស់វៀតណាមនឹងមិនមានឡើយ។ ការគាំទ្រនេះគឺជាការរួមចំណែករំដោះប្រជាជនកម្ពុជាពីឃាតករ និងការពារការរស់ឡើងវិញរបស់ប្រទេសកម្ពុជា ដោយប្រឆាំងចំពោះការព្យាយាមរបស់ក្រុម ប៉ុល ពត ក្នុងការត្រឡប់មកវិញ”។
លោក ហេង សំរិន បានមានប្រសាសន៍ថា កងទ័ពស្ម័គ្រចិត្តវៀតណាមត្រូវបានបញ្ជូនទៅប្រទេសរបស់ខ្លួនជាបណ្ដើរៗចាប់ពីឆ្នាំ១៩៨២ ហើយត្រូវបានបញ្ជូនទៅវិញអស់ទាំងស្រុងនៅខែកញ្ញា ឆ្នាំ១៩៨៩ នៅពេលកងទ័ពកម្ពុជាមានសមត្ថភាពការពារបានដោយខ្លួនឯង”។ លោកបានបន្ថែមថា “ហេតុដូច្នោះហើយ អ្នកដែលជាមនុស្សមិនល្អត្រូវឈប់ប្រឌិតប្រវត្តិសាស្ត្រ ដែលបង្កឲ្យមានជាតិនិយមជ្រុល និងការសងសឹករវាងប្រទេសទាំងពីរ”។
លោកស្រី មូរ សុខហួរ ប្រធានកិច្ចការសាធារណៈគណបក្សសង្គ្រោះជាតិបានបដិសេធមិននិយាយអំពីការជំទាស់របស់គណបក្សប្រឆាំងនេះទៅនឹងការរំឭកថ្ងៃ៧មករាឡើយ។ លោកស្រីបានមានប្រសាសន៍ថា យើងបាននិយាយពីបញ្ហានេះគ្រប់គ្រាន់អស់ហើយ”៕ សារុន (រាយការណ៍បន្ថែមដោយ Alex Willemyns និង វណ្ណ រើន)