រយៈពេលជាង៧ខែបន្ទាប់ពីអាជ្ញាធររឹបអូសបានភ្លុកដំរីទម្ងន់៣តោន ដែលមានតម្លៃរាប់លានដុល្លារ និងដែលជាចំនួនច្រើនបំផុតនៅក្នុងប្រវត្តិសាស្ត្ររបស់កម្ពុជា ការស៊ើបអង្កេតនៅតែជាប់គាំង ខណៈទំនិញខុសច្បាប់ទាំងនេះត្រូវបានរក្សាទុកនៅកន្លែងជួសជុលនាវា។
លោក គិន លី ប្រធាននាយកដ្ឋានគយ និងរដ្ឋាករ នៃកំពង់ផែស្វយ័តក្រុងព្រះសីហនុ បានមានប្រសាសន៍កាលពីម្សិលមិញថា ក្រុមហ៊ុនដែលបញ្ជូនទំនិញនេះ មិនបានឆ្លើយតបការទំនាក់ទំនងរបស់នាយករដ្ឋានលោកទេ។ លោកមានប្រសាសន៍ថា លោកកំពុងរង់ចាំការណែនាំពីថ្នាក់លើរបស់លោក មុនពេលបញ្ជូនករណីនេះទៅសាលាដំបូងខេត្តព្រះសីហនុ។
លោកមានប្រសាសន៍ទៀតថា “ក្រុមហ៊ុនមិនបានឆ្លើយតបទេ ដូច្នេះហើយយើងនឹងបញ្ជូនករណីនេះទៅតុលាការ ដើម្បីស៊ើបអង្កេតបន្ត”។ លោកបានបន្ថែមទៀតថា ករណីនេះមិនអាចបញ្ជូនទៅតុលាការបានទេ រហូតទាល់តែលោកទទួលបានបទបញ្ជាពីក្រសួងហិរញ្ញវត្ថុ និងអគ្គនាយកដ្ឋានគយ និងរដ្ឋាករជាមុនសិន។
កាលពីខែឧសភា លោក ប៊ុន ជីវ ប្រធានរដ្ឋបាលនៅកំពង់ផែក្រុងព្រះសីហនុ បានមានប្រសាសន៍ថា កំណត់ត្រាដឹកជញ្ជូនបានបង្ហាញថា កុងតឺន័រចំនួនពីរដែលផ្ទុកភ្លុកដំរីទាំងនេះ ត្រូវបានបញ្ជូនដោយក្រុមហ៊ុនដឹកជញ្ជូនមួយឈ្មោះថា Olair Worldwide Logistics។ នៅពេលនោះ តំណាងក្រុមហ៊ុននេះបានបដិសេធថា ខ្លួនមិនបានប្រព្រឹត្តខុសទេ ហើយបានអះអាងថា ក្រុមហ៊ុនមួយទៀតបានប្រើប្រាស់ឈ្មោះរបស់ខ្លួនដើម្បីបញ្ជាទិញភ្លុកទាំងនេះ។
ក្រុមហ៊ុន Olair Worldwide Logistics មិនអាចទាក់ទងសុំការបំភ្លឺបានទេកាលពីម្សិលមិញពាក់ព័ន្ធនឹងបញ្ហានេះ ហើយលេខទូរស័ព្ទរបស់ក្រុមហ៊ុននេះក៏ទំនាក់ទំនងមិនចូលដែរ។
លោក អ៊ូច អនុត្តរោ ប្រធានកិច្ចការច្បាប់នៅអគ្គនាយកដ្ឋានគយ និងរដ្ឋាករ ក្នុងរាជធានីភ្នំពេញ បានមានប្រសាសន៍ថា ករណីនេះនឹងត្រូវបញ្ជូនទៅសាលាដំបូងខេត្តព្រះសីហនុ ” ឆាប់ៗ”។
លោកបានមានប្រសាសន៍ថា ជោគវាសនាចុងក្រោយនៃភ្លុកដំរីទាំងនេះ ដែលមានប្រភពដើមចេញពីប្រទេសកេនយ៉ា និងមកដល់ឆ្នេរកម្ពុជាកាត់តាមប្រទេសម៉ាឡេស៊ី អាចនឹងត្រូវសម្រេចដោយលោកនាយករដ្ឋមន្ត្រី ហ៊ុន សែន ផ្ទាល់ នៅពេលសំណុំរឿងតុលាការឈានដល់ការធ្វើសេចក្ដីសម្រេច។
លោកបានបន្តថា ” ជាដំបូងយើងនឹងបញ្ជូនវាទៅតុលាការ ហើយបើយើងទទួលបានសេចក្ដីសម្រេចពីតុលាការថា ភ្លុកទាំងនេះជាទ្រព្យសម្បត្តិរបស់រដ្ឋ អគ្គនាយកដ្ឋាននឹងបញ្ជូនសំណើទៅសម្ដេចនាយករដ្ឋមន្ត្រីជាអ្នកសម្រេចថា ត្រូវបញ្ជូនទៅកន្លែងណា”។
កាលពីម្សិលមិញ លោក អ៊ូច អនុត្តរោ បានបដិសេធមិនធ្វើអត្ថាធិប្បាយទេជុំវិញការលើកឡើងរបស់លោកកាលពីខែសីហាដែលថា ភ្លុកដំរីជាង៥០០ដែលបច្ចុប្បន្នត្រូវបានមន្ត្រីប្រហែល៣០នាក់យាមកាមនេះ អាចនឹងដាក់តាំងនៅក្នុងសារមន្ទីរជាតិ៕ សុខុម