28 C
Phnom Penh

តុលាការខេត្ត​ពោធិ៍​សាត់​​ចោទ​ប្រកាន់​​​​បុរស​បីនាក់​ពីបទ​សម្លាប់​បុរស​ម្នាក់​ នៅ​កន្លែង​រាំ​កម្សាន្ត

ដោយ ឌឹ ខេមបូឌា ដេលី

បទវិភាគ

មន្ត្រី​តុលាការ​ម្នាក់​បាន​និយាយ​ថា កាលពី​ម្សិល​មិញ​​​​សាលា​ដំបូង​ខេត្ត​ពោធិ៍សាត់​បាន​ចោទ​ប្រកាន់​បុរស​បី​នាក់​ពី​បទ​ប្រើ​អំពើ​ហិង្សា​ដោយ​ចេតនា​ ដោយ​ជាប់​ពាក់​ព័ន្ធ​នៅ​ក្នុង​ការ​​វាយ​តប់​គ្នា​​រវាង​ក្រុម​បដិបក្ខ​ពីរ​ក្រុម​ ដែល​បាន​បណ្ដាល​ឲ្យ​អ្នក​ចូល​រួម​​ម្នាក់​ស្លាប់។

ជន​សង្ស័យ​ទាំង​បី​នាក់​នេះ​​​ឈ្មោះ អាន រិទ្ធ អាយុ​២០ឆ្នាំ ឡាត ឡុញ អាយុ​៣៣​ឆ្នាំ និង​​ ឡេះ ពូ អាយុ​២៥​ឆ្នាំ​​​ត្រូវ​បាន​ចាប់​ខ្លួន​កាលពី​ល្ងាច​ថ្ងៃច័ន្ទ បន្ទាប់ពី​ ចាន់ ភារ៉ា អាយុ​២១​ឆ្នាំ ត្រូវ​បាន​​វាយ​រហូត​ដល់​ស្លាប់​នៅ​កន្លែង​រាំ​អំឡុង​​បុណ្យ​ដាលាន ក្នុង​ស្រុក​ក្រគរ ​កាលពី​យប់​ថ្ងៃ​
អាទិត្យ​។

លោក​​ ពង្ស ច័ន្ទ​សុយុទ្ធារ៉ា ​​ព្រះរាជអាជ្ញារង​អម​សាលា​ដំបូង​ខេត្ត​​បាន​មាន​ប្រសាសន៍​កាល​ពី​ម្សិលមិញ​ថា លោក​បាន​ចោទ​ប្រកាន់​ជន​សង្ស័យ​ទាំង​នេះ​ពីបទ​ប្រើ​អំពើ​ហិង្សា​ដោយ​ចេតនា​មាន​ស្ថាន​ទម្ងន់​ទោស​។ លោក​​ ច័ន្ទសុយុទ្ធារ៉ា បាន​បន្ថែម​ថា “យើង​បាន​បញ្ជូន​ពួកគេ​ទៅឃុំ​ខ្លួន​បណ្ដោះ​អាសន្ន​នៅ​ពន្ធនាគារ​ខេត្ត​។ ពួកគេ​ប្រឈម​ការ​ជាប់​ពន្ធនាគារ​ពី​៧ឆ្នាំ​ទៅ​១៥​ឆ្នាំ​”។

លោក កែវ សុគន្ធា ស្នង​ការ​រង​នគរ​បាល​​ខេត្ត​បាន​មាន​ប្រសាសន៍​ថា ជនសង្ស័យ​ទាំង​នេះ​បាន​សារភាព​​កាលពី​​ថ្ងៃអង្គារចំពោះ​ការ​សម្លាប់​នោះ​ ដែល​បាន​កើត​ឡើង​បន្ទាប់ពី​​​ក្រុមមួយ​​​ប្រដាប់​ដោយ​អាវុធ​​អំឡុង​ជម្លោះ​នោះ បណ្ដាល​ឲ្យ​ក្រុម​មួយ​ទៀត​រត់​គេច​ខ្លួន​។

ចាន់ ភារ៉ា ត្រូវ​បាន​​ក្រុម​ប្រដាប់​ដោយ​​អាវុធ​ឡោមព័ទ្ធ ហើយ​កាប់​ត្រូវ​មួយ​ពូថៅ​ចំក្បាល​យ៉ាង​ដំណំ​បណ្ដាល​ឲ្យ​ស្លាប់​។

លោក សុគន្ធា បាន​មាន​ប្រសាសន៍​ថា “ពួកគេ​បាន​សារភាព​ថា ពួកគេ​ពិត​ជា​បាន​ប្រព្រឹត្ត​អំពើ​នេះ​មែន ព្រោះ​ពួក​គេ​មិន​ពេញ​ចិត្ត​នៅ​ពេល​បុរស​ទាំង​នេះ​ចូល​ក្នុង​តំបន់​របស់​ខ្លួន​ដោយ​គ្មាន​ការ​អនុញ្ញាត​”។ លោក​បាន​បន្ថែម​ថា នគរ​បាល​កំពុង​ស្វែង​រក​ជនសង្ស័យ​ប្រាំ​នាក់​ទៀត​៕ សារុន​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស