31.5 C
Phnom Penh

អាជ្ញាធរ​ឧទ្យាន​អង្គរ​និយាយ​ថា​ប្រាក់​ឈ្នួល​ដី​៩​លាន​ដុល្លារ​មិន​ទាន់​បាន​បង់​នៅឡើយ

ដោយ ឌឹ ខេមបូឌា ដេលី

បទវិភាគ

អាជ្ញាធរ​អប្សរា​បាន​ទទួល​ស្គាល់​កាលពី​ថ្ងៃ​ព្រហស្បតិ៍​ថា ប្រាក់​រាប់​លាន​ដុល្លារ​ដែល​ខ្លួន​បាន​ទទួល​ជា​ថ្នូរ​នឹង​ដី​ដែល​ជួល​ឲ្យ​ពាណិជ្ជករ សុខ គង់ សម្រាប់​សង់​សណ្ឋាគារ​នៅ​ជិត​ឧទ្យាន​បុរាណ​អង្គរ មិន​ទាន់​ត្រូវ​បាន​បង់​ទៅ​ឲ្យ​ក្រសួង​ហរិញ្ញវត្ថុ​នៅ​ឡើយ​ទេ ដោយសារ “បញ្ហា​បច្ចេកទេស​ទូទាត់​គណនេយ្យ”។​​​

សមាជិក​សភា​គណបក្ស​សង្គ្រោះ​ជាតិ លោក សុន ឆ័យ កាលពី​ខែ​មុន​បាន​ចោទ​អាជ្ញាធរ​នេះ​ពី​បទ​កេង​បន្លំ​ប្រាក់​រាប់លាន​ដុល្លារ ដែល​ប្រមូល​បាន​ពី​ការ​លក់​សំបុត្រ​ចូល​ទស្សនា​អង្គរ ព្រមទាំង​ការ​ជួល​មិន​ប្រក្រតី​នូវ​ដី​ធ្លីដ៏​មាន​តម្លៃ​នេះ​ទៅ​ឲ្យ​លោក សុខ គង់ ក្នុងតម្លៃ​ថោក ដែល​មិន​ទាន់​បាន​បង់​នេះ។

លោក សុន ឆ័យ បាន​មាន​ប្រសាសន៍​ថា ផ្ទៃដី​ទំហំ​២៦​ហិកតា​នៅ​បុរី​វប្បធម៌ និង​ទេសចរណ៍​ខេត្ត​សៀមរាប ត្រូវ​បាន​ជួល​សម្រាប់​រយៈពេល​៧០​ឆ្នាំ​ទៅ​ឲ្យ​ក្រុមហ៊ុន​លោក សុខ គង់ ក្នុង​តម្លៃ​៩​លាន​ដុល្លារ ជា​តួលេខ​ដែល​លោក​បាន​ពណ៌នា​ថា​ជា​”ចំនួន​លុយ​តិចតួចណាស់”។ លោក​ក៏​បាន​មាន​ប្រសាសន៍​ដែរ​ថា​ ចំនួន​លុយ​នេះ​មិន​ទាន់​ត្រូវ​បាន​បង់​នៅ​ឡើយ​ទេ។

ក្នុង​សេចក្តី​បំភ្លឺ​ដែល​ចុះ​ហត្ថលេខា​ដោយ​លោក ប៊ុន ណារិទ្ធ អគ្គនាយក​អាជ្ញាធរ​ជាតិ​អប្សរា​ អាជ្ញាធរ​អប្សរា​បាន​ឲ្យ​ដឹង​កាលពី​ថ្ងៃ​ព្រហស្បតិ៍​ថា ក្រុមហ៊ុន Sokha Hotels Group​ របស់​លោក សុខ គង់ តាម​ពិត​ទៅ បាន​បង់​ប្រាក់​ឈ្នួល​ដី​នេះ​ហើយ ប៉ុន្តែ​ថា អាជ្ញាធរ​នេះ​ខ្លួន​ឯង​មិន​បាន​បញ្ជូន​ប្រាក់​នោះ​ទៅ​រដ្ឋាភិបាល។

សេចក្តី​បំភ្លឺ​បាន​ឲ្យ​ដឹង​ថា “ប្រាក់​ឈ្នួល​ដី ដែល​មិន​ទាន់​បាន​បង់​ចូល​ថវិកាជាតិ​នោះ ពុំ​មាន​បាត់បង់​បន្តិច​ណាឡើយ គឺ​គ្រាន់តែ​ជា​បញ្ហា​បច្ចេកទេស​ទូទាត់​គណនេយ្យ​ ទឹកប្រាក់​នេះ នឹង​ប្រាកដជា​បង់​ចូល​ថវិកា​ជាតិ​នៅពេល​ក្រោយ”។

សេចក្តី​បំភ្លឺ​របស់​អាជ្ញាធរ​អប្សារា​មិន​បាន​ពន្យល់​ថា បច្ចុប្បន្ន​ប្រាក់​នោះ​នៅ​ទីណា​ទេ ហើយ​ក៏​មិន​បញ្ជាក់​ថា​ថ្លៃ​ឈ្នួល​មាន​ទឹក​ប្រាក់​ប៉ុន្មាន​ដែរ។ លោក សុន ឆ័យ បាន​មាន​ប្រសាសន៍​កាលពី​ខែ​មុន​ថា លោក ប៊ុន ណារិទ្ធ បាន​ប្រាប់​លោក​ថា ថ្លៃ​ឈ្នួល​គឺ​៩​លាន​ដុល្លារ។

យ៉ាងណា​ក៏ដោយ សេចក្តី​បំភ្លឺ​នេះ​បដិសេធ​ការ​អះអាង​របស់​លោក សុន ឆ័យ ដែល​ថា​ដី​នោះ​ត្រូវ​បាន​ជួល​ទៅ​ឲ្យ​លោក សុខ គង់ ក្នុង​តម្លៃ​ថោក ដោយសារ​ទំនាក់​ទំនង​របស់​គាត់​នឹងឧបនាយក​រដ្ឋមន្ត្រី សុខ អាន ដែល​ទទួល​ខុសត្រូវ​អាជ្ញាធរ​អប្សរា។

អាជ្ញាធរ​អប្សរា​​បាន​និយាយ​ថា “ការ​ជួល​ដី​នេះ​ទៀតសោត​ពុំ​មែន​ប្រព្រឹត្ត ឡើង​ក្នុង​លក្ខណៈ​សម្ងាត់ លាក់លៀម និង​គ្មាន​ការ​ចូលរួម​ពី​ស្ថាប័ន​ដទៃ​ឡើយ ពីព្រោះ​យើង​បាន​ធ្វើ​ការ​ផ្សព្វផ្សាយ​ជា​សាធារណៈ ជា​លក្ខណៈ​ជាតិ និង​អន្តរជាតិ ជា​ពិសេស​គឺ​មាន​ការ​ជ្រោមជ្រែង​ពី​អង្គការ យូណេស្កូ និង​ទីភ្នាក់ងារ​អភិវឌ្ឍន៍​បារាំង រីឯ​ការ​កំណត់​ថ្លៃ​ជួល​ដី​ទៀតសោត ក៏​មាន​ការ​ចូលរួម​ពី​អ្នក​ជំនាញការ​អចលន​ទ្រព្យ​អន្តរជាតិ​ដែរ “។

លោក ប៊ុន ណារិទ្ធ អគ្គនាយក​អាជ្ញាធរ​ជាតិ​អប្សរា មិន​អាច​ទាក់ទង​បាន​ទេ​កាលពី​ថ្ងៃ​ព្រហស្បតិ៍។ លោក ផៃ ស៊ីផាន អ្នក​នាំពាក្យ​នៃ​ទីស្តីការ​គណៈរដ្ឋមន្ត្រី បាន​មាន​ប្រសាសន៍​ថា លោក​យល់​ថា បញ្ហា​នេះ​ត្រូវ​បាន​ដោះស្រាយ​ហើយ។

លោក​បាន​មាន​ប្រសាសន៍​ថា “យើង​បាន​ធ្វើ​ការ​បំភ្លឺ​ជា​លាយ​លក្ខណ៍​អក្សរ​រួច​ហើយ ​ប្រសិនបើ​គាត់​មិន​ទទួល​យក​ទេ គឺ​ស្រេចតែ​គាត់”។

លោក សុខ គង់ ដែល​ជា​ជនជាតិ​វៀតណាម ប៉ុន្តែ​កើត​នៅ​ក្នុង​ប្រទេស​កម្ពុជា រកស៊ី​មាន​បាន​លេច​មុខ​ល្បីល្បាញ​អំឡុង​ទសវត្សរ៍​ឆ្នាំ​១៩៨០ ដោយ​ប្រកប​មុខ​ជំនួញ​នាំ​ចេញ​នាំ​ចូល​ទៅ​មក​រវាង​ប្រទេស​កម្ពុជា​និង​ប្រទេស​វៀតណាម៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស