អតីតព្រះសង្ឃខ្មែរក្រោមបីអង្គដែលត្រូវបានអាជ្ញាធរចាប់ផ្សឹកដាក់ពន្ធនាគារអំឡុងពេលចាប់ខ្លួនសកម្មជន និងឥស្សរជនគណបក្សប្រឆាំងជាបន្តបន្ទាប់កាលពីចុងឆ្នាំមុន ត្រូវបានសាលាឧទ្ធរណ៍សម្រេចច្រានចោលសំណើសុំនៅក្រៅឃុំកាលពីថ្ងៃសុក្រ ខណៈអ្នកគាំទ្រពួកគេរាប់រយនាក់ធ្វើការតវ៉ានៅខាងក្រៅតុលាការដើម្បីទាមទារឲ្យដោះលែងពួកគេ។
អន្ទិត សឿង ហៃ អាយុ២៨ឆ្នាំ ត្រូវបានឃាត់ខ្លួនកាលពីថ្ងៃទី១១ ខែវិច្ឆិកា អំឡុងពេលតវ៉ាដោយសន្តិវិធីមួយនៅខាងក្រៅសាលាដំបូងរាជធានីភ្នំពេញ ប្រឆាំងការចាប់ខ្លួនស្ត្រីសកម្មជនដីធ្លីប្រាំពីរនាក់មកពីតំបន់បឹងកក់ រាជធានីភ្នំពេញ។ រួមជាមួយអ្នកតវ៉ាបីនាក់ទៀត គាត់ត្រូវបានតុលាការផ្តន្ទាទោសនៅថ្ងៃបន្ទាប់ឲ្យជាប់ពន្ធនាគាររយៈពេលមួយឆ្នាំ ពីបទរារាំងមន្ត្រីសាធារណៈ។
នៅក្នុងហេតុការណ៍ដាច់ដោយឡែកមួយកាលពីថ្ងៃទី១២ ខែវិច្ឆិកា អន្ទិត ឃិត វណ្ណៈ អាយុ២៦ឆ្នាំ និងអន្ទិត សាង កុសល អាយុ១៩ឆ្នាំ ត្រូវបានចាប់ខ្លួននិងចោទប្រកាន់ពីបទ “ចូលរួមជាមួយអង្គការឧក្រិដ្ឋកម្ម” ដោយសារតែការយួរបាវដងទង់ជាតិ និងព្យាយាមចូលរួមជាមួយអ្នកភូមិមកពីខេត្តព្រះវិហារដែលមានគម្រោងហែក្បួនទៅកាន់រដ្ឋសភា និងភូមិគ្រឹះរបស់លោកនាយករដ្ឋមន្ត្រី ហ៊ុន សែន ដើម្បីអំពាវនាវឲ្យមានការយកចិត្តទុកដាក់ចំពោះវិវាទដីធ្លីរបស់ពួកគាត់។
ប្រជាពលរដ្ឋជាង២០០នាក់ រួមទាំងព្រះសង្ឃប្រហែល២០អង្គផង បានធ្វើការតវ៉ាកាលពីថ្ងៃសុក្រ នៅលើផ្លូវខាងក្រៅសាលាឧទ្ធរណ៍ ដោយស្រែកថា ការឃុំខ្លួននេះគឺ [អយុត្តិធម៌] ហើយថា អ្នកទាំងបីគ្មានកំហុសទេ ចំណែកឯបណ្តាអង្គការសិទ្ធិមនុស្សក្នុងស្រុកក៏បានថ្កោលទោសការបន្តឃុំខ្លួនពួកគេដែរ។
លោកស្រី សម សុគន្ធា មេធាវីការពារអន្ទិត ឃិត វណ្ណៈ និងអន្ទិត សាង កុសល បានមានប្រសាសន៍ថា សាលាឧទ្ធរណ៍បានច្រានចោលសំណើសុំនៅក្រៅឃុំរបស់កូនក្តីលោកស្រី ដោយហេតុផលមកសំអាងថា វាគឺជាសំណុំរឿងព្រហ្មទណ្ឌ ហើយកំពុងសើុបអង្កេតនៅឡើយ។
លោកស្រីមានប្រសាសន៍ថា “ខ្ញុំគិតថា សំណុំរឿងក្តីរបស់កូនក្តីខ្ញុំ គឺជាបទមជ្ឈិម ហើយមាន [ចំណុច] សង្ស័យជាច្រើននៅក្នុងសំណុំរឿងនេះ។ ផ្អែកតាមច្បាប់ កូនក្តីរបស់ខ្ញុំគួរតែទទួលបានការដោះលែងឲ្យនៅក្រៅឃុំ”។
លោកស្រីបានមានប្រសាសន៍ទៀតថា គ្មានភ័ស្តុតាងដាក់ ដើម្បីបន្ទុកលើការចោទប្រកាន់ពីបទចូលរួមជាមួយសមាគមទុច្ចរិតទេ ពីព្រោះបុរសទាំងពីរនេះគ្រាន់តែមានទង់ជាតិខ្មែរ និងទង់ព្រះពុទ្ធសាសនាប៉ុណ្ណោះ នៅពេលត្រូវចាប់ខ្លួន។ លោកស្រីបានបន្តថា “ទាំងនេះមិនមែនជាអាវុធរបស់សមាគមទុច្ចរិតទេ”។
នៅក្នុងសវនាការដាច់ដោយឡែកមួយកាលពីថ្ងៃសុក្រ សាលាឧទ្ធរណ៍ក៏បានច្រានចោលសំណើសុំនៅក្រៅឃុំរបស់អន្ទិត សឿង ហៃ ដែរ។ មេធាវីរបស់គាត់ឈ្មោះ ជិន លីដា បានមានប្រសាសន៍ថា ចៅក្រមសាលាដំបូងបានបិទសំណុំរឿងរបស់គាត់ទៅហើយ ដូច្នេះគាត់នៅតែត្រូវឃុំខ្លួនរង់ចាំបណ្តឹងឧទ្ធរណ៍។
អន្ទិត សឿង ហៃ ដែលកាលពីឆ្នាំមុនបានដុតទង់ជាតិវៀតណាម នៅខាងក្រៅស្ថានទូតវៀតណាមប្រចាំប្រទេសកម្ពុជា បានថ្កោលទោសតុលាការនេះថា ជា”តុលាការអាយ៉ងយួន”។ គាត់និយាយថា “តុលាការនេះ ស្ថិតនៅក្រោមសម្ពាធពីប្រទេសយួន”។
លោក អំ សំអាត អ្នកគ្រប់គ្រងបច្ចេកទេសសើុបអង្កេតនៅអង្គការសិទ្ធិមនុស្សលីកាដូបានមានប្រសាសន៍ថា លោកក៏ជឿដែរថា អន្ទិតទាំងបីនាក់នេះត្រូវបានចាប់ខ្លួនជាការសងសឹកចំពោះហេតុការណ៍ដុតបំផ្លាញទង់ជាតិ។ លោកបានមានប្រសាសន៍បន្ថែមថា “នេះជាបញ្ហានយោបាយ”។
ចៅក្រុមជំនុំជម្រះ សេង ស៊ីវុត្ថា មិនអាចទាក់ទងសុំការបំភ្លឺបានទេ ចំណែកឯព្រះរាជអាជ្ញាអមសាលាឧទ្ធរណ៍ ស យស់ថាវរៈ បានបដិសេធមិនធ្វើអត្ថាធិប្បាយតែម្តង៕សុខុម