កាលពីម្សិលមិញ សាលាដំបូងខេត្តកណ្តាលបានចោទប្រកាន់ស្ត្រីអាយុ៣៣ឆ្នាំម្នាក់ពីបទជួញដូរថ្នាំញៀន បន្ទាប់ពីត្រូវបានចាប់ខ្លួនកាលពីថ្ងៃអាទិត្យ ពីបទប៉ុនប៉ងជួញដូរម៉ាទឹកកកមួយចំនួនតូចចូលក្នុងពន្ធនាគារដោយលាក់ក្នុងកមាន់ ដែលនាងបានស្លយកទៅឲ្យអ្នកទោស។
លោក ចាត ស៊ីនាង ប្រធានពន្ធនាគារបានមានប្រសាសន៍កាលពីម្សិលមិញថា កាលពីព្រឹកថ្ងៃអាទិត្យ ស្ត្រីឈ្មោះ សេត យ៉ា អាយុ៣៣ឆ្នាំ បានយួរសម្លទៅពន្ធនាគារ ហើយបានសុំយកទៅឲ្យជនជាប់ពន្ធនាគារពីបទរំលោភឈ្មោះ ខៀវ រង្សី អាយុ២៩ឆ្នាំ។
លោក ស៊ីនាង បានមានប្រសាសន៍ថា “នៅពេលស្ត្រីរូបនេះទៅសួរសុខទុក្ខអ្នកទោសរូបនេះនៅ ម៉ោង៩ព្រឹក យើងបានសុំពិនិត្យសម្លដែលគាត់បានកាន់។ ពេលនោះយើងបានរកឃើញម៉ាទឹកកកមួយកញ្ចប់តូចនៅក្នុងកមាន់ក្នុងសម្លនោះ”។
លោក ស៊ីនាង បានមានប្រសាសន៍ថា ថ្នាំមេតំហ្វេតាមីនកន្លះក្រាមត្រូវបានលាក់នៅក្នុងថង់ប្លាស្ទីកពីរ រុំបង់ស្អិតយ៉ាងណែន ហើយញាត់ក្នុងកមាន់។ លោកបានបន្ថែមថា ស្ត្រីឈ្មោះ យ៉ា ត្រូវសន្តិសុខពន្ធនាគារឃាត់ខ្លួនភ្លាមៗ បន្ទាប់ពីរកឃើញថ្នាំញៀន ហើយបានប្រគល់ទៅ ឲ្យនគរបាលខេត្ត។
លោកបានមានប្រសាសន៍ថា សន្តិសុខមានការសង្ស័យលើស្ត្រីឈ្មោះ យ៉ា នេះ រយៈពេលប្រហែលមួយខែមកហើយ នៅពេលគាត់បានទៅជាមួយមិត្តភក្តិមួយក្រុមទៅ ពន្ធនាគារនេះដើម្បីសួរសុខទុក្ខសមាជិកគ្រួសាររបស់ខ្លួន។
លោកបានមានប្រសាសន៍ថា រយៈពេលប្រហែលពីរសប្តាហ៍មុន ស្ត្រីរូបនេះបានជួបអ្នកទោសម្នាក់ឈ្មោះ មុត បូរ៉ា អាយុ២៩ឆ្នាំ ដែលជាប់ពន្ធនាគារពីបទប៉ុនប៉ងមនុស្សឃាតកាលពីឆ្នាំ២០០៧ ហើយអ្នកទាំងពីរបានស្រឡាញ់គ្នា។
យោងតាមលោក ស៊ីនាង បានឲ្យដឹងថា ប៉ុន្តែ ស្ត្រីឈ្មោះ យ៉ា នេះស្ទើរតែមិនដែលមកសួរសុខទុក្ខមិត្តប្រុសថ្មីរបស់ខ្លួនឡើយ តែបានយកម្ហូបអាហារទៅឲ្យអ្នកទោសផ្សេងទៅវិញ។ លោកបានមានប្រសាសន៍ថា “យើងសង្ស័យថា គាត់យកថ្នាំញៀនចូល ពីព្រោះហេតុអ្វីបានជាគាត់មិនទៅសួរសុខទុក្ខមិត្តប្រុសរបស់ខ្លួន?។ មិនចាំបាច់យាយថា តើទំនាក់ទំនងរបស់នាងជាមួយអ្នកទោសដទៃទៀតដូចម្តេចនោះឡើយ។
លោក ដួង ស៊ីដន នាយការិយាល័យនគរបាលប្រឆាំងគ្រឿងញៀនខេត្តបានមានប្រសាសន៍ថា ស្ត្រីឈ្មោះ យ៉ា នេះ បានប្រាប់នគរបាលអំឡុងការសាកសួរថា គាត់មានបំណងជួញដូរថ្នាំហ្វេតាមីន ឲ្យឈ្មោះ បូរ៉ា ប៉ុន្តែ បានអះអាងថា វាជាលើកទី១ ដែលគាត់បានប៉ុនប៉ងធ្វើដូច្នេះ។ លោក ស៊ីដន បានមានប្រសាសន៍ថា រង្សី “មិនបានដឹងថា មានថ្នាំញៀននៅក្នុងសម្លឡើយ”។
ទោះជាយ៉ាងណា លោក ឈីវ រិនឌី ក្រឡាបញ្ជីរបស់ព្រះរាជអាជ្ញាអមសាលាដំបូងខេត្ត បានមានប្រសាសន៍ថា ស្ត្រីឈ្មោះ យ៉ា លោក រង្សី និង បូរ៉ា ត្រូវបានចោទប្រកាន់ពីបទឧក្រិដ្ឋកាលពីម្សិលមិញ។
លោកបានមានប្រសាសន៍ថា “មនុស្សបីនាក់ត្រូវបានចោទប្រកាន់ពីបទប្រើប្រាស់ និងជួញដូរថ្នាំញៀន”។ លោកបានបន្ថែមថា រង្សី និងបូរ៉ា ត្រូវបានបញ្ជូនទៅពន្ធនាគារវិញជាមួយស្ត្រីឈ្មោះ យ៉ា ដែលជាអ្នកទោសថ្មី៕សារុន