31 C
Phnom Penh

លោក ហ៊ុន សែន និង​​​លោក ហោ ណាំ​​​ហុង ចុះ​ហត្ថ​លេខា​លើ​លិខិត​​ចូល​​​រួម​​​រំលែក​​​ទុក​​្ខ ​​​ចំពោះ​​​ការ​​​សម្លាប់​​​​​​អ្នក​​​កាសែត​បារាំង

ដោយ ឌឹ ខេមបូឌា ដេលី

បទវិភាគ

កាលពី​​​ម្សិលមិញ លោកនាយក​​​រដ្ឋមន្ត្រី ហ៊ុន សែន និង​​​លោក ហោ ណាំហុង រដ្ឋមន្ត្រី​​​ក្រសួង​​​ការ​​​បរទេស​​​បាន​​​ទៅ​​​ស្ថាន​​​ទូត​​​បារាំង​​​​​​នៅ​​​ក្នុង​​​រាជ​​​ធានី​​​ភ្នំពេញ​​​ដើម្បី​​​ចុះ​​​ហត្ថ​​​លេខា​​​លើ​​​លិខិត​​ចូល​រួម​​​រំលែក​ទុក្ខ​​​​​​មនុស្ស​១២នាក់​ដែលត្រូវ​ក្រុម​ភេវរករ​​បាញ់សម្លាប់​កាល​​​ពី​សប្តាហ៍​​​មុន​​​នៅ​​​ក្នុង​​​ទីក្រុង​​​ប៉ារីស​។

លោក ហ៊ុន​​​ សែន បាន​​​​​​ទៅ​​​ស្ថាន​​​ទូត​​​នេះ​​​នា​​​ពេល​​​រសៀល​​​​​ដើម្បី​ចុះ​​​ហត្ថលេខា​​​លើ​​​លិខិត​​​ចូលរួមរំលែកទុក​្ខ ហើយ​លោក​​​បាន​​​និយាយ​​​ជាមួយ​​​លោក Jean-Claude Poimboeuf ឯក​អគ្គ រដ្ឋទូត​​​បារាំង​​​។

លិខិត​​​របស់លោក​​​នាយក​​​រដ្ឋមន្ត្រី​​​មាន​​​ខ្លឹមសារថា ការ​​​វាយ​​​ប្រហារ​​​កាល​​​ពី​​​ថ្ងៃពុធ​សប្តាហ៍មុនដែល​ក្នុងនោះ​អ្នក​កាសែត​ជន​ជាតិបារាំង​ និង​អ្នកកាសែត​នៅ​ទស្សនាវដ្តី Charlie Hebdo ត្រូវ​បាន​ក្រុម​ជ្រុលនិយមអីុស្លាម​បាញ់សម្លាប់​នោះ ​​​​គឺ​​​ជា​​​ការ​​​វាយ​​​ប្រហារ​​​ទៅលើ​​​សេរី​ភាព​​​នៃការ​​​បញ្ចេញ​​​មតិ។

លិខិត​​​របស់​​​លោក ហ៊ុន សែន​​​ មាន​​​ខ្លឹម​​​សារ​​​បន្ថែម​​​ថា “​​​ប្រទេស​កម្ពុជា​​​សូមថ្កោលទោស​​​​​​យ៉ាង​ខ្លាំងក្លាបំផុត​​ចំពោះការ​វាយ​ប្រហារ​ភេរវកម្ម​ដ៏ព្រៃ​ផ្សៃនៅ​​ប្រទេស​​​បារាំង​​​នា​​សប្តាហ៍​មុននេះ​​​​ដែលបាន​​បង្ក​​​ឲ្យ​​​ជនជាត​ិ​​​បារាំង​​​ស្លូត​​​ត្រង់​​បាត់​បង់​ជីវិត​​​​  របួស​​​ជា​​​ច្រើននាក់ និងមានការ​​​​តក់ស្លុតយ៉ាងខ្លាំងក្លា។ វាជាការ​វាយ​ប្រហារ​ដ៏ធ្ងន់ធ្ងរ​ដល់​តម្លៃមូលដ្ឋាន​នៃ​សេរីភាព​បញ្ចេញ​​មតិ និង​សិទ្ធិ ប្រជាធិបតេយ្យ​” ដែលក្នុង​នោះ​​លោក​ក៏បា​ន​រំលែកទុក​្ខដល់​ការ​សម្លាប់​មនុស្ស​ប្រាំនាក់ទៀត​ក្នុងការ​វាយ​ប្រហារ​ភេរវកម្ម​នេះដែរ។

លិខិត​​​នេះ​​​បន្ថែម​​​ថា “ក្នុង​​នាម​ប្រជាជនកម្ពុជា​​​និង​​​ខ្លួន​​​ខ្ញុំ​​​ផ្ទាល់ ខ្ញុំសូម​​​ចូលរួម​​​រំលែកទុក្ខ​​​យ៉ាង​ក្រៀមក្រំបំផុត​​ដល់​ក្រុម​គ្រួសារ​ និង​ជន​រងគ្រោះដែលបាន​​​បាត់បង់​ជីវិត​នៅក្នុង​​​អំពើ​​​ហិង្សា ដ៏គួរ​ឲ្យ​ស្អប់ខ្ពើម​នេះ និង​​​​​​​​សូម​សម្តែងនូវ​​​​សាមគ្គីភាព និង​​​សមាន​​​ចិត្ត​​​ដ៏ជ្រាលជ្រៅ​​​​​​​ជាមួយ​នឹង​​​​​​​រដ្ឋាភិបាល​​​និង​​​ប្រជា​​​ជន​​​បារាំង”។

នៅព្រឹកនោះ លោក ហោ ណាំហុង បាន​​​ទៅ​​​ស្ថានទូត​​​នេះ​​​ដើម្បី​​​ចុះ​​​ហត្ថលេខា​​​លើ​​​លិខិត​​​ស្រដៀង​​​គ្នានេះ​​​ ដោយ​​​ប្រាប់​​​អ្នក​​​យក​​​ព័ត៌មាន​​​ខណៈលោក​​​ចាកចេញ​​​ពី​​​ស្ថានទូតថា ​​​លោក​​​​​​មក​ “ដើម្បី​បង្ហាញការ​ចូលរួម​​​រំលែក​​​ទុក្ខ​​​​​​របស់​​​ប្រទេស​​​កម្ពុជា​​​ និង​​​សម្តែង​​​នូវ​សាមគ្គីភាព​​​របស់​​​ប្រទេស​​​កម្ពុជា​​​ប្រឆាំង​​​ការ​​​សម្លាប់ដ៏ព្រៃផ្សៃនេះ”។

លោក ហោ ណាំហុង បាន​​​មាន​​​ប្រសាសន៍​​​នៅពេល​​​លោក​​​ចាក​​​ចេញថា “​​​នេះគឺជា​​​ការ​​​សម្លាប់​​​ដ៏ព្រៃផ្សៃពី​​​សំណាក់​​​ក្រុម​​​ជ្រុល​​​និយម​​​ដែលបាន​​​សម្លាប់​​​អ្នក​​​កាសែតជន​ជាត​ិ​​​​បារាំង​​​នៅកាសែត​​​ Charlie Hebdo ​​​កាលពី​​​ថ្ងៃទី​​​៧ ខែមករា”។

ព្រះ​​​អង្គម្ចាស់​​​ នរោត្តម រណឫទ្ធិ ប្រធាន​​​គណបក្ស​​​ហ្វុ៊ន ស៊ិនប៉ិច​​​នៅពេល​​​ខាងមុខ​​​ ដែលបាន​​​ចំណាយពេល​​​វ័យ​​​ជំទង់​​​របស់​​​ព្រះ​​​អង្គនៅក្នុង​​​ប្រទេស​​​បារាំងនោះ​​​​ ក៏បាន​​​យាង​​ទៅ​​​​​​ស្ថានទូតនេះកាលពីម្សិលមិញ​​​​​​​ដើម្បី​​​សរសេរ​​​លិខិត​​​ចូល​រួម​រំលែក​ទុក្ខ​ផង​ដែរ។

នៅក្នុង​​​ប្រទេ​​​សកម្ពុជា អ្នកកាសែត​​​១៣នាក់​​​​​​ត្រូវ​​​បាន​​​សម្លាប់​​​នៅពេល​​​កំពុង​​​បំពេញ​ការងារ​​​របស់ខ្លួន​​​ចាប់តាំង​​​ពី​​​ឆ្នាំ​​​១៩៩៤មក ​​​ហើយ​គ្មាន​​​​នរណាម្នាក់​​​ត្រូវបាន​យកមក​​​ផ្តន្ទា​ទោស​​​ចំពោះ​​​ការ​​​សម្លាប់​​​អ្នក​​​កាសែត​​​ឡើយ។

កាលពី​​​ខែ​​​ ធ្នូ ឆ្នាំ​​​២០១១ សន្តិសុខ​​​យាម​​​ឃ្លាំង​​​ម្នាក់​​​នៅ​​​កម្មវិធីស្បៀង​​​អាហារ​​​ពិភពលោក​​​ក៏ត្រូវ​​​បាន​​​ផ្តន្ទាទោស​​​​​​ឲ្យ​​​ជាប់​​​ពន្ធនាគារ​​​រយៈពេល​​​ប្រាំមួយ​​​ខែ​​​​​​បន្ទាប់ពី​​​​​​ចែក​​​ចាយ​​​រូបថត​​​ដែល​​​គាត់​​​បាន​​​ព្រីនចេញពី​​​គេហទំព័រ​​​ K.I. Media ដែលបាន​​​ចោទ​​​ថ្នាក់​​​ដឹកនាំគណបក្ស​​​ប្រជាជន​​​កម្ពុជា​​​ រួមមាន​​​លោក ហ៊ុន សែន ពី​​​បទ​​​ក្បត់​​​ជាតិ។

គេហទំព័រ​​​នេះដែល​​​ជារឿយៗធ្វើការ​​​អត្ថាធិប្បាយ​​​រិះគន់​​​​​​ គូរ​រូបត្លុក និង​​​រូបភាព​​​ចំអក​​​​​​មន្ត្រី​​​រដ្ឋា​ភិបាល​​​នោះ ត្រូវ​​​បាន​​​ហាមឃាត់​​​​នៅ​​​ក្នុង​​​ប្រទេស​​​កម្ពុជា។

លោក មឿន ឈាន​​​ណារិទ្ធ នាយក​​​ប្រតិបត្តិ​​​​​​វិទ្យាស្ថានកម្ពុជា​​​សម្រាប់​​​ការ​​​សិក្សា​​​ប្រព័ន្ធ​​​ផ្សព្វ​ផ្សាយ​​​​​​បាន​មាន​​​ប្រសាសន៍​ថា ​​​លោក​​​ចង់ឃើញ​​​លោក ហ៊ុន សែន និង​​​លោក ហោ ណាំហុង ពង្រីកការ​ការ​​​ពារ​​​​​​សេរីភាព​​​នៃការ​​​បញ្ចេញ​​​មតិនៅក្នុង​​​ប្រទេស​​​កម្ពុជា​​​ផងដែរ។

លោកបាន​​​មាន​​​ប្រសាសន៍ថា “ខ្ញុំគិត​​​ថា ថ្នាក់ដឹកនាំ​​​ប្រទេស​​​កម្ពុជា​​​ហាក់ដូច​​​ជា​​​មិន​​​យក​​​ចិត្ត​​​ទុកដាក់​​​​​​ចំពោះ​​​ការ​​​សម្លាប់​​​អ្នកកាសែត​​​ក្នុង​​​ប្រទេស​​​កម្ពុជាឡើយ​​​​។ ដូច្នេះ​​​សូម​​​​​​ថ្នាក់ដឹកនាំ​​​ប្រទេស​​​កម្ពុជា​​​​​​យក​​​ចិត្ត​​​ទុក​​​ដាក់​​​ចំពោះអ្នក​​​កាសែត​​​​​​កម្ពុជា​​​របស់យើងផង​​​​ដែលត្រូវ​​​បាន​​​សម្លាប់​​​ និង​​​គំរាម​​​កំហែង”៕សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស