37 C
Phnom Penh

លោក ហែម ថ​ុន កីឡាករ​ហែល​ទឹក​ដ៏ល្បី​ឈ្មោះ​ក្នុង​ទសវត្សរ៍​៦០​​ស្លាប់​ក្នុ​ងអាយុ​៧១ឆ្នាំ​

ដោយ ឌឹ ខេមបូឌា ដេលី

បទវិភាគ

លោក ហែម ថុន ដែល​គេ​ចាត​់ទុកថា ជា​កីឡាករ​​ហែល​ទឹក​ដ៏ល្បីឈ្មោះ​​ក្នុង​ប្រទេស​កម្ពុជា​បាន​ស្លាប់​​នៅ​ក្នុង​រាជធានី​ភ្នំពេញ​កាលពី​​ល្ងាច​ថ្ងៃ​ច័ន្ទ ក្នុង​អាយុ​៧១​ឆ្នាំ​។Sim

លោក ហែម គិរី កូន​ប្រុស​របស់​លោក ហែម ថុន និង​ជា​អនុប្រធាន​សម្ព័ន្ធ​កីឡា​ហែល​ទឹក​ខ្មែរ​បាន​មាន​ប្រសាសន៍​ថា ​ឪពុក​របស់​លោក​​​ដែល​ឈ្នះ​​មេដាយ​​​អន្តរជាតិ​​​ចំនួន​១២​ ក្នុង​ទស​វត្សរ៍​ឆ្នាំ​១៩៦០ និង​ ៧០​​ ហើយ​ក្រោយ​មក​បាន​ក្លាយ​ជា​អគ្គលេខាធិការ​រង​នៃ​គណៈ​កម្មាធិការ​ជាតិ​អូឡាំពិក​កម្ពុជា​បាន​ស្លាប់​នៅ​ម៉ោង​៦និង​៤៥​នាទី​ល្ងាច​ម្សិលមិញ បន្ទាប់​ពីពុះពារ​​ជំងឺ​សួត​ និង​ជំងឺ​ថ្លើម​ជាយូរ​មក​ហើយ​។

លោក​ គិរី​ បាន​មាន​​ប្រសាសន៍​កាលពី​ម្សិលមិញ​អំឡុង​ពិធី​មួយ​នៅ​ផ្ទះ​របស់​ឪពុក​លោក​នៅ​ក្នុង​ខណ្ឌ​ពោធិ៍សែនជ័យ​ថា ” ឪពុក​របស់​ខ្ញុំ​ទើប​តែ​​បាន​ធូរ​ស្រាល​ពី​ជំងឺ​ថ្មីៗ​នេះប៉ុណ្ណោះ ប៉ុន្តែ​ត្រូវ​បាន​បញ្ជូន​ទៅ​មន្ទីរ​ពេទ្យ​ម្ដង​ទៀត​កាលពី​​ព្រឹក​ថ្ងៃ​សៅរ៍ ខណៈ​គាត់​មិន​ស្រួល​ខ្លួន​”។

លោក​បាន​បន្ថែម​ថា ” គាត់​ជាមេគ្រួសារ ដែល​បាន​តស៊ូ​សម្រាប់​​កូនៗ​​ពេញ​មួយ​ជីវិត​ ហើយ​តែង​តែ​ប្រឹង​ប្រែង​ធ្វើ​ការ​ក្នុង​វិស័យ​កីឡា​”។

ដោយ​កើត​ក្នុង​ស្រុក​មុខកំពូល ខេត្ត​កណ្ដាល ក្នុង​ឆ្នាំ​១៩៤៣​ ដំបូង​លោក​ ហែម ថុន សង្ឃឹម​ថា នឹង​ក្លាយ​ជា​កីឡា​បាល់​ទាត់​អាជីព​ម្នាក់ ប៉ុន្តែ​​បានក្លាយ​ជា​កីឡាករ​ហែល​ទឹក​វិញ​នៅ​ពេល​ម្ដាយ​របស់​លោក​ហាម​រូប​លោក​មិន​ឲ្យ​ធ្វើ​ដំណើរ​ទៅ​ប្រទេស​ចិន​ក្នុង​ឆ្នាំ​១៩៥៩​ សម្រាប់​ការ​ហ្វឹក​ហាត់​ជាមួយ​ក្រុម​ជម្រើស​ជា​តិ​​។

លោក ហែម ថុន បាន​​នាំមុខមាត់សម្រាប់​​កីឡាហែលទឹក​កម្ពុជា​ក្នុងទសវត្សរ៍​ឆ្នាំ​១៩៦០ ដែល​​​ទទួល​បាន​ការ​អបអរ​សាទរ​ពី​មនុស្ស​ជា​ច្រើន​​នៅ​ពេលយុគសម័យ​មាស​នៃ​ភាព​ជោគ​ជ័យ​ផ្នែក​កីឡាក្នុង​​ប្រទេស​កម្ពុជា​។ នៅ​ពេល​ខ្មែរ​ក្រហម​បាន​កាន់​អំណាច​ក្នុង​ឆ្នាំ​១៩៧៥ កីឡាករ​អត្តពលកម្ម​​ក្នុង​ប្រទេស​កម្ពុជា​ទាំង​អស់​បាន​បង្ខំ​ចិត្ត​លាក់​បាំង​អត្ត​សញ្ញាណ​របស់​ខ្លួន។

បន្ទាប់ពី​​​បាត​់បង់កូន​បួន​នាក់ ដែល​បាន​ស្លាប់​ដោយ​សារ​ភាព​អត់​ឃ្លាន​អំឡុង​របប​ ប៉ុលពត លោក ហែម ថុន បាន​ត្រឡប់​មក​​រស់​នៅ​ក្នុង​ខេត្ត​កណ្ដាល​វិញ ហើយ​បាន​ធ្វើ​ជាកសិករ​ម្នាក់​មុន​ពេល​​អ្នក​កីឡា​ដែល​នៅ​រស់​ជំនាន់​រូប​លោក​បាន​តាម​រក​​លោកឃើញ​ ហើយ​បាន​សុំ​​ឲ្យ​លោក​ផ្លាស់ទៅ​រស់​នៅ​ក្នុង​រាជធានី​ភ្នំពេញ ដើម្បី​ជួយ​កសាង​វិស័យ​​កីឡា​ក្នុង​ប្រទេស​កម្ពុជា​ឡើង​វិញ​។

មាន​ប្រសាសន៍​នៅ​​ពិធី​កាលពី​ម្សិលមិញ លោក ថោង ខុន ប្រធាន​​គណៈកម្មាធិការ​អូឡាំ​ពិក​បាន​ហៅ​​លោក ហែម ថុន ថាជា ​​​”ព្រឹទ្ធាចារ្យ​កីឡា​” ហើយ​បាន​មាន​ប្រសាសន៍​ថា លោក​ក្រៀម​ក្រំ​ណាស់​ដែល​​កីឡាករ​ហែល​ទឹក​ដ៏ល្បី​ល្បាញ​រូប​នេះ​មិន​បាន​នៅ​រស់ឃើញ​ប្រទេស​កម្ពុជា​ធ្វើ​ជា​ម្ចាស់​ផ្ទះ​កីឡាស៊ីហ្គេម​ឆ្នាំ​២០២៣។

លោក ថោង ខុន បាន​មាន​ប្រសាសន៍​ថា ​”គាត់​បាន​និយាយ​ថា នៅ​សល់​ប្រាំបី​ឆ្នាំ​ទៀត​ប៉ុណ្ណោះ​ដល់​កីឡាស៊ីហ្គេម​ហើយ ដូច្នេះគាត់​ប្រហែល​ជា​អាច​បាន​ឃើញ​កីឡា​នេះ​ ប៉ុន្តែ​ឥឡូវ​នេះ​យើង​បាន​បាត់​បង់​គាត់​ហើយ​”៕ សារុន​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស