35 C
Phnom Penh

ក្រសួង​នៅ​តែ​មិន​ច្បាស់​លាស់​​ជុំវិញ​អ្នក​ដែល​ចាំបាច់​ត្រូវ​មាន​លិខិត​អនុញ្ញាត​បម្រើ​ការងារ​

ដោយ ឌឹ ខេមបូឌា ដេលី

បទវិភាគ

ប្រហែល​បី​សប្ដាហ៍​បន្ទាប់ពី​ក្រសួង​មហាផ្ទៃ និង​ក្រសួង​ការ​ងារ​បាន​ប្រកាស​បង្ក្រាប​​ជន​បរទេស​ដែល​គ្មាន​លិខិង​អនុញ្ញាត​បម្រើ​ការ​ងារ ​នៅ​សប្ដាហ៍​នេះ​​មន្ត្រី​អាច​ផ្ដល់​ចម្លើយ​បាន​តិច​តួច​ប៉ុណ្ណោះ​ស្ដីពី​វិធី​ដែល​ជនបរទេស​អាច​អនុវត្ត​​តាម​ច្បាប់​ការ​ងារ​របស់​ប្រទេស​កម្ពុជា​។

យោង​តាម​ច្បាប់​ការ​ងារ​ឆ្នាំ​១៩៩៧ ជនបរទេស​ទាំង​អស់​ដែល​ធ្វើ​ការ​នៅ​ក្នុង​ប្រទេស​កម្ពុជា​ ត្រូវ​បាន​តម្រូវ​ឲ្យ​មាន​លិខិត​​អនុញ្ញាត​បម្រើ​ការ​ងារ​ ប៉ុន្តែច្បាប់​នេះ​មិន​ត្រូវ​បាន​​អនុវត្ត​​រហូត​មក​ទល់នឹង​ពេល​ថ្មីៗ​នេះ។ ច្បាប់​នេះ​​មិន​​​​មាន​ចែង​អំពី​​​និវត្តន៍​ជន​ ឬ​ជនបរទេស​ដែល​រស់​នៅ​ក្នុង​ប្រទេស​កម្ពុជា​​ ប៉ុន្តែ​ដែល​ទទួល​បាន​ប្រាក់​ចំណូល​ពី​បរទេស​ឡើយ​។

ឧត្ដមសេនីយ៍ឯក​​ នៅ លក្ខិណា អគ្គនាយករង​នៃ​អគ្គនាយកដ្ឋាន​អន្តោប្រវេសន៍​​នៃ​ក្រសួង​មហាផ្ទៃ បាន​មាន​ប្រសាសន៍​ថា ប្រសិន​បើ​ជនបរទេស​​រស់​នៅ​ក្នុង​ប្រទេស​កម្ពុជា​លើស​ពី​១ឆ្នាំ តម្រូវ​ឲ្យ​មាន​​លិខិត​អនុញ្ញាត​បម្រើ​ការ​ងារ​នៅ​​ពេល​ដាក់​ពាក្យ​ស្នើ​សុំ​ពន្យារ​ទិដ្ឋាការ​អាជីវកម្ម​។

លោក​មាន​ប្រសាសន៍​ថា “ពួកគេ​មិន​​អាច​ធ្វើ​ការ​នៅ​ក្នុង​ប្រទេស​កម្ពុជា​លើស​ពី​១ឆ្នាំ​​បាន​ទេ “ប្រសិន​បើ​​គ្មាន​លិខិត​អនុញ្ញាត​បម្រើ​ការ​ងារ។ លោក​បាន​បន្ថែម​ថា សម្រាប់​លិខិត​អនុញ្ញាត​បម្រើ​ការ​ងារ​អាច​ដាក់​ពាក្យ​សុំ​បាន​នៅ​ក្រសួង​ការ​ងារ ​ឬ​មន្ទីរ​ការ​ងារ​​ខេត្ត។

ប៉ុន្តែ​លោក​បាន​មាន​ប្រសាសន៍​ថា ពេល​នេះ​នៅ​មិន​ទាន់​មាន​ភាព​ច្បាស់​លាស់​​ទេ​ជុំវិញ​វិធី​ដែល​​និវត្តន៍​ជន​បរទេស​អាច​ស្នាក់​នៅ​ក្នុង​ប្រទេស​កម្ពុជា​បាន​​ដោយ​គ្មាន​លិខិត​អនុញ្ញាត​បម្រើ​ការ​ងារ ឬ​វិធី​ដែល​ពួកគេ​អាច​​​ពន្យារ​ទិដ្ឋាការ​របស់​ខ្លួន​ឡើយ​​។

លោក​​បាន​មាន​ប្រសាសន៍​ទៀត​ថា “យើង​មិន​ទាន់​បាន​​បែង​ចែក​​នៅ​ឡើយ​ទេ​ចំពោះ​និវត្តន៍​ជន​។ វា​ជា​បញ្ហា​។ បញ្ហា​នៅ​ត្រង់​ថា ច្បាប់​នេះ​មិន​មាន​ចែង​អំពី​ទិដ្ឋាការ​និវត្តន៍ជន និង​​មិនមាន​ចែង​អំពី​និវត្តន៍​ជន​”។ លោក​បាន​បង្វែរ​សំណួរ​បន្ថែម​ទៀត​ទៅ​ក្រសួង​ការ​ងារ​។

លោក ហេង សួរ អ្នក​នាំពាក្យ​ក្រសួង​ការ​ងារ​បាន​មាន​ប្រសាសន៍​ថា ក្រសួង​របស់​លោក​​ទទួល​ខុស​ត្រូវ​តែ​ចំពោះ​​ការ​ចេញ​លិខិត​អនុញ្ញាត​បម្រើ​ការ​ងារ​ប៉ុណ្ណោះ។ លោក​បាន​មាន​ប្រសាសន៍​បន្ថែម​ថា “វា​ជាការ​ទទួល​ខុស​ត្រូវ​របស់​ក្រសួង​មហាផ្ទៃ​ក្នុង​ការ​ចេញ​ទិដ្ឋាការ”។

នៅ​ពេល​ទាក់​ទង​កាលពី​ម្សិលមិញ ឧត្ដមសេនីយ៍ឯក នៅ លក្ខិណា បាន​បង្វែរ​សំណួរ​ទៅ​ក្រសួង​ការ​ងារ​ជា​ថ្មី​ម្ដង​ទៀត​។

លោក​ ហេង សួរ បាន​មាន​ប្រសាសន៍​ថា លិខិត​អនុញ្ញាត​​បម្រើ​ការ​ងារ​មាន​តម្លៃ​៤០០.០០០​រៀល (ប្រហែល​១០០ដុល្លារ​) ហើយ​​ជនបរទេស​​ក៏​នឹង​ទទួល​ការ​ពិន័យ​​៤០០.០០០រៀល​បន្ថែម​ផង​ដែរ​សម្រាប់​រាល់​ឆ្នាំ ដែល​ពួកគេ​បាន​រស់នៅ​ក្នុង​ប្រទេស​កម្ពុជា ដោយគ្មាន​លិខិត​អនុញ្ញាត​បម្រើ​ការ​ងារ​។

លោក​បាន​​លើក​ឡើង​បន្ត​ថា តាម​ច្បាប់​ការ​​ងារ​​ ជនបរទេស​​ដែល​ដាក់ពាក្យ​ស្នើ​សុំ​​លិខិត​អនុញ្ញាត​បម្រើ​ការ​ងារ​ក៏​ត្រូវ​បាន​តម្រូវ​​​​ឲ្យ​​ពិនិត្យ​សុខភាព​ផង​ដែរ ដើម្បី​ធានា​ថា ពួកគេ​គ្មាន​ជំងឺ​ឆ្លង​។ ការ​​ធ្វើ​តេស្ត​មាន​តម្លៃ​១០០.០០០​រៀល​ (ប្រហែល​២៥​ដុល្លារ​) ហើយ​ការ​ធ្វើ​តេស្ត​ត្រូវ​​ធ្វើ​ឡើង​ដោយ​ “ពេទ្យ​ការ​ងារ​” នៅ​ក្រសួង​ការ​ងារ​។

ទោះបី​ជា​ទាំង​​ក្រសួង​ការ​ងារ និង​ក្រសួង​មហាផ្ទៃ​សុទ្ធ​តែ​លើក​ឡើង​ថា ការ​ដាក់ពាក្យ​​សុំ​លិខិត​អនុញ្ញាត​បម្រើ​ការងារ​គឺ​ជា​ដំណើរ​ការ​ធម្មតា​ក្ដី ក៏​លោក​ សេឌ្រីក រ៉ាស៊ីន (Cedric Rasine) ដែល​ជា​ម្ចាស់​សណ្ឋាគារ​មួយ​នៅ​ក្រុង​កំពត​បាន​មាន​ប្រសាសន៍​ថា បទ​ពិសោធន៍​របស់​លោក​​គួរ​ឲ្យ​មួរម៉ៅ​​ណាស់។ លោក​មាន​ប្រសាសន៍​ថា ” វា​មិន​ងាយ​ស្រួល​ទេ។ ខ្ញុំ​ត្រូវ​គេ​បញ្ជូន​ពី​ការិយាល័យ​មួយ​ទៅ​ការិយាល័យ​មួយ​​ និង​ទៅ​ការិយាល័យ​មួយ​ទៀត​”។

លោក​បាន​លើក​ឡើង​បន្ត​ថា នៅ​ពេល​លោក​រក​កន្លែង​​ដាក់​ពាក្យ​សុំ​លិខិត​អនុញ្ញាត​បម្រើ​ការ​ងារបាន​​ លោក​ត្រូវ​បង់​១០០ដុល្លារ​ថ្លៃ​លិខិត​អនុញ្ញាត​បម្រើ​ការងារ ២០ដុល្លារ​​សម្រាប់​​ថ្លៃ​​ក្រដាសស្នាម​ និង​១០០ដុល្លារ​​សម្រាប់​ឆ្នាំ​នីមួយៗ​ដែល​លោក​បាន​រស់​នៅ​ក្នុង​ប្រទេស​កម្ពុជា​ដោយ​គ្មាន​លិខិត​បម្រើ​ការងារ​។ លោក​ក៏​ត្រូវ​បង់​៣០ដុល្លារ​សម្រាប់​ការ​ធ្វើ​តេស្ត​ឈាម​ផង​ដែរ ទោះបី​ជា​ជាក់​ស្ដែង​លោក​មិន​ត្រូវ​​តម្រូវ​ឲ្យ​ធ្វើ​តេស្ត​ឈាម​ក្ដី​។ លោក​បាន​​មាន​ប្រសាសន៍​បន្ថែមទៀត​ថា ​”ខ្ញុំ​យល់​​ពី​ភាព​ចាំបាច់​ និង​​ច្បាប់​ដែល​ត្រូវ​មាន​លិខិត​អនុញ្ញាត​​បម្រើ​ការ​ងារ​ ប៉ុន្តែ​បញ្ហា​នៅ​ត្រង់​​​ខ្វះ​​ការ​ទំនាក់ទំនង​”។

លោក​ ស្តាន ខាន់ (Stan Kahn) ​និវត្តន៍ជន​វ័យ​៧៣​ឆ្នាំ ដែល​រស់​នៅ​កំពតដែរ បាន​លើក​ឡើង​ថា អសមត្ថភាព​របស់​រដ្ឋាភិបាល​ក្នុង​ការ​ដោះ​ស្រាយ​​វិធី​ដែល​និវត្តន៍​ជនបរទេស​អាច​រស់​នៅ​ក្នុង​ប្រទេស​​កម្ពុជា​បាន​​ធ្វើ​ឲ្យ​លោក​ព្រួយបារម្ភ​។ លោក​បាន​លើក​ឡើង​បន្ថែម​ថា “ខ្ញុំព្រួយ​បារម្ភ ពីព្រោះ​ខ្ញុំ​ចូល​និវត្ត​ហើយ ដោយ​ពឹង​ផ្អែក​លើ​ចំណូល​បន្តិច​បន្តួច​​ប៉ុណ្ណោះ​។ ប្រសិន​បើ​គេ​ពិន័យខ្ញុំ​ ខ្ញុំ​មិន​អាច​ស្នាក់​នៅ​បាន​ទេ ពីព្រោះ​ខ្ញុំ​​​គ្មាន​ប្រាក់​២.០០០​ដុល្លារ​សម្រាប់​បង់ទេ”៕ សុខុម​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស