យោងតាមវិបសាយនគរបាលជាតិបានឲ្យដឹងថា លោក ស ខេង រដ្ឋមន្ត្រីក្រសួងមហាផ្ទៃ និងសមភាគីវៀតណាមរបស់លោកដែលកំពុងធ្វើទស្សនកិច្ច គឺលោក ត្រឹង ដាយក្វាង បានសម្ពោធសាលានគរបាលដែលចំណាយទឹកប្រាក់២,២លានដុល្លារក្នុងខេត្តកំពង់ស្ពឺកាលពីថ្ងៃសៅរ៍ ដែលសាងសង់ដោយថវិកាវៀតណាម។
ព័ត៌មានលើវិបសាយបានឲ្យដឹងថា រដ្ឋមន្ត្រីក្រសួងសន្តិសុខសាធារណៈរបស់ប្រទេសវៀតណាមបានធ្វើអធិបតីក្នុងការបើកសម្ពោធដាក់ឲ្យប្រើប្រាស់សាលានេះ ដែលស្ថិតនៅលើផ្ទៃដី៣៦ហិកតា ចម្ងាយប្រហែល៩០គីឡូម៉ែត្រ ភាគនិរតីនៃក្រុងភ្នំពេញ។
លោករដ្ឋមន្ត្រីទាំងពីរក៏បានចុះហត្ថលេខាលើផែនការពង្រឹងកិច្ចសហប្រតិបត្តិការក្នុងការប្រយុទ្ធប្រឆាំងឧក្រិដ្ឋកម្មតាមបណ្តោយព្រំដែនរួមរបស់ប្រទេសខ្លួន ដែលភាគច្រើននៅមិនទាន់កំណត់ជាផ្លូវការនៅឡើយ និងបានព្រមព្រៀងថា ប្រទេសកម្ពុជានឹងបញ្ជូននគរបាលទៅប្រទេសវៀតណាមដើម្បីទទួលការបណ្តុះបណ្តាល។
អ្នកនាំពាក្យនគរបាលជាតិនិងក្រសួងមហាផ្ទៃមិនអាចទាក់ទងសុំការអត្ថាធិប្បាយបានទេ។
ទីភ្នាក់ងារសារព័ត៌មានកម្ពុជាបានរាយការណ៍កាលពីថ្ងៃសៅរ៍ថា លោក ដាយក្វាង បានជួបជាមួយលោកនាយករដ្ឋមន្ត្រី ហ៊ុន សែនដែរក្នុងក្រុងភ្នំពេញកាលពីថ្ងៃសុក្រ ប៉ុន្តែមិនបានផ្តល់សេចក្តីពិស្តារថាអ្នកទាំងពីរបានពិភាក្សាគ្នាអំពីអ្វីនោះទេ។
នៅថ្ងៃសៅរ៍នោះដែរ ទីភ្នាក់ងារសារព័ត៌មានវៀតណាមបានរាយការណ៍ថា លោក នឹម សុវ៉ាត អគ្គនាយកនៃអគ្គនាយកដ្ឋានគោលនយោបាយនិងកិច្ចការបរទេសនៃក្រសួងការពារជាតិ និងវរសេនីយ៍ឯក ង្វៀន អាញ់ ជុង អនុព័ន្ធយោធាវៀតណាមប្រចាំប្រទសកម្ពុជា បានចុះហត្ថលេខាលើកិច្ចព្រមព្រៀងមួយកាលពីថ្ងៃសុក្រ ដែលប្រទេសវៀតណាមនឹងសាងសង់ “វិទ្យាស្ថានប្រវត្តិសាស្ត្រយោធា “មួយសម្រាប់កងកម្លាំងខេមរភូមិន្ទក្នុងក្រុងភ្នំពេញ។
អត្ថបទមានខ្លឹមសារថា ប្រទេសវៀតណាមបានទិញឧបករណ៍រួចរាល់ហើយដើម្បីសង់វិទ្យាស្ថាននេះ ប៉ុន្តែមិនបានឲ្យដឹងថា គម្រោងនេះនឹងត្រូវចំណាយអស់ប្រាក់ប៉ុន្មាននោះទេ។
ទាំងឧត្តមសេនីយ៍ឯក នឹម សុវ៉ាត ទាំងអ្នកនាំពាក្យក្រសួងការពារជាតិមិនអាចទាក់ទងបានទេ។
រដ្ឋាភិបាលក្រុងភ្នំពេញនិងរដ្ឋាភិបាលក្រុងហាណូយបានរក្សាទំនាក់ទំនងជិតស្និទ្ធ ចាប់តាំងពីប្រទេសវៀតណាមបានចូលលុកលុយប្រទេសកម្ពុជា ដើម្បីផ្តួលរំលំរបបខ្មែរក្រហមកាលពីឆ្នាំ១៩៧៩។ ប្រទេសវៀតណាមបានកាន់កាប់ប្រទេសកម្ពុជាអស់រយៈពេលមួយទសវត្សរ៍ ដែលអំឡុងពេលនោះ វៀតណាមបានលើកបន្តុបមនុស្សជាច្រើននាក់ ដែលកំពុងគ្រប់គ្រងប្រទេសនៅឡើយ ក្នុងនោះមានលោកនាយករដ្ឋមន្ត្រី ហ៊ុន សែន ដែលបានកាន់អំណាចរយៈពេល៣០ឆ្នាំមកហើយគិតត្រឹមសប្តាហ៍មុននេះ៕មានិត