ទីភ្នាក់ងារសារព័ត៌មានកម្ពុជា (AKP) បានរាយការណ៍កាលពីថ្ងៃសុក្រថា រដ្ឋាភិបាលកម្ពុជាមានផែនការស្នើសុំជាផ្លូវការឲ្យអង្គការយូណេស្កូដាក់បញ្ជូលទីក្រុងចំនួនបីរបស់ប្រទេសកម្ពុជាក្នុងបញ្ជីបេតិកភណ្ឌពិភពលោក។
យោងតាមទីភ្នាក់ងារសារព័ត៌មានកម្ពុជាបានឲ្យដឹងថា ទីក្រុងទាំងនោះគឺក្រុងបាត់ដំបង ក្រុងកំពត និងក្រុងក្រចេះ។
លោក ច័ន្ទ សុផល អភិបាលខេត្តបាត់ដំបងបានមានប្រសាសន៍កាលពីថ្ងៃអាទិត្យថា គោលបំណងចម្បងនៃសំណើរបស់រដ្ឋាភិបាល ទាក់ទិននឹងទីក្រុងក្នុងខេត្តរបស់លោក គឺដើម្បីអភិរក្សអគារសម័យអាណានិគមបារាំងចំនួនរាប់រយនៅទីនោះ។
លោកបានមានប្រសាសន៍ថា “គោលបំណងនៃការចុះបញ្ជីនេះ គឺទី១ ការពារអគារដែលមានរចនាបថសិល្បៈនាសម័យមុន ទី២ ការពារទ្រព្យសម្បត្តិវប្បធម៌ដែលបន្សល់ទុកដោយមនុស្សជំនាន់មុនៗ និងទី៣ ធ្វើឲ្យទីក្រុងរបស់យើងល្បីល្បាញ”។
លោក សុផល មានប្រសាសន៍ថា ក្រុមការងារកំពុងធ្វើការកំណត់អត្តសញ្ញាណអគារដែលត្រូវការពារ ត្រូវគេរំពឹងថានឹងបញ្ចប់ការងាររបស់ខ្លួននៅត្រឹមខែកក្កដាខាងមុខនេះ។
ទាំងលោក ខូយ ឃុនហួ អភិបាលខេត្តកំពត ទាំងលោក ស ចំរុង អភិបាលខេត្តក្រចេះ បាននិយាយថា ពួកលោកមិនបានដឹងអំពីផែនការរបស់រដ្ឋាភិបាល ក្នុងការស្នើសុំអង្គការយូណេស្កូដាក់ទីក្រុងក្នុងខេត្តរបស់ខ្លួនជាបេតិកភណ្ឌទេ។ លោកស្រី Anne Lemaistre តំណាងយូណេស្កូប្រចាំប្រទេស មិនអាចទាក់ទងបានទេកាលពីថ្ងៃអាទិត្យ៕មានិត