លោកឧបនាយករដ្ឋមន្ត្រី ប៊ិន ឈិន បានឲ្យដឹងកាលពីម្សិលមិញថា លោកបានធ្វើសេចក្ដីព្រាងច្បាប់មួយសម្រាប់ច្បាប់បោះឆ្នោតថ្មី ដែលនឹងហាមឃាត់មិនឲ្យជនបរទេស និងអង្គការមិនមែនរដ្ឋាភិបាលបញ្ចេញមតិយោបល់ទាក់ទិននឹងរឿងនយោបាយអំឡុងការបោះឆ្នោត។
លោក ប៊ិន ឈិន កំពុងតែដឹកនាំគណបក្សប្រជាជនកម្ពុជានៅក្នុងការចរចាជាមួយគណបក្សសង្គ្រោះជាតិ ដែលមានលោក គួយ ប៊ុនរឿន ជាអ្នកដឹកនាំក្រុមចរចាដើម្បីធ្វើវិសោធនកម្មច្បាប់បោះឆ្នោតថ្មី ក្រោយកិច្ចព្រមព្រៀងកាលពីខែមុនក្នុងគោលបំណងបង្កើតគណៈកម្មាធិការជាតិរៀបចំការបោះឆ្នោតថ្មី ដែលមានសមាជិកមកពីគណបក្សទាំងពីរចូលរួម។
នៅពេលចាកចេញពីកិច្ចពិភាក្សាស្ដីអំពីកំណែទម្រង់បោះឆ្នោតកាលពីម្សិលមិញ លោក ប៊ិន ឈិន បានលើកឡើងថា គណបក្សទាំងពីរបានពិភាក្សាអំពីច្បាប់ថ្មីទាក់ទិននឹងម៉ោងដែលមន្ត្រីត្រូវមកដល់មណ្ឌលបោះឆ្នោត ប៉ុន្តែថា លោកកំពុងតែធ្វើការលើប្រធានបទមួយដែលសំខាន់ជាងនេះ។
លោកបានមានប្រសាសន៍ថា “ខ្ញុំបានសរសេរសេចក្ដីព្រាងច្បាប់ដើម្បីបញ្ជាក់ថា នៅថ្ងៃបោះឆ្នោត អំឡុងពេលរាប់សន្លឹកឆ្នោត និងពេលប្រកាសលទ្ធផលឆ្នោត អង្គការមិនមែនរដ្ឋាភិបាល សមាគមក្នុងស្រុក និងក្រៅប្រទេសដែលមានប្រតិបត្តិការនៅក្នុងប្រទេសកម្ពុជា ឬជនបរទេសគួរតែប្រកាន់ជំហរឯករាជ្យ អព្យាក្រឹត ហើយមិនត្រូវលម្អៀងឡើយ”។
លោកបានមានប្រសាសន៍បន្ថែមទៀតថា “នោះគឺយើងចង់មានន័យថា ពួកគេមិនគួរនិយាយអីចេះឬអីចុះឡើយ ព្រោះពួកគេត្រូវតែអព្យាក្រឹត ហើយមិនគួរគាំទ្រគណបក្សនយោបាយនេះឬគណបក្សនយោបាយនោះឡើយ”។
នៅពេលអ្នកយកព័ត៌មានម្នាក់សួរដើម្បីបញ្ជាក់ថា តើនរណាដែលច្បាប់ថ្មីនេះមានគោលដៅលើ មន្ត្រីគណបក្សប្រជាជនកម្ពុជារូបនេះបានលើកឡើងថា វានឹងមានគោលដៅលើជនបរទេសណាដែលបញ្ចេញមតិយោបល់របស់ខ្លួន។
លោក ប៊ិន ឈិន បានមានប្រសាសន៍ថា “ជនបរទេសរស់នៅក្នុងប្រទេសកម្ពុជា ដែលចេញមកចូលរួមជាមួយយុទ្ធនាការឃោសនាបោះឆ្នោត ហើយបញ្ចេញមតិយោបល់នោះ នឹងត្រូវហាមឃាត់ទាំងស្រុង ព្រោះវានឹងធ្វើឲ្យខូចបរិយាកាសបោះឆ្នោត ការរាប់សន្លឹកឆ្នោត និងការប្រកាសលទ្ធផលនៃការបោះឆ្នោត”។
លោក ប៊ិន ឈិន មិនបានបញ្ជាក់ឲ្យចំៗថា តើការបញ្ចេញមតិយោបល់បែបម៉េចដែលច្បាប់ហាមឃាត់នោះឡើយ។ លោកទំនងជាបន្ថែមទៅលើសេចក្ដីថ្លែងការណ៍របស់លោក ដោយលើកឡើងថា មានតែពាក្យ “មាក់ងាយ” ទេដែលនឹងត្រូវហាមឃាត់ ព្រោះវាមានចែងនៅក្នុងក្រមព្រហ្មទណ្ឌរបស់ប្រទេសកម្ពុជារួចហើយ។
លោក គួយ ប៊ុនរឿន បានលើកឡើងកាលពីសប្ដាហ៍មុនថា លោកគាំទ្រចំពោះការហាមមិនឲ្យអង្គការមិនមែនរដ្ឋាភិបាលផ្ដល់កិច្ចសម្ភាសន៍ជាមួយប្រព័ន្ធផ្សព្វផ្សាយ ឬការហាមមិនឲ្យចេញសេចក្ដីថ្លែងការណ៍ដែលពោរពេញទៅដោយការរិះគន់ និងការមាក់ងាយ។ កាលពីម្សិលមិញលោកបានឆ្លើយដោយមានភាពមិនច្បាស់លាស់នៅពេលគេសួរថា តើលោកគាំទ្រសំណើថ្មីបំផុតរបស់លោក ប៊ិន ឈិន នេះឬក៏អត់។
លោកបានមានប្រសាសន៍ថា “យើងគាំទ្រគំនិតណាមួយដែលធ្វើឲ្យសេរីភាពនៃការបញ្ចេញមតិប្រសើរឡើង ប៉ុន្តែយើងមិនគាំទ្រគំនិតណាមួយដែលរឹតបន្តឹងលើសេរីភាពនៃការបញ្ចេញមតិឡើយ”៕ ស៊ុយឈាង