កាលពីម្សិលមិញ អាជ្ញាធររាជធានីភ្នំពេញបានច្រានចោលសំណើរបស់ក្រុមអ្នកតវ៉ាសុំធ្វើបាតុកម្មរយៈពេល១ខែ នៅទីលានប្រជាធិបតេយ្យក្នុងរាជធានីភ្នំពេញ ដើម្បីទាមទារឲ្យដោះលែងសកម្មជន១០នាក់ ដែលជាប់ពន្ធនាគារ ហើយបានបដិសេធមិនទទួលយកញត្តិរបស់ពួកគាត់ទាមទារឲ្យរកដំណោះស្រាយចំពោះវិវាទដីធ្លីជាយូរមកហើយឡើយ។
អ្នកភូមិប្រហែល១០០នាក់មកពីតំបន់បឹងកក់ និងបុរីកីឡាកន្លែងដែលពួកគាត់បានធ្វើការតវ៉ានឹងការបណ្ដេញចេញដោយបង្ខំពីសហគមន៍របស់ខ្លួនរយៈពេលច្រើនឆ្នាំមកហើយនោះ បានប្រមូលផ្តុំគ្នានៅមុខសាលារាជធានីភ្នំពេញកាលពីព្រឹកម្សិលមិញ ដើម្បីបន្តទាមទារសុំជំនួយ។
កាលពីខែវិច្ឆិកា សាលាដំបូងរាជធានីភ្នំពេញបានផ្ដន្ទាទោសសកម្មជន១០នាក់ដាក់ពន្ធនាគារ ដែលប្រាំបួននាក់មកពីតំបន់បឹងកក់ និងម្នាក់មកពីតំបន់បុរីកីឡានៅក្នុងបាតុកម្មចំនួនពីរលើក ដោយផ្ដន្ទាទោសពួកគេដាក់ពន្ធនាគាររយៈពេល១ឆ្នាំ។
ក្រៅពីច្រានចោលសំណើរបស់ក្រុមអ្នកតវ៉ាកាលពីម្សិលមិញសុំធ្វើបាតុកម្មរយៈពេល១ខែទាមទារឲ្យដោះលែងសកម្មជននោះ សាលារាជធានីមិនបានបញ្ជូនមន្ត្រីណាម្នាក់ឲ្យចេញមកទទួលយកញត្តិរបស់ពួកគាត់ឡើយ។
ញត្តិនោះទាមទារឲ្យសាលារាជធានីដាក់សម្ពាធលើក្រុមហ៊ុនឯកជន ដែលអភិវឌ្ឍតំបន់បុរីកីឡាឲ្យសាងសង់ប្លុកផ្ទះល្វែងពីរចុងក្រោយក្នុងចំណោមប្លុកផ្ទះល្វែងទាំង១០ ដែលបានសន្យាចំពោះអ្នកដែលត្រូវបានបណ្ដេញចេញទាំងនោះ។
ញត្តិនេះក៏បានស្នើឲ្យសាលារាជធានីអនុញ្ញាតឲ្យអ្នកភូមិបឹងកក់១៦គ្រួសារ ដែលរស់នៅផ្នែកខាងលិចនៃអតីតតំបន់នេះផ្លាស់ទៅរស់នៅលើដីទំហំ១២,៤៤ហិកតានៅផ្នែកខាងកើត ហើយផ្តល់ប័ណ្ណកម្មសិទ្ធិដល់ពួកគាត់។
លោក ចាន់ ពុទ្ធិស័ក្តិ អ្នកតវ៉ាម្នាក់បាននិយាយថា យើងមិនអាចរង់ចាំយូរជាងនេះពាក់ព័ន្ធវិវាទដីធ្លីនេះបានឡើយ។ អ្នកភូមិជាច្រើនត្រូវបានចាប់ដាក់ពន្ធនាគារ ប៉ុន្តែបញ្ហានៅតែមិនត្រូវបានដោះស្រាយដដែល។
បន្ទាប់ពីត្រូវបានរុញច្រានឲ្យចេញពីសាលារាជធានីដោយសន្តិសុខរាជធានី និងសន្តិសុខខណ្ឌដូនពេញដែលបានចាប់យកមីក្រូរបស់ក្រុមអ្នកតវ៉ានោះ ក្រុមនេះបានហែក្បួនទៅរដ្ឋសភា ដែលនៅទីនោះពួកគាត់បានប្រគល់ញត្តិទៅឲ្យលោក ជា ប៉ូច សមាជិកសភាគណបក្សប្រឆាំង ដែលបានប្តេជ្ញាជួយពួកគាត់ជំរុញករណីរបស់ពួកគាត់ជាមួយលោក បា៉ សុជាតិវង្ស អភិបាលរាជធានីភ្នំពេញ។
នៅពេលត្រូវបានទាក់ទងក្នុងល្ងាចថ្ងៃដដែលនោះ លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា សាលារាជធានីគ្មានជម្រើសក្រៅពីច្រានចោលសំណើរបស់អ្នកតវ៉ា ដែលសុំធ្វើបាតុកម្មរយៈពេល១ខែនោះឡើយ។
លោកបានមានប្រសាសន៍ថា “យើងមិនអនុញ្ញាតឲ្យនរណាម្នាក់ធ្វើបាតុកម្មនៅទីលានប្រជាធិបតេយ្យឡើយ ពីព្រោះគ្មានច្បាប់អនុញ្ញាតឲ្យអ្នកតវ៉ាធ្វើបាតុកម្មរយៈពេល១ខែនៅទីនោះឡើយ”។
ជាការពិត ច្បាប់ស្ដីពីការជួបជុំគ្នាដោយអហិង្សាមិនបានកំណត់ពេលវេលាថា តើបាតុកម្មអាចធ្វើយូរប៉ុណ្ណានោះឡើយ។ ច្បាប់ក៏មិនបានតម្រូវឲ្យសុំការអនុញ្ញាតពីសាលារាជធានីដើម្បីធ្វើបាតុកម្មដែរ ប៉ុន្តែចែងថា អ្នករៀបចំការតវ៉ាត្រូវជូនដំណឹងដល់សាលារាជធានីអំពីផែនការរបស់ខ្លួនជាមុន។
ច្បាប់តម្រូវឲ្យសាលារាជធានីអនុញ្ញាតឲ្យការតវ៉ាបន្តបាន លុះណាតែការតវ៉ានោះធ្វើឡើងចំថ្ងៃឈប់សម្រាក បើមិនដូច្នោះទេអាចបណ្ដាលឲ្យមានគ្រោះថ្នាក់ ឬអាចប៉ះពាល់ដល់សន្តិសុខ សុវត្ថិភាព និងសណ្ដាប់ធ្នាប់សាធារណៈ”។ អង្គការសិទ្ធិមនុស្សបានចោទប្រកាន់រដ្ឋាភិបាលចំពោះការបកស្រាយលក្ខខណ្ឌទាំងនេះទូលំទូលាយពេក៕ សារុន