29 C
Phnom Penh

មន្ត្រី​ខេត្ត​ព្រះសីហនុ​គំរាម​ធ្វើ​កូដកម្ម​ ប្រសិន​បើ​​ក្រសួង​មហាផ្ទៃ​​មិន​ស៊ើបអង្កេត​អភិបាល​ខេត្ត​នេះ​

ដោយ ឌឹ ខេមបូឌា ដេលី

បទវិភាគ

មន្ត្រី​នៅ​ក្នុង​ខេត្ត​​ព្រះសីហនុ​​កំពុង​គំរាម​​ធ្វើ​កូដកម្ម​​ ប្រសិន​បើ​ក្រសួង​មហាផ្ទៃ​​មិន​​ធ្វើ​ការ​ស៊ើបអង្កេត​លើ​ការ​អះអាង​របស់ពួកគេ​អំពី​បក្ខ​ពួក​និយម និង​​ការ​អសមត្ថភាព​​របស់​លោក ឈិត សុខុន អភិបាល​ខេត្ត​នេះទេ​នោះ​។

លិខិត​ចុះ​ថ្ងៃទី​១៦ ខែ​មករា ផ្ញើជូន​លោក ស ខេង រដ្ឋមន្ត្រី​ក្រសួង​មហាផ្ទៃ​ដែល​ទទួល​បាន​កាលពី​ម្សិលមិញ មន្ត្រី​ថ្នាក់​ខេត្ត​ចំនួន​៣៥​រូប​​បាន​ចោទ​ប្រកាន់​លោក ឈិត សុខុន ​ថា​​ព្យាយាម​ដំឡើង​តំណែង​កូន​ប្រុស​របស់​លោក គឺ​លោក ឈិត រតនៈ ទៅ​ជា​ប្រធាន​រដ្ឋបាល​ខេត្ត និង​មិត្ត​ភក្ដិ​របស់​លោកឈ្មោះ ស កក្កដា ទៅ​ជា​អភិបាល​រង​ខណ្ឌ​ព្រៃនប់ ដោយ​រំលង​​យោបល់​ថ្នាក់​លើ​។

ពួកគេ​ក៏​បាន​ចោទ​ប្រកាន់​អភិបាល​ខេត្ត​រូប​នេះ​ពីបទ​ពន្យារ​ពេល​លិខិត​ស្នាម​ និង​ដឹកនាំ​ខេត្ត​តាមតែ​អំពើ​ចិត្ត​របស់​ខ្លួន​ផង​ដែរ​ ដោយ​ធ្វើ​ឲ្យ​មាន​ភាព​តានតឹង ការ​ធ្លាក់​ទឹក​ចិត្ត និង​ការ​មិន​ពេញ​ចិត្ត​ក្នុង​ចំណោម​មន្ត្រី​នៅ​ក្នុង​ខេត្ត​នេះ​។

ពាក្យ​បណ្ដឹង​នេះ​មាន​ខ្លឹម​សារ​ដូច្នេះ​ថា “អភិបាល​ខេត្ត​កំពុង​ធ្វើការ​ងារ​ដោយ​គ្មាន​ផែន​ការ​ច្បាស់​លាស់​ គឺ​មានន័យ​ថា គាត់​នឹង​ធ្វើ​អ្វីៗឬ​​ចេញ​បទបញ្ជា​​ឲ្យ​ធ្វើ​អ្វី​មួយ​ភ្លាមៗ​តាម​តែ​ចិត្ត​គាត់​នឹកឃើញ​ ឧទាហរណ៍​ ដូច​ជា​នៅ​ក្នុង​កិច្ច​ប្រជុំជាដើម​។ ទាំង​នេះ​ធ្វើ​ឲ្យ​មន្ត្រី​ក្រោម​ការ​ដឹកនាំ​របស់​គាត់​​​​មាន​អារម្មណ៍​ធ្លាក់​ទឹកចិត្ត​ ធ្វើ​ឲ្យ​បែក​បាក់​ផ្ទៃក្នុង​ និង​បង្កើត​ឲ្យ​មាន​ការ​ខ្វែង​​គំនិត​គ្នា​រវាង​មន្ត្រី​ និង​ថ្នាក់​ដឹកនាំ​។ គ្មាន​ការ​ណែនាំ​ ឬការ​លើក​ទឹក​ចិត្តឡើយ​នៅ​ពេល​មន្ត្រី​ធ្វើ​ខុស​ គឺ​មាន​តែ​​ការ​ស្ដីបន្ទោស​”។ មន្ត្រី​ដែល​ដាក់​ពាក្យ​ប្ដឹង​​ទាំង​នេះ​​ទទូច​សុំ​ឲ្យ​រដ្ឋមន្ត្រី​ក្រសួង​មហាផ្ទៃ​បញ្ជូន​ក្រុម​ការ​ងារ​មក​ខេត្ត​នេះ ដើម្បី​ស៊ើបអង្កេត​លើ​ការ​អះអាង​របស់ពួកគេ “ដើម្បី​ចាត់វិធានការ​តាម​ផ្លូវ​ច្បាប់”។

ពាក្យ​បណ្ដឹង​នេះ​មាន​ខ្លឹមសារ​បន្ត​ដូច្នេះ​ថា “យើង​នឹង​ធ្វើ​កូដកម្ម ហើយ​នឹង​មិន​ទៅ​ធ្វើ​ការ​ឡើយ​ ប្រសិន​បើ​គ្មាន​ការ​ស៊ើបអង្កេត និង​ការ​ចាត់​វិធានការ​ទេ​នោះ​”។

មន្ត្រី​ដាក់​ពាក្យ​​ប្ដឹង​មួយ​ចំនួន​​ដែល​គេ​ទាក់​ទង​កាលពី​ម្សិលមិញ បាន​បដិសេធ​មិន​រៀបរាប់​អំពីការ​អះ​អាង​របស់ពួកគេ​ប្រឆាំង​នឹង​អភិបាល​ខេត្ត​រូប​នេះ​ឡើយ ហើយ​ក៏​មិន​បាន​ពន្យល់​ថា តើ​ការ​​ចោទ​ប្រកាន់​អ្វី​ដែល​ពួកគេ​គិត​ថា តុលាការ​គួរ​តែ​ដាក់​បន្ទុក​លើ​អភិបាល​ខេត្ត​រូប​នេះ​ដែរ។ ពួកគេ​​ក៏​មិន​បាន​ផ្ដល់​កាលបរិច្ឆេទ​សម្រាប់​ឱសានុវាទ​របស់​ខ្លួន​ដែរ។

គេ​មិន​អាច​ទាក់​ទង​លោក សុខុន សុំការ​ធ្វើ​អត្ថាធិប្បាយ​បាន​ឡើយ​។

តែ​ទោះ​ជាយ៉ាង​ណា លោក លី ឌី ក្រុម​ប្រឹក្សា​ខេត្ត​របស់​គណបក្ស​សង្គ្រោះ​ជាតិ​​ និង​លោកស្រី​ ជាប សុធារី អ្នក​ឃ្លាំមើល​នៅ​អង្គការ​សិទ្ធិ​មនុស្ស​អាដហុក​ប្រចាំ​ខេត្ត​នេះ​ក៏​នៅ​តែ​​​បាន​លើក​សរសើរ​ចំពោះ​អភិបាល​ខេត្ត​រូប​នេះ ​អំឡុង​​ការ​កាន់​តំណែង​​ជិត​មួយ​ឆ្នាំ​របស់​លោក​​។

​លោក លី ឌី​ បាន​លើក​ឡើង​ថា លោក សុខុន ដែល​ជា​សមាជិក​មួយ​រូប​របស់​គណបក្ស​ប្រជាជន​កម្ពុជា ទទួល​បាន​ប្រជាប្រិយភាព​មួយ​ចំនួន​ពីប្រជាពលរដ្ឋ​ ដោយ​សារ​​ការ​ខិត​ខំ​ធ្វើ​ការ​ងារ​របស់​លោក ហើយ​​ថ្នាក់​ក្រោម​មួយ​ចំនួន​ដែល​មាន​ការ​​តូចចិត្ត​តូច​ថ្លើម​​គឺ​​ប្រហែល​ដោយ​សារ​ការ​ខិត​ខំ​ធ្វើ​ការ​​ងារ​របស់​លោក សុខុន ​ប៉ះពាល់​ដល់​ផលប្រយោជន៍​របស់​ពួកគេ។​ ប៉ុន្តែ​លោក​បាន​បដិសេធ​មិន​​និយាយ​អំពី​អត្ថប្រយោជន៍​ទាំង​នោះ​ឡើយ ព្រោះ​ខ្លាច​ក្រែង​ធ្វើ​ឲ្យ​មន្ត្រី​​ដូច​គ្នា​ផ្សេងៗ​ទៀត​មាន​ការ​ខឹង​សម្បារ។

លោក​ លី ឌី បានមាន​ប្រសាសន៍​ថា “ខ្ញុំ​មិន​ចង់​និយាយ​អំពី​រឿង​ល្អ​របស់​គាត់​ទេ ប៉ុន្តែ​ខ្ញុំ​ទទួល​បាន​ដំណឹង​ពី​អ្នកភូមិ​មូលដ្ឋាន​មក​ថា គាត់​គួរ​ឲ្យ​កោត​សរសើរណាស់​។ ខ្ញុំ​គិត​ថា អ្វី​ដែល​គាត់​កំពុង​ធ្វើ​គឺ​ប៉ះពាល់​ដល់​ប្រយោជន៍​របស់​មន្ត្រី​ទាំង​នោះ”។

រីឯ​លោកស្រី ជាប សុធារី វិញ​​បាន​សរសើរ​អភិបាល​ខេត្ត​រូប​នេះ​ ដោយ​សារ​លោក​ដក​ហូត​ដីសាធារណៈ​តាម​បណ្ដោយ​ឆ្នេរ​នានា​ក្នុង​ក្រុង​ព្រះសីហនុពី​ក្រុម​ហ៊ុន​អភិវឌ្ឍន៍​ឯកជន​ ហើយ​​ថា ​អ្វី​ដែល​មន្ត្រី​ទាំង​នោះ​បាន​​​ចោទ​ប្រកាន់​គឺ​វា​ផ្ទុយ​ទៅ​នឹង​អ្វី​ដែល​គាត់​បាន​ធ្វើ​សព្វ​ថ្ងៃ ព្រោះ​ថា គាត់​ធ្វើ​ការ​ងារ​​បាន​លឿន​ និង​មាន​​ប្រសិទ្ធភាព​​ជាង​អ្នក​កាន់​តំណែង​មុន​លោក​។

លោកស្រី​បាន​មាន​ប្រសាសន៍​ថា “គាត់​ចេះ​ជួយ​ពល​រដ្ឋ​ខ្លាំង​ណាស់​ ចាប់​តាំង​ពី​គាត់​ឡើង​កាន់​តំណែង​មក។ គាត់​មាន​ការ​យក​ចិត្ត​ទុក​ខ្លាំង​នៅ​ពេល​ធ្វើការ​សម្រាប់​ប្រយោជន៍​សាធារណៈ។ ឧទាហរណ៍​ដូច​ជា គាត់​បាន​​​ដឹកនាំ​នៅ​ក្នុង​ការ​​ដក​ហូត​ដី​​នៅ​ឆ្នេរ​អូរត្រេះ​មក​វិញជា​ដើម​”។

លោក​ស្រី​បាន​បន្ថែម​ថា “នៅ​ពេល​ពលរដ្ឋ​ និង​នៅពេល​ខ្ញុំ​ចង់​យក​ឯកសារ​ទៅ​ចុះ​ហត្ថលេខា ឬប្រថាប់​ត្រា​ មាន​មន្ត្រីជាច្រើន​នៅទីនោះ​បាន​មក​ទទួល​យក​ឯកសារ​ទាំង​នេះ ហើយ​បោះ​ត្រា​ឲ្យ​យើង​ ហេតុដូច្នេះ​វា​មាន​ដំណើរ​ការ​លឿន​។ ប្រសិន​បើ​គាត់​ទទួលបាន​ពាក្យ​បណ្ដឹង​ គាត់​មិន​ទុក​យូរ​ពេក​ទេ​ គឺ​​គាត់​​ចាត់​តាំង​មន្ត្រី​របស់​ខ្លួន​ឲ្យទៅ​ធ្វើការ​ភ្លាម”។

លោក ខៀវ សុភ័គ អ្នកនាំពាក្យ​ក្រសួង​មហាផ្ទៃ​បាន​លើក​ឡើង​ថា លោក​​ឃើញ​ពាក្យ​បណ្ដឹង​នោះ​ហើយ ប៉ុន្តែបាន​បដិសេធ​មិន​និយាយ​ថា តើ​នឹង​មាន​វិធានការ​យ៉ាង​ដូច​ម្ដេច​ចំពោះ​ពាក្យ​បណ្ដឹង​នេះ​ឡើយ​៕ ស៊ុយឈាង​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស