កាលពីម្សិលមិញ សកម្មជន១១រូបដែលត្រូវបានតុលាការចោទប្រកាន់កាលពីខែវិច្ឆិកា ពីបទបិទចរាចរណ៍ និងរារាំងមន្ត្រីសាធារណៈនោះសុទ្ធតែបានអះអាងថា ខ្លួនគ្មានកំហុសក្នុងសវនាការនៅសាលាឧទ្ធរណ៍ដែលមានការចូលរួមស្ដាប់ពីសំណាក់លោក សុរិយា ស៊ូបេឌី ប្រសិតសិទ្ធិមនុស្សអង្គការសហប្រជាជាតិប្រចាំកម្ពុជា និងគណៈប្រតិភូបរទេសមួយចំនួនទៀត។
ប្រាំពីររូបក្នុងចំណោមសកម្មជនទាំងនេះ ដែលរួមមានអ្នកស្រី ទេព វន្នី ជាអ្នកតវ៉ាប្រឆាំងការបណ្ដេញចេញដ៏ល្បីឈ្មោះផងនោះ ត្រូវបានចាប់ខ្លួនអំឡុងបាតុកម្មមួយនៅខាងមុខសាលារាជធានីភ្នំពេញកាលពីខែវិច្ឆិកា បន្ទាប់ពីបានលើកគ្រែមួយដាក់នៅចំកណ្ដាលមហាវិថីព្រះមុនីវង្ស។ ចំណែកឯសកម្មជនបួនរូបទៀត ដែលរួមមានអតីតព្រះសង្ឃព្រះនាម សឹង ហៃ ផង ត្រូវបានចាប់ខ្លួននៅថ្ងៃបន្ទាប់អំឡុងការតវ៉ាមួយនៅខាងក្រៅសាលាដំបូងរាជធានីភ្នំពេញ ប្រឆាំងនឹងការចាប់ខ្លួនសកម្មជនទាំងប្រាំពីររូបខាងលើ។
បន្ទាប់ពីកាត់ក្ដីយ៉ាងប្រញាប់ប្រញាល់ ដែលជាទូទៅគេមើលឃើញថា ជាហេតុផលនយោបាយនោះ សាលាដំបូងរាជធានីភ្នំពេញបានធ្វើការចោទប្រកាន់សកម្មជនទាំង១១រូបនេះ ដោយប្រាំពីររូបជាប់ចោទពីបទបិទចរាចរណ៍ និងបួររូបទៀតពីបទរារាំងមន្ត្រីសាធារណៈ និងផ្ដន្ទាទោសពួកគេឲ្យជាប់ពន្ធនាគាររយៈពេល១ឆ្នាំ។
នៅឯសវនាការសាលាឧទ្ធរណ៍កាលពីម្សិលមិញ អ្នកស្រី ទេព វន្នី បានបដិសេធថា គ្រែរបស់ពួកគាត់មិនបានបង្កការកកស្ទះចរាចរណ៍ទេ។ អ្នកស្រីនិយាយថា “មូលហេតុដែលយើងយកគ្រែទៅកាន់សាលាក្រុង គឺដោយសារតែយើងចង់បង្ហាញថា យើងគ្មានកន្លែងដេកទេ ពីព្រោះផ្ទះរបស់យើងត្រូវទឹកជន់លិចអស់ហើយ”។
ប្រជាពលរដ្ឋដែលរស់នៅតំបន់បឹងកក់ បានចោទប្រកាន់ក្រុមហ៊ុនស៊ូកាគុ របស់លោក ឡាវ ម៉េងឃិន សមាជិកព្រឹទ្ធសភាគណបក្សប្រជាជនកម្ពុជាថា បានបណ្ដេញប្រជាពលរដ្ឋរាប់ពាន់គ្រួសារឲ្យចេញពីសហគមន៍នេះដោយខុសច្បាប់ ហើយបានបន្ទោសការបូមខ្សាច់លុបបឹងនេះថា ជាមូលហេតុធ្វើឲ្យផ្ទះរបស់ពួកគាត់ត្រូវទឹកជន់លិចជាប្រចាំអំឡុងរដូវវស្សា។
អ្នកស្រី ទេព វន្នី និយាយថា “មនុស្សប្រហែល១០នាក់បានឈរនៅកណ្ដាលផ្លូវ ប៉ុន្តែយើងមិនបានបង្កការកកស្ទះចរាចរណ៍ទេ”។
លោកស្រី សំ សុគន្ធា ជាមេធាវីមួយរូបក្នុងចំណោមមេធាវីការពារចុងចោទទាំងនេះ បានលើកឡើងជាទឡ្ហីករណ៍ថា ប្រសិនបើអាជ្ញាធរជឿថា កូនក្ដីរបស់លោកស្រីមានទោស ពួកគេក៏គួរតែចាប់អ្នកគ្រប់គ្នាដែលចតយានយន្តលើផ្លូវនៅខាងមុខភោជណីយដ្ឋាននានាផងដែរ។
ព្រះរាជអាជ្ញា ង៉ែត សារ៉ាត់ បានឆ្លើយតបទៅវិញតាមរយៈការអានសក្ខីកម្មពីមន្ត្រីនគរបាលមួយរូប ដែលបានលើកឡើងថា អ្នកតវ៉ាទាំងនេះមិនអើពើនឹងការបញ្ជារបស់សមត្ថកិច្ចឲ្យបើកផ្លូវឡើយ។ លោកមានប្រសាសន៍ថា ” មានភ័ស្តុតាងគ្រប់គ្រាន់ដើម្បីដាក់បន្ទុកលើជនជាប់ចោទទាំងប្រាំពីរនាក់នេះ ដូច្នេះសូមតម្កល់សាលាក្រមរបស់សាលាដំបូងរាជធានីភ្នំពេញ”។
នៅឯសវនាការសម្រាប់ចុងចោទផ្សេងទៀត ដែលធ្វើឡើងតាមក្រោយគ្នាភ្លាមៗ ចុងចោទទាំងបួននាក់បានច្រានចោលការអះអាងដែលលើកឡើងថា ពួកគេបានវាយនគរបាលនៅខាងមុខសាលាដំបូងរាជធានី។ អតីតព្រះសង្ឃ សឹង ហៃ បាននិយាយថា នៅពេលគាត់កំពុងដើរត្រឡប់ទៅវត្តវិញ ក្រោយពីដើរទៅកាន់ធនាគារ គាត់បានប្រទះឃើញការប្រវាយប្រតប់គ្នា ហើយក៏ឈប់ដើម្បីថតរូបចុះផ្សាយពីអ្វីដែលកំពុងកើតឡើង។
គាត់បាននិយាយថា “ខ្ញុំមិនបានវ៉ៃឬប្រមាថអាជ្ញាធរទេ។ នៅពេលខ្ញុំទៅដល់ទីនោះ ខ្ញុំចង់ឃើញអ្វីដែលកំពុងកើតឡើង។ ខ្ញុំត្រូវចាប់ខ្លួនដោយសន្តិសុខមួយក្រុម ហើយពួកគេបានវ៉ៃមាត់ខ្ញុំ។ ខ្ញុំសូមច្រានចោលការចោទប្រកាន់នេះ សូមសម្រេចឲ្យខ្ញុំរួចខ្លួន”។
អំឡុងសវនាការទាំងពីរនេះ មេធាវីការពារចុងចោទបានស្នើសុំបង្ហាញរូបភាពវីដេអូនៃទិដ្ឋភាពការតវ៉ាទាំងពីរ។ ប៉ុន្តែចៅក្រមបានច្រានចោលសំណើនេះ ដោយលើកឡើងថា រូបភាពវីដេអូនេះស្ថិតនៅក្នុងសំណុំឯកសាររក្សាទុកសំណុំរឿង ហើយពួកគេបានមើលវារួចហើយ។
ចៅក្រម ងួន អុីម ប្រធានសាលាឧទ្ធរណ៍បានមានប្រសាសន៍ថា សាលាឧទ្ធរណ៍នឹងប្រកាសសេចក្ដីសម្រេចរបស់ខ្លួននៅថ្ងៃច័ន្ទ។
លោក សុរិយា ស៊ូបេឌី ដែលកំពុងស្ថិតនៅក្នុងប្រទេសកម្ពុជា ក្នុងដំណើរបំពេញទស្សនកិច្ចចុងក្រោយបង្អស់របស់លោកក្នុងឋានៈជាប្រេសិតសិទ្ធិមនុស្សអង្គការសហប្រជាជាតិប្រចាំកម្ពុជា បានចូលរួមស្ដាប់សវនាការទាំងនេះដែរ ប៉ុន្តែបានបដិសេធមិនមានប្រសាសន៍ទៅកាន់ក្រុមអ្នកយកព័ត៌មានអំពីសំណុំរឿងទាំងនេះទេ។ អង្គការសិទ្ធិមនុស្សលីកាដូ បានលើកឡើងថា តំណាងមកពីស្ថានទូតអូស្ត្រាលី អង់គ្លេស សហភាពអឺរ៉ុប អាល្លឺម៉ង់ ស្វ៊ីស និងសហរដ្ឋអាមេរិក ក៏មានវត្តមាននៅក្នុងសវនាការនោះដែរ។
អំឡុងសវនាការនេះ អ្នកគាំទ្រប្រមាណ៤០០នាក់របស់ចុងចោទទាំងនេះ ដែលរួមមានសាច់ញាតិ និងព្រះសង្ឃផង បានធ្វើការតវ៉ានៅខាងក្រៅសាលាឧទ្ធរណ៍ ដើម្បីទាមទារឲ្យដោះលែងពួកគេ។
កាលពីថ្ងៃពុធ អង្គការលើកលែងទោសអន្តរជាតិបានចេញសេចក្ដីថ្លែងការណ៍មួយជំរុញឲ្យសាលាឧទ្ធរណ៍ដកការចោទប្រកាន់លើចុងចោទទាំង១១រូប។
អ្នកធ្វើយុទ្ធនាការស្ដីពីកម្ពុជាឈ្មោះ ជែនីស ប៊ីនលែន (Janice Beanland) មកពីអង្គការលើកលែងទោសអន្តរជាតិ បានលើកឡើងនៅក្នុងសេចក្ដីថ្លែងការណ៍មួយថា “សកម្មជនទាំងនេះគឺជាជនរងគ្រោះនៃការបង្ក្រាបយ៉ាងព្រៃផ្សៃពីសំណាក់អាជ្ញាធរកម្ពុជា ទៅលើការតវ៉ាដោយសន្តិវិធី។ ពួកគេមិនគួរទទួលការផ្ដន្ទាទោសតាំងពីដំបូងម្លេ៉ះ កុំថាឡើយត្រូវជាប់ពន្ធនាគារនោះ។ ការប្រើប្រាស់ច្បាប់ និងតុលាការតាមអំពើចិត្តដើម្បីបំភិតបំភ័យ និងផ្ដន្ទាទោសប្រជាពលរដ្ឋដោយសារតែពួកគាត់ប្រើប្រាស់សិទ្ធិសេរីភាពរបស់ខ្លួនក្នុងការជួបជុំដោយសន្តិវិធី ត្រូវតែបញ្ចប់”៕ សុខុម (រាយការណ៍បន្ថែមដោយ ម៉ិច ដារ៉ា)