ក្រុមមន្ត្រីបានឲ្យដឹងថា កាលពីម្សិលមិញនគរបាលកំពង់ស្ពឺបានចាប់ខ្លួនបុរសម្នាក់ ដែលត្រូវបានសង្ស័យពីបទបាញ់សម្លាប់ព្រះសង្ឃមួយអង្គព្រះជន្ម៧៦ព្រះវស្សា ខណៈព្រះអង្គកំពុងសម្ដែងធម៌ទេសនានៅក្នុងពិធីបុណ្យមួយកាលពីយប់ថ្ងៃសៅរ៍។
លោក ឃុត សុផល អធិការនគរបាលស្រុកសំរោងទង បានឲ្យដឹងថា ព្រះតេជគុណ ម៉ឹង អ៊ុំ គ្រូសូត្រស្ដាំនៅវត្តអង្គស្នៀត ក្នុងស្រុកសំរោងទង ត្រូវអ្នកភូមិនៅក្នុងឃុំតាំងក្រូចនិមន្តទៅសម្ដែងធម៌ទេសនានៅក្នុងពិធីបុណ្យខួប១ឆ្នាំរបស់បងប្អូនប្រុសពីរនាក់ដែលស្លាប់នៅក្នុងគ្រោះថ្នាក់ចរាចរណ៍មួយ។
លោក សុផល បានលើកឡើងថា ព្រះតេជគុណ ម៉ឹង អ៊ុំ ត្រូវគេធ្វើគតនៅម៉ោងប្រហែល៨និង៣០នាទីយប់ មិនយូរប៉ុន្មានបន្ទាប់ពីព្រះអង្គចាប់ផ្ដើមសម្ដែងធម៌ទេសនា និងខណៈព្រះអង្គកំពុងគង់នៅលើគ្រែទេសនានៅចំពោះមុខពុទ្ធបរិស័ទប្រមាណ១០០នាក់។
លោកបានមានប្រសាសន៍ថា “ក្រោយមកប្រហែល៥នាទី មានស្នូរកាំភ្លើងចេញពីក្រោយព្រះតេជគុណ។ ព្រះតេជគុណ ម៉ឹង អ៊ុំ បានសុគតនៅលើគ្រែទេសចំពោះមុខពុទ្ធបរិស័ទ”។
ស្នងការនគរបាលខេត្តនេះបានលើកឡើងថា ព្រះតេជគុណត្រូវគ្រាប់កំាភ្លើងមួយគ្រាប់ ដែលគេបាញ់ចេញពីខាងក្រោយវាំងននចំកខាងឆ្វេងធ្លាយទៅត្រចៀកខាងស្ដាំ។ ព្រះតេជគុណ ម៉ឹង អ៊ុំ បានសុគតភ្លាមៗ ហើយគ្មាននរណាផ្សេងទៀតរងរបួសឡើយ។
លោក សោម បូរ៉ា ស្នងការរងនគរបាលខេត្តកំពង់ស្ពឺបានលើកឡើងថា កាលពីម្សិលមិញមន្ត្រីរបស់លោកបានចាប់ខ្លួនបុរសអាយុ២៨ឆ្នាំម្នាក់នៅក្បែរស្រុកភ្នំស្រួច ដែលសង្ស័យថា ជាអ្នកធ្វើគតព្រះតេជគុណអង្គនេះ។
លោកបានមានប្រសាសន៍ដោយបដិសេធមិនប្រាប់ឈ្មោះជនសង្ស័យថា “ទោះបីជាជនសង្ស័យនៅមិនទាន់សារភាពក៏ដោយ តែនគរបាលរបស់យើងកំពុងតែជជីកសួរជននេះបន្ថែមហើយ”។
លោក បូរ៉ា បានលើកឡើងទៀតថា បុរសរូបនេះត្រូវបានចាត់ទុកថា ជាជនសង្ស័យព្រោះជននេះធ្លាប់មានជម្លោះជាមួយព្រះតេជគុណ ម៉ឹង អ៊ុំ កាលពីពីរបីថ្ងៃកន្លងមកនេះ ដោយជននេះថែមទាំងបានចាក់សោព្រះតេជគុន ម៉ឹង អ៊ុំ នៅក្នុងបន្ទប់មួយទៀតផង។
ឧត្ដមសេនីយ៍ត្រី ម៉ែន ស៊ីប៊ន មេបញ្ជាការកងរាជអាវុធហត្ថខេត្តកំពង់ស្ពឺបានលើកឡើងថា មន្ត្រីរបស់លោកក៏កំពុងស៊ើបអង្កេតអំពើឃាតកម្មនេះដែរ។
លោកបានមានប្រសាសន៍ដោយមិនរៀបរាប់ច្រើនថា ” ករណីនេះគឺជារឿងគំនុំ ប៉ុន្តែយើងមិនអាចដឹងនៅឡើយទេថា តើហេតុអ្វីបានជាឃាតករបាញ់សម្លាប់ព្រះតេជគុណ”។
ទោះជាយ៉ាងណាលោក ទេព ផាន់ណា មេបញ្ជាការរងកងរាជអាវុធហត្ថខេត្តបានលើកឡើងថា អ្នកស៊ើបអង្កេតសង្ស័យថា ឃាតករប្រហែលជាប្រើកាំភ្លើងកែច្ឆៃក្នុងការធ្វើឃាតនេះ ព្រោះគេមិនឃើញមានសំបកគ្រាប់នៅកន្លែងកើតហេតុឡើយ។
ការធ្វើគតព្រះតេជគុណ ម៉ឹង អ៊ុំ គឺជាការធ្វើគតថ្មីបំផុតនៅក្នុងចំណោមហេតុការណ៍ដ៏ហិង្សាមួយចំនួនពាក់ព័ន្ធនឹងព្រះសង្ឃក្នុងពេលថ្មីៗនេះ។
កាលពីចុងខែធ្នូ ព្រះតេជគុន មូល សុខនី ព្រះជន្ម៣១ព្រះវស្សាគង់នៅវត្តខេមរាសីមា ក្នុងខេត្តព្រះវិហារ ត្រូវបានចាប់ខ្លួន និងចោទប្រកាន់ពីបទមនុស្សឃាតគ្រោងទុកជាមុនលើជនរងគ្រោះម្នាក់ឈ្មោះ មិត្ត ទូច អាយុ៦៤ឆ្នាំ ដែលសាកសពរបស់គាត់ត្រូវបានគេរកឃើញកប់នៅក្រោយកុដិរបស់ព្រះសង្ឃអង្គនេះ។
កាលពីថ្ងៃទី១២ ខែមករា នគរបាលបានចាប់ខ្លួនអតីតសាមណេរ ចាន់ សុភ័ក្ត្រ អាយុ១៨ឆ្នាំ នៅវត្តសាមគ្គីរង្សី នៅក្នុងរាជធានីភ្នំពេញ ពីបទយកកូនកាំបិតចាក់សម្លាប់គ្រូសូត្រស្ដាំមួយអង្គ៕ ស៊ុយឈាង