ខណៈដែលជនស្វែងរកសិទ្ធិជ្រកកោនម៉ុងតាញ៉ា១៤នាក់បន្តគេចខ្លួនពីអាជ្ញាធរក្នុងព្រៃខេត្តរតនគិរី មន្ត្រីម្នាក់បាននិយាយកាលពីថ្ងៃអាទិត្យថា ប៉ូលិសបានបញ្ជូន”ចារ៉ាយវៀតណាម”ប្រាំពីរនាក់ចេញពីខេត្តភាគឦសានកាលពីថ្ងៃសៅរ៍។
ស្នងការប៉ូលិសខេត្តរតនគិរី លោក ងួន គឿន បានមានប្រសាសន៍ថា ប៉ូលិសព្រំដែនបានចាប់ខ្លួនមនុស្សប្រាំពីរនាក់កាលពីថ្ងៃសៅរ៍ក្នុងឃុំប៉ក់ញ៉ៃស្រុកអូរយ៉ាដាវ និងបានប្រគល់ពួកគេឲ្យអាជ្ញាធរវៀតណាមនៅជិតព្រំដែននៅថ្ងៃដដែលនោះ។
លោកបាននិយាយថា “យើងបានចាប់មនុស្សទាំងនោះពីព្រោះពួកគេបានឆ្លងព្រំដែនដោយខុសច្បាប់ និងបានធ្វើចម្ការលើដីខ្មែររបស់យើង”។
លោកបានបន្ថែមថា “ពួកគេមិនមែនជនម៉ុងតាញ៉ាទេ ពួកគេជាប្រជាជនចារ៉ាយវៀតណាម”។
ម៉ុងតាញ៉ាជាក្រុមជនជាតិដើមភាគតិចដែលរស់ផ្តុំគ្នានៅតំបន់ខ្ពង់រាបកណ្តាលរបស់ប្រទេសវៀតណាមបង្កើតបានប្រហែលជា៣០កុលសម្ព័ន្ធភ្នំ ក្នុងនោះមានទាំងក្រុមចារ៉ាយផង។ ទោះជាមានចំនួនប្រជាជនចារ៉ាយរស់នៅក្នុងខេត្តរតនគិរីក៏ដោយ ក៏សមាជិកភាគច្រើននៃក្រុមជនជាតិដើមភាគតិចនេះរស់នៅក្នុងខេត្តចា ឡាយ និងខេត្តកន ធើម របស់វៀតណាមដែរ។ ចារ៉ាយវៀតណាមទាំងអស់ត្រូវគេចាត់ទុកថា ជាជនម៉ុងតាញ៉ា។
កាលពីថ្ងៃទី៣ខែមករា ជនស្វែងរកសិទ្ធិជ្រកកោនម៉ុងតាញ៉ាប្រាំនាក់បានឆ្លងចូលខេត្តរតនគិរី ហើយតាំងពីពេលនោះមក ក្រុមចារ៉ាយខ្មែរបានជួយពួកគេនៅស្រុកអូរយ៉ាដាវ។
ជនម៉ុងតាញ៉ាប្រាំបួននាក់មួយក្រុមផ្សេងទៀត ក្នុងនោះមានទាំងក្មេងពីរនាក់និងទារកម្នាក់ផង បានមកដល់ខេត្តនេះកាលពីថ្ងៃទី១៧ខែមករា ហើយបានចូលរួមជាមួយនឹងក្រុមមានគ្នាប្រាំនាក់។
ទាំងពីរក្រុមអះអាងថា បានភៀសខ្លួនពីការធ្វើទុក្ខបុកម្នេញខាងសាសនានិងនយោបាយក្នុងប្រទេសវៀតណាម។
លោកស្នងការ គឿន បាននិយាយកាលពីថ្ងៃអាទិត្យថា ប៉ូលិស ដែលបានចាប់ផ្តើមឆែកឆេរពីផ្ទះមួយទៅផ្ទះមួយរកក្រុមមានគ្នាប្រាំនាក់នេះ បន្ទាប់ពីពួកគេបានឆ្លងព្រំដែនភ្លាម លែងស្វែងរកជនស្វែងរកសិទ្ធិជ្រកកោន ដែលលោកបានសំដៅលើ”ចារ៉ាយវៀតណាម”នោះទៀតហើយ។ លោកបាននិយាយថា “មិនមានម៉ុងតាញ៉ាទេ ប៉ុន្តែមានប្រជាជនចារ៉ាយវៀតណាមមួយចំនួនកំពុងលាក់ខ្លួនក្នុងព្រៃ”។
បុរសពីរនាក់ដែលប៉ូលិសកំណត់ភិនភាគថាជា”ចារ៉ាយវៀតណាម”ក៏ត្រូវបាននិរទេសចេញពីរខេត្តរតនគិរីកាលពីដើមខែនេះដែរ។ ប៉ូលិសមូលដ្ឋាន ក្នុងនោះមានលោក គឿន ដែរ បាននិយាយនៅពេលនោះថា ពួកគេមិនមែនជាម៉ុងតាញ៉ាទេ ហើយគ្រាន់តែបានដើរចូលដីខ្មែរដោយអចេតនានៅពេលធ្វើចម្ការប៉ុណ្ណោះ។
លោកស្រី វ៉ានហៀ លី (Wan-Hea Lee) នាយកប្រចាំប្រទេសនៅការិយាល័យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សបានលើកឡើងតាមរយៈអុីម៉េលមួយកាលពីថ្ងៃអាទិត្យថា ជនម៉ុងតាញ៉ាប្រាំពីរនាក់ត្រូវបាននិរទេសកាលពីថ្ងៃសៅរ៍ មុនពេលការិយាល័យរបស់លោកស្រីអាចទាក់ទងពួកគេ។
លោកស្រី លី បានមានប្រសាសន៍ថា “យើងមិនមានការទាក់ទងជាមួយក្រុមនេះទេ ហេតុដូច្នេះយើងកំពុងស្វែងរកការបំភ្លឺពីក្រសួងមហាផ្ទៃអំពីថាតើ គេបានផ្ទៀងផ្ទាត់ថា អ្នកទាំងនោះបានស្វែងរកសិទ្ធិជ្រកកោនឬទេ”។ លោកស្រីបានបន្ថែមថា “ក្រសួងមិនទាន់បានឆ្លើយតបអំពីក្រុមមនុស្ស១៤នាក់មុននេះទេ”៕មានិត
(រាយការណ៍បន្ថែមដោយ Chris Mueller)