26 C
Phnom Penh

លោក ស ខេង ​លើក​ឡើង​ថា ​គណបក្ស​​​​​ទាំង​ពីរ​​​ត្រូវ​តែ​​ “ផ្ដោត​ការ​យក​ចិត្ត​ទុក​ដាក់​ឡើង​វិញ​”

ដោយ ឌឹ ខេមបូឌា ដេលី

បទវិភាគ

លោក ស ខេង ​រដ្ឋមន្ត្រ​ី​ក្រសួង​មហាផ្ទៃ​ បាន​មាន​ប្រសាសន៍​កាលពី​ម្សិលមិញ​ថា គណបក្ស​ប្រជាជន​កម្ពុជា​កំពុង​កាន់​អំណាច​ និង​គណបក្ស​សង្គ្រោះ​ជាតិ​ ត្រូវ​តែ​ “ផ្ដោត​ការ​យក​ចិត្ត​ទុក​ដាក់​ឡើង​វិញ” ​និង​ជួប​​ពិភាក្សា​​គ្នា​ជា​ប្រចាំ​​ដើម្បីធានា​ថា គណបក្ស​ទាំងពីរ​មិន​ងាក​រេ​ចេញ​ពី​លក្ខខណ្ឌ​នៃ​កិច្ច​ព្រមព្រៀង​នយោបាយ​​ថ្ងៃ២២ កក្កដា កាលពី​ឆ្នាំ​មុន​។cam-photo-front15

​នៅ​ក្នុង​សន្និសីទ​កាសែត​រួម​គ្នា​​ក្រោយ​ពី​ជំនួប​​ជាមួយ​លោក សម រង្ស៊ី ប្រធាន​គណបក្ស​ប្រឆាំង​​នៅ​ឯ​រដ្ឋសភា ដែល​ជា​ជំនួប​លើក​ដំបូង​​ចាប់​តាំង​ពី​លោក​ទាំងពីរ​​ត្រូវ​បាន​​តែង​តាំង​ជា​ប្រធាន​ក្រុម​តំណាង​រាស្ត្រ​របស់​គណបក្ស​ទាំង​ពីរ​ លោក ស ខេង បាន​​មាន​ប្រសាសន៍​ថា វា​មាន​សារៈសំខាន់​ណាស់​សម្រាប់​គណបក្ស​ទាំង​ពីរ​បន្ត​ការ​ចរចា​។

លោក​បានមាន​ប្រសាសន៍​ទៀត​ថា “រឿង​សំខាន់​គឺ​ថា ជំនួប​នេះ​សម្រាប់​យើង​ពិភាក្សា​អំពី​របៀប​ដែល​យើង​ត្រូវ​ធ្វើ​ការ​នៅ​ពេល​អនាគតឆ្ពោះ​ទៅ​រក​អ្វី​ដែល​ឯកឧត្ដម​ [លោក សម រង្ស៊ី] បាន​លើក​ឡើង​​ថា យើង​ត្រូវ​តែ​ខិត​ខំប្រឹង​ប្រែង​អនុវត្ត​​តាម​កិច្ច​ព្រមព្រៀង​ថ្ងៃ២២ កក្កដា ឆ្នាំ​២០១៤ ព្រមទាំង​កិច្ច​ព្រមព្រៀង​ផ្សេង​ៗ​ទៀត”។

លោក ស ខេង បាន​មាន​ប្រសាសន៍​បន្ថែម​ថា លោក​ និង​លោក សម រង្ស៊ី បាន​ពិភាក្សា​គ្នា​ថាតើ​​​​​​​ប្រធាន​ក្រុម​​តំណាង​រាស្ត្រ​ទាំង​ពីរ​​​​គួរ​តែ​ជួប​គ្នា​​១ខែម្ដង ឬក៏​៣ខែ​ម្ដង​។ លោក​បានមាន​ប្រសាសន៍​ថា មិន​ទាន់​មាន​ការ​សម្រេច​ណាមួយ​​​នៅ​ឡើយ​ទេ​លើ​បញ្ហា​នេះ ប៉ុន្តែ​លោក​បាន​មាន​ប្រសាសន៍​ថា ជំនួប​ញឹកញាប់​គឺ​ជារឿង​សំខាន់​។

លោក​បាន​លើក​ឡើង​ថា ” យើង​អាច​ពិនិត្យ​ផ្ទៀង​ផ្ទាត់បាន​​ថា តើ​សកម្មភាព​ទាំង​អស់​ដែល​គណបក្ស​ទាំង​ពីរ​បាន​ធ្វើ​កន្លង​មក​ ស្ថិត​នៅ​ក្នុង​ក្របខណ្ឌ​នៃ​កិច្ច​ព្រមព្រៀង​ថ្ងៃ​២២ កក្កដា ឆ្នាំ​២០១៤ ឬក៏​ងាក​ឆ្ងាយ​ចេញពី​វា​។ ដូច្នេះ យើង​​ត្រូវ​តែ​ផ្ដោត​ការ​យក​ចិត្ត​ទុក​ដាក់​ឡើង​វិញ ដើម្បី​ត្រឡប់​ទៅ​រក​កិច្ច​ព្រមព្រៀង​ថ្ងៃ​២២ កក្កដា ឆ្នាំ​២០១៤​”។

កាលពី​ដើម​ខែ​នេះ លោក ស ខេង និង​លោក សម រង្ស៊ី ​ត្រូវ​បាន​​​តែង​តាំង​​​ជា​​ប្រធាន​ក្រុម​​តំណាង​រាស្ត្រ​​របស់​គណបក្ស​ប្រជាជន​កម្ពុជា និង​គណបក្ស​​សង្គ្រោះ​ជាតិ​ ដោយ​ទទួល​យក​មុខ​តំណែង​ដែល​ត្រូវ​បាន​​បង្កើត​ឡើង​​នៅ​ក្នុង​ការ​ចរចា​រវាង​លោក សម ​រង្ស៊ី និង​លោក​នាយករដ្ឋមន្ត្រី ហ៊ុន សែន កាលពី​ខែ​វិច្ឆិកា។

ទាំង​មុន​ពេល​ការ​ចរចា​ទាំង​នោះ​ និង​ចាប់​តាំង​ពី​ពេល​នោះ​មក​ គណបក្ស​ប្រជាជន​កម្ពុជា​បាន​រង​ការ​ចោទ​ប្រកាន់​ម្ដង​ហើយ​ម្ដង​ទៀត​ថា បាន​បំពាន​កិច្ច​ព្រមព្រៀង​ថ្ងៃ​២២​ កក្កដា តាម​រយៈ​ការ​​ដាក់​ពន្ធនាគារ​សកម្មជន​ និង​មន្ត្រី​គណបក្ស​​សង្គ្រោះជាតិ​សរុប​ចំនួន​១៩​នាក់​ពីបទ​​ចោទ​ប្រកាន់​​​ព្រហ្មទណ្ឌ​​​ ដែល​ជាទូទៅ​គេ​ជឿ​ថា ​ត្រូវ​បាន​ប្រឌិត​ឡើង ឬ​ហួស​ហេតុ​។

កិច្ច​ព្រមព្រៀង​​ថ្ងៃ​២២ កក្កដា បានបញ្ចប់​ការ​ធ្វើ​ពហិការ​មិន​ចូល​សភា​​រយៈ​ពេល​១០ខែ​របស់​គណបក្ស​សង្គ្រោះ​ជាតិ​ និង​បាន​ធ្វើ​ឲ្យ​លទ្ធផល​ចម្រូង​ចម្រាស​នៃ​ការ​បោះ​ឆ្នោត​ជាតិ​កាលពី​ខែ​កក្កដា ឆ្នាំ​២០១៣ ទៅ​ជា​ស្រប​ច្បាប់​​ជាថ្នូរ​នឹង​ការ​​សន្យាធ្វើ​កំណែទម្រង់​ពី​សំណាក់​​គណបក្ស​ប្រជាជន​កម្ពុជា​។

កាលពី​ម្សិលមិញ នៅ​ពេល​អ្នក​យកព័ត៌មាន​ម្នាក់​សាកសួរ​ថា តើ​លោកគិត​​ថា គណបក្ស​ប្រជាជន​កម្ពុជា​​បាន​បំពាន​កិច្ចព្រមព្រៀង​ថ្ងៃ​២២ កក្កដា ឬយ៉ាង​ណា​នោះ លោក​ ស ខេង បាន​មាន​ប្រសាសន៍​ថា បញ្ហា​នេះ​​​មិន​មែន​ជា​របៀបវារៈ​មួយ​នៃ​ការ​ពិភាក្សា​របស់​លោកជាមួយ​លោក សម រង្ស៊ី នៅព្រឹក​នោះ​ទេ​។

លោក ហ៊ុន សែន បានមាន​ប្រសាសន៍​កាលពី​សប្ដាហ៍​មុន​ថា លោក​ខក​ចិត្ត​ចំពោះ​ “វប្បធម៌​នៃការ​សន្ទនា​” បន្ទាប់ពី​មានការ​​វាយ​ប្រហារ​ពាក្យ​សម្ដី​មក​លើ​រូប​លោក​ជា​បន្ត​បន្ទាប់​ពី​សំណាក់​ក្រុម​មេដឹកនាំ​គណកប្ស​ប្រឆាំង ដែល​លោក​​​បាន​លើក​ឡើង​ថា បាន​រំលោភ​ស្មារតី​នៃ​​កិច្ច​ព្រមព្រៀង​ថ្ងៃ​២២ កក្កដា ហើយ​បាន​មាន​ប្រសាសន៍​ថា វា​ដល់​ពេល​ដែល​​នយោបាយ​វិល​ទៅ​រក​ភាព​ប្រក្រតី​វិញ​ហើយ។

ទោះជាយ៉ាង​ណា លោក សម រង្ស៊ី បាន​មាន​ប្រសាសន៍​កាលពី​ម្សិលមិញ​ថា ជំនួប​រវាង​​ប្រធាន​ក្រុម​តំណាង​រាស្ត្រ​មតិ​​ភាគតិច និង​ប្រធាន​ក្រុម​តំណាង​រាស្ត្រ​មតិ​​ភាគច្រើន​ នឹង​ជួយ​ពន្យារ​អាយុ​កាល​​នៃ​ “វប្បធម៌​នៃ​ការ​ចរចា​”។

ប្រធាន​គណបក្ស​ប្រឆាំង​រូប​នេះ​បាន​ការ​ពារ​ការ​វាយ​ប្រហារ​​ដោយ​ពាក្យ​សម្ដី​ថា ជា​ការ​បញ្ចេញ​មតិ​ដែល​អាច​ទទួល​យក​បាន​ ដោយ​សន្យា​ ” អនុវត្ត​តាម​ពាក្យ​សម្ដី​ និង​ស្មារតី​” នៃ​កិច្ចព្រមព្រៀង​ថ្ងៃ២២ កក្កដា។

លោក​បានមាន​ប្រសាសន៍​ថា “ទោះបីជា​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​ប្រជែង​គ្នា​ក៏ដោយ ក៏​ការ​ប្រកួត​ប្រជែង​នេះ​គឺ​ដើម្បី​ផល​ប្រយោជន៍​ជាតិ និង​ដើម្បី​សន្តិសុខ​ សន្តិភាព ស្ថិរភាព​ និង​​ភាព​សុខដុម​របស់​ប្រជាពលរដ្ឋខ្មែរ​”។

លោក​ សម រង្ស៊ី បាន​លើក​ឡើង​ថា ទោះបី​ជា​លោក ហ៊ុន សែន បាន​ធ្វើ​អត្ថាធិប្បាយ​បែប​នេះ​ក្ដី​ ក៏​វប្បធម៌​នៃ​ការសន្ទនា​នៅ​តែ​មាន​សារៈសំខាន់​សម្រាប់​ការ​ពារ​សន្តិភាព​នៅ​ក្នុង​ប្រទេស​កម្ពុជា ខណៈ​ការ​បោះ​ឆ្នោត​ជាតិ​ឆ្នាំ​២០១៨​ខិត​ជិត​មក​ដល់ និង​គំរាម​បង្ក​ភាព​តាន​តឹង​​ផ្នែក​នយោបាយ​ជា​ថ្មី​ម្ដង​ទៀត។

លោក​មាន​ប្រសាសន៍​ថា “មិន​ថា​គណបក្ស​ណា​ឈ្នះ​ឆ្នោត​លើក​ក្រោយ​ទេ គឺ​ប្រជាពល​រដ្ឋខ្មែរ​នៅ​តែ​មាន​សុខដុម​រមនា​ ពីព្រោះ​គណបក្ស​ទាំង​ពីរ​​បាន​រក​ឃើញ​ការ​សម្រុះ​សម្រួល​ និង​គោរព​គ្នា​។ យើង​ដោះស្រាយ​បញ្ហា​ដោយ​សន្តិវិធី​នៅពេល​នេះ និង​ពេល​ក្រោយ​។ វប្បធម៌​នៃ​ការ​សន្ទនា​គឺ​ជាមូលដ្ឋាន​នៃ​លទ្ធិប្រជាធិបតេយ្យ។ ដរាប​ណា​យើង​មាន​វប្បធម៌​នៃ​ការ​សន្ទនា លទ្ធិ​ប្រជាធិបតេយ្យ​​នឹង​លូត​លាស់​រឹង​មាំ​ពិប្រាកដ​”៕ សុខុម​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស