ក្រុមមន្ត្រីបាននិយាយកាលពីម្សិលមិញថា អ្នកដាក់អន្ទាក់សត្វក្នុងមូលដ្ឋានមួយក្រុមក្នុងខេត្តឧត្ដរមានជ័យ កាលពីថ្ងៃសៅរ៍បានប្រទះឃើញសាកសពស្ត្រីវ័យក្មេងម្នាក់រលួយយ៉ាងខ្លាំងដែលនគរបាលជឿថា ត្រូវបានរំលោភហើយសម្លាប់ប្រហែល១ខែមកហើយ។
យោងតាមលោក ឡឹក សុខា ស្នងការរងនគរបាលខេត្តបានឲ្យដឹងថា សាកសពស្ត្រីរូបនោះគ្មានសម្លៀកបំពាក់ទេ ហើយសាច់ភាគច្រើនត្រូវបានគេប្រទះឃើញនៅចម្ងាយប្រហែល៥០០ម៉ែត្រពីភូមិអូររំដួល ក្នុងឃុំព្រះប្រឡាយ ស្រុកត្រពាំងប្រាសាទ។
លោក សុខា បានមានប្រសាសន៍ថា “អ្នកភូមិក្នុងមូលដ្ឋានបានទៅដាក់អន្ទាក់មាន់ព្រៃនៅក្នុងព្រៃ ហើយនៅពេលធ្វើដំណើរត្រឡប់មកវិញ ពួកគាត់បានធុំក្លិនស្អុយចម្លែក ហើយក៏បានប្រទះឃើញសាកសព។ បន្ទាប់ពីយើងទទួលបានព័ត៌មានពីអ្នកទាំងនោះ យើងបានទៅពិនិត្យមើលសាកសពនោះ”។
លោកបានបន្ថែមថា ស្ត្រីរូបនេះអាយុខ្ទង់២០ឆ្នាំ។ លោក អុិន លន អធិការនគរបាលស្រុកស្ដីទីបានមានប្រសាសន៍ថា ក្រុមស៊ើបអង្កេតសង្ស័យថា ស្ត្រីរូបនេះត្រូវបានគេរំលោភហើយសម្លាប់ ពីព្រោះសម្លៀកបំពាក់របស់នាងត្រូវគេឃើញគរទុកក្បែរនោះ ប៉ុន្តែមិនអាចកំណត់អត្តសញ្ញាណជនរងគ្រោះឬអ្នករំលោភបានឡើយ។
លោក អុិន លន បានមានប្រសាសន៍ថា “ជនរងគ្រោះប្រហែលជាត្រូវសម្លាប់នៅកន្លែងកើតហេតុ ឬកន្លែងផ្សេង ប៉ុន្តែជនសង្ស័យបានយកសាកសពមកទីនេះដើម្បីបំផ្លាញភ័ស្តុតាង”។ លោកបានបន្ថែមថា “យើងបានទូរស័ព្ទទៅប្រធានភូមិដើម្បីសាកសួរគាត់ថាតើ មាននរណាម្នាក់បាត់កូនស្រីរបស់ខ្លួនឬទេ”៕ សារុន