36 C
Phnom Penh

ប៉ូលិស​ចាប់​ខ្លួន​ជន​ស្វែង​រក​សិទ្ធិ​ជ្រកកោន​ម៉ុងតាញ៉ា​ប្រាំ​នាក់នៅ​ខេត្ត​រតនគិរី

ដោយ ឌឹ ខេមបូឌា ដេលី

បទវិភាគ

អ្នក​ភូមិ​និង​បុគ្គលិក​សិទ្ធិ​​មនុស្ស​បាន​និយាយ​ថា កាលពី​ថ្ងៃ​អាទិត្យ ប៉ូលិស​នៅ​ស្រុក​អូរយ៉ាដាវ ខេត្ត​រតនគិរី​ បាន​ចាប់​ជនស្វែង​រកសិទ្ធិ​ជ្រកកោន​ម៉ុងតាញ៉ា​ប្រាំ​នាក់ និង​កំពុង​ស្វែងរក​អ្នក​ភូមិ​ចារ៉ាយ​បី​នាក់ ដែល​បាន​ជួយ​ពួកគេ​ឲ្យ​គេច​ពី​អាជ្ញាធរ​ ពេល​ពួកគេ​មក​ដល់​ពី​ប្រទេស​វៀតណាម ប្រហែល​ពីរ​សប្តាហ៍​មុន។

អ្នក​ភូមិ​ចារ៉ាយ​ម្នាក់ ដែល​សុំ​មិន​ប្រាប់​ឈ្មោះ​ព្រោះខ្លាច​មាន​ការ​សងសឹក​ពី​អាជ្ញាធរ បាន​និយាយ​ថា ប៉ូលិស​មកពី​ឃុំសោមធំ ស្រុក​អូរយ៉ាដាវ បាន​ចាប់​ខ្លួន​អ្នក​ស្វែងរក​សិទ្ធិ​ជ្រក​កោន​ប្រាំ​នាក់ ហើយ​បួន​នាក់​ផ្សេងទៀត​បាន​រត់​ចូល​ព្រៃ។

ក្រុម​មាន​គ្នា​ប្រាំបួន​នាក់​ ដែល​មាន​ក្មេង​ពីរ​នាក់​និង​ទារក​ម្នាក់​នេះ បាន​មក​ដល់​ខេត្ត​រតនគិរី​កាលពី​ថ្ងៃ​ទី​១៩​ខែ​មករា។

ម៉ុងតាញ៉ា​២៣​នាក់​ផ្សេងទៀត ដែលជា​ក្រុម​អន្តោគ្រាម​រស់នៅ​ផ្តុំ​គ្នា​នៅ​តំបន់​ខ្ពង់រាប​កណ្តាល​របស់​ប្រទេស​វៀតណាម ដែល​បាន​ឆ្លងចូល​ក្នុង​ខេត្ត​នេះ​នៅ​ខែ​មុន ក៏​កំពុង​លាក់​ខ្លួន​ក្នុង​ស្រុក​អូរយ៉ាដាវ​ដែរ។

ជន​ស្វែងរក​សិទ្ធិ​ជ្រកកោន​ទាំងអស់​អះអាង​ថា គេ​បាន​ភៀសខ្លួន​ពី​ការ​ធ្វើ​ទុក្ខបុកម្នេញ​ខាង​សាសនា​និង​នយោបាយ​ក្នុង​ប្រទេស​កំណើត​របស់​ខ្លួន។

អ្នក​ភូមិ​ចារ៉ាយ​ម្នាក់​ទៀត ដែល​បាន​ជួយ​យក​អាសា​ក្រុម​មួយ​មាន​គ្នា​ប្រាំបួន​នាក់​ពេល​ប៉ូលិស​មក​ដល់ បាន​និយាយ​ថា ប៉ូលិស​១០​នាក់​ជិះ​រថយន្ត​ប្រាំ​គ្រឿង​បាន​ចូល​ភូមិ សូគុល នៅ​ម៉ោង​ប្រហែល​៤​និង​៣០​នាទី​ល្ងាច។

អ្នក​ភូមិ​រូប​នេះ​បាន​និយាយ​ថា “ពួកគេ​បាន​ព្យាយាម​ចាប់​ខ្លួន​មនុស្ស​ប្រាំបួន​នាក់ ពេល​អ្នក​ទាំង​នោះ​ស្នាក់នៅ​ក្នុង​ចម្ការ​ក្នុង​ព្រៃ”។ គាត់​បាន​និយាយ​ថា “ខ្ញុំ ប្អូន​ប្រុស​និង​ប្អូន​ស្រី​របស់​ខ្ញុំ​ឥឡូវ​នេះ​កំពុង​លាក់​ខ្លួន​ក្នុង​ព្រៃ ពីព្រោះ​ប៉ូលិស​ចង់​ចាប់​យើង​ដែរ”។

អ្នក​ភូមិចារ៉ាយ​រូប​នេះ​បាន​បន្ថែម​ថា ទារក ក្មេង​ពីរ​នាក់​និង​ម្តាយ​របស់​វា​ស្ថិត​ក្នុង​ចំណោម​មនុស្ស​ប្រាំ​នាក់​ដែល​គេ​ចាប់​ខ្លួន។

មន្ត្រី​ប៉ូលិស​និង​មន្ត្រី​រដ្ឋាភិបាល​ក្នុង​ខេត្ត​រតនគិរី​នៅ​ថ្នាក់​ខេត្ត ស្រុក​និង​ឃុំ មិន​អាច​ទាក់ទង​បាន​ទេ​កាលពី​ថ្ងៃ​អាទិត្យ។

លោក ឆាយ ធី អ្នក​សម្រប​សម្រួល​របស់​សមាគម​ការពារ​សិទ្ធិ​មនុស្ស អាដហុក បាន​និយាយ​ថា លោក​បាន​ទទួល​សេចក្តី​រាយការណ៍​ថា រថយន្ត​ប៉ូលិស​មាន​ជន​ម៉ុងតាញ៉ា​ជិះ​បាន​បើក​សំដៅ​ទៅ​ព្រំដែន​វៀតណាម។

លោក ធី បាន​និយាយ​ថា “យើង​គិត​ថា ប៉ូលិស​កំពុង​បញ្ជូន​មនុស្ស​ប្រាំ​នាក់​នោះ​ទៅ​វៀតណាម ប៉ុន្តែ​មិន​ទាន់​ច្បាស់​ទេ”។

ដោយ​យោងលើ​អនុសញ្ញា​ជនភៀស​ខ្លួន​ឆ្នាំ​១៩៥១ លោក​បាន​បន្ថែម​ថា “ខ្ញុំ​យល់​ថា ការ​បញ្ជូន​ជន​ភៀសខ្លួន​ម៉ុងតាញ៉ា​ទាំង​នេះ​ចេញ​គឺ​ជា​ការ​រំលោភ​សិទ្ធិ​មនុស្ស និង​ជា​ការ​រំលោភ​សន្ធិសញ្ញា​ជន​ភៀស​ខ្លួន”។

ប្រទេស​ហត្ថលេខី​នៃ​អនុសញ្ញា​នេះ​យល់ព្រម​អនុញ្ញាត​ឲ្យ​ជន​ស្វែង​រក​សិទ្ធិ​ជ្រកកោន​ទាំង​អស់​អាច​ទទួល​បាន​នីតិ​វិធី​សុំ​សិទ្ធិ​ជ្រកកោន។ ប្រទេស​កម្ពុជា​បាន​ចុះ​ហត្ថលេខា​កិច្ច​ព្រមព្រៀង​នេះ​នៅ​ឆ្នាំ​១៩៩២។

អាជ្ញាធរ​ខេត្ត​រតនគិរី និង​មន្ត្រី​ក្រសួង​មហាផ្ទៃ​ជាច្រើន​លើក​បាន​ហៅ​ជនម៉ុងតាញ៉ា​ជា​ជន​អន្តោប្រវេសន៍​ខុស​ច្បាប់ និង​បាន​គំរាម​ចាប់​ខ្លួន​និង​និរទេស​ពួកគេ នេះ​គឺ​ជា​ការ​រំលោភ​អនុសញ្ញា​ជន​ភៀស​ខ្លួន ដែល​ចែង​យ៉ាង​ច្បាស់​ថា ការ​ស្វែងរក​សិទ្ធិ​ជ្រកកោន​តម្រូវ​ឲ្យ​មនុស្ស​បំពាន​ច្បាប់​អន្តោប្រវេសន៍ និង​ចែង​ថា ជន​ភៀស​ខ្លួន​មិន​គួរ​ទទួល​រង​ទណ្ឌកម្ម​ចំពោះ​ទង្វើ​នេះ​ទេ។

លោកស្រី វ៉ានហៀ លី (Wan-Hea Lee) នាយក​ប្រចាំ​ប្រទេស​នៅ​ការិយាល័យ​ឧត្ដម​ស្នង​ការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​បាន​ឲ្យ​ដឹង​តាម​រយៈ​អុីម៉េល​មួយ​ថា ការិយាល័យ​របស់​លោក​ស្រី​បាន​ដឹង​អំពី​ការ​ចាប់​ខ្លួន​នេះ។

លោក​ស្រី​បាន​និយាយ​ថា “យើង​បារម្ភ​ណាស់​អំពី​ពួកគេ​ និង​អំពី​ស្ថានភាព​នៃ​ជន​ម៉ុងតាញ៉ា​ទាំងអស់​ដែល​កំពុង​លាក់​ខ្លួន”។

លោក​ស្រី​បាន​បន្ថែម​ថា “យើង​បន្ត​ព្យាយាម​ទាក់ទង​សហការ​ជាមួយ​ក្រសួង​មហាផ្ទៃ​ដើម្បី​ដោះស្រាយ​បញ្ហា​នេះ។ ការ​ពន្យារ​ពេល​ក្នុង​ការ​ដោះស្រាយ​ស្ថានការណ៍​នេះ បើ​ទោះ​ជា​ច្បាប់​ចែង​យ៉ាង​ច្បាស់​ក្នុង​ករណី​នេះ​ក៏​ដោយ ក៏​ជាថ្មី​ម្តងទៀត​វា​បង្ហាញ​ឲ្យ​ឃើញ​បញ្ហា​ការ​គ្រប់គ្រង​ដ៏​ធ្ងន់ធ្ងរ​ក្នុង​ប្រទេស​កម្ពុជា”។

ក្រុម​ម៉ុងតាញ៉ា​១៣​នាក់​ដែល​បាន​មក​ដល់​ខេត្ត​រតនគិរី​កាលពី​ខែ​តុលា ត្រូវ​បាន​អង្គការ​សហ​ប្រជាជាតិ​និង​ក្រសួង​មហាផ្ទៃ​បញ្ជូន​មក​ក្រុង​ភ្នំពេញ​កាលពី​ចុង​ឆ្នាំ​មុន។

នាយកដ្ឋាន​ជន​ភៀសខ្លួន​ក្រសួង​មហាផ្ទៃ​កំពុង​រៀបចំ​ពិនិត្យ​សំណុំ​បែបបទ​ការ​សុំ​សិទ្ធិ​ជ្រកកោន​របស់​ក្រុម​នេះ រួម​ទាំង​ការ​សុំ​សិទ្ធិ​ជ្រកកោន​របស់​ម៉ុងតាញ៉ា​បី​នាក់​ផ្សេងទៀត​ដែល​បាន​មក​ដល់​ក្រុង​ភ្នំពេញ​ដោយឡែកពីគ្នា​កាលពី​ថ្ងៃ​ទី​២១​ខែ​មករា​ផង​ដែរ៕ មានិត (រាយការណ៍​បន្ថែម​ដោយ Chris Mueller)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស