26 C
Phnom Penh

មន្ត្រី​យោធា​និង​ប៉ូលិស​ជាន់​ខ្ពស់​ទទួល​បាន​ការ​ឡើង​តំណែង​ក្នុង​បក្ស

ដោយ ឌឹ ខេមបូឌា ដេលី

បទវិភាគ

គណបក្ស​ប្រជាជន​កម្ពុជា​កំពុង​កាន់​អំណាច​បាន​ស្វាគមន៍​សមាជិក​ថ្មី​ចូល​គណៈ​កម្មាធិការ​កណ្តាល​នៅ​ថ្ងៃ​បញ្ចប់​នៃ​មហា​សន្និបាត​គណបក្ស​របស់​ខ្លួន​កាលពី​ថ្ងៃ​អាទិត្យ ដោយ​បញ្ចូល​សមាជិក​ថ្មី​ជាច្រើន​នាក់​ក្នុង​ជួរ​គណៈ​កម្មាធិការ​កណ្តាល​បក្ស ដែល​សឹងតែ​បាត់បង់​ការ​គ្រប់គ្រង​អំណាច​ជាច្រើន​ទសវត្សរ៍​របស់​ខ្លួន​ក្នុង​ការ​បោះឆ្នោត​ជាតិ​ចុង​ក្រោយ​នេះ។

ការ​បន្ថែម​នេះ​កើន​ជាង​ពីរ​ដង​នៃ​សមាជិក​គណៈ​កម្មាធិការ​កណ្តាល​គឺ​ឡើង​ដល់​៥៤៥​នាក់ និង​បញ្ចូល​មន្ត្រី​យោធា​និង​ប៉ូលិស​ជាន់​ខ្ពស់​មួយ​ចំនួន ព្រមទាំង​កូន​ប្រុស​បី​នាក់​​របស់​លោក​នាយក​រដ្ឋមន្ត្រី ហ៊ុន សែន​ ផង​ដែរ។

និយាយ​ជាមួយ​អ្នក​យក​ព័ត៌មាន​នៅ​ពេល​បិទ​មហា​សន្និបាត លោក ខៀវ កាញារីទ្ធ រដ្ឋមន្ត្រី​ក្រសួង​ព័ត៌មាន​បាន​អួត​អំពី​ការ​បន្ថែម​ស្ត្រី​៤៥​រូប​ចូល​គណៈ​កម្មាធិការ​កណ្តាល និង​សមាជិក “វ័យ​ក្មេង” ៧០​រូប​អាយុ​ក្រោម​៥០​ឆ្នាំ។

ក្នុង​ចំណោម​សមាជិក​២៦៨​នាក់​ក្នុង​បញ្ជីគណៈ​កម្មាធិការ​កណ្តាល​ដែល​ដឹក​នាំ​សមាជ​កាលពី​ថ្ងៃ​សុក្រ ២៧​រូប​បានទទួល​មរណភាព​ចាប់តាំងពី​គណៈ​កម្មាធិការ​នេះ​បាន​កោះ​ប្រជុំ​ចុង​ក្រោយ​កាលពី​ឆ្នាំ​២០១៣ មួយ​រូប​បាន​លាលែង​ចេញ​ពី​តំណែង និង​បណ្តេញ​ចេញ​ពី​គណបក្ស​មួយ​រូប។

លោក កាញារីទ្ធ បាន​មាន​ប្រសាសន៍​ថា “យើង​បាន​បន្ថែម​សមាជិក ពីព្រោះ​សមាជិក​ចាស់​កាន់តែ​ចាស់​និង​ទទួល​មរណភាព។ យើង​ត្រូវ​ជ្រើសរើស​យុវជន ពីព្រោះ​ចំនួន​៥០​ភាគរយ​នៃ​ប្រទេស​នេះ​មាន​អាយុ​តិចជាង​៣០​ឆ្នាំ ដូច្នេះ​យើង​បាន​ជ្រើសរើស​យុវជន​ដែល​មាន​បទពិសោធន៍…។ យើង​ត្រូវការ​អ្នក​ស្នង​ដែល​មាន​សមត្ថភាព​គ្រប់គ្រាន់”។

លោក​បាន​មាន​ប្រសាសន៍​ថា គណបក្ស​មិន​បាន​កែប្រែ​គណៈកម្មាធិការ​អចិន្ត្រៃយ៍​ទេ ហើយ​ថាប្រធាន​គណៈកម្មាធិការ​កណ្តាល​ដែល​មាន​ជំងឺ គឺ​លោក ជា ស៊ីម ប្រធាន​ព្រឹទ្ធសភា ដែល​មិន​បាន​ចូលរួម​ក្នុង​មហាសន្និបាត​នេះ ពីព្រោះ​កំពុង​ទទួល​ការ​ព្យាបាល​ជំងឺ​នៅ​ប្រទេស​វៀតណាម​នោះ បាន​ទទួល​អាសនៈ​របស់​លោក​ដដែល។

លោក កាញារីទ្ធ ​មិន​បាន​ប្រាប់​ឈ្មោះ​នរណា​ម្នាក់​ក្នុង​ចំណោម​សមាជិក​ថ្មី​របស់​គណៈ​កម្មាធិការ​កណ្តាល​នេះ​ទេ។

ប៉ុន្តែ​បើ​យោងតាម​បញ្ជី​មួយ​បង្ហោះ​តាម​គេហ​ទំព័រ​ព័ត៌មាន​ភាសាខ្មែរ​ក្នុង​ស្រុក​បាន​ឲ្យ​ដឹង​ថា បញ្ជី​នោះ​មាន​ឈ្មោះ​កូន​ប្រុស​ទាំង​បី​នាក់​របស់​លោក​នាយករដ្ឋមន្ត្រី ហ៊ុន សែន និង​មនុស្ស​ដ៏​មាន​ឥទ្ធិពល​មួយ​ចំនួន​ក្នុង​ជួរ​យោធា​និង​ប៉ូលិស​ផងដែរ។

បញ្ជី​នោះ​មាន​ឈ្មោះ​លោក ឆៃ ស៊ីណា​រិ​ទ្ធ ប្រធាន​នាយកដ្ឋាន​សន្តិសុខ​ផ្ទៃក្នុង​ដ៏​មាន​អំណាច​នៅ​ក្រសួង​មហាផ្ទៃ លោក ហ៊ីង ប៊ុនហៀង មេបញ្ជាការ​កង​អង្គរក្ស​ផ្ទាល់​របស់​លោក​នាយក​រដ្ឋមន្ត្រី លោក ទូច ណារុថ ប្រធាន​នាយកដ្ឋាន​អង្គរក្ស​ក្រសួង​មហាផ្ទៃ លោក ម៉ក់ ជីតូ អគ្គស្នងការ​រងនៃ​អគ្គស្នងការ​ដ្ឋាននគរ​បាលជាតិ លោក ជួន សុវណ្ណ ស្នងការ​នគរបាល​ក្រុង​ភ្នំពេញ លោក រ័ត្ន ស៊្រាង មេបញ្ជាការ​កង​រាជអាវុធហត្ថ​ក្រុង​ភ្នំពេញ។

ការ​បន្ថែម​សមាជិក​របស់​ពួកគេ​ទំនង​ជា​បញ្ឆេះ​ឲ្យ​មាន​ការ​រិះគន់​ពី​ក្រុម​ប្រឆាំង​និង​ក្រុម​សិទ្ធិ​មនុស្ស​ថា គណបក្ស​ប្រជាជន​កម្ពុជា​កំពុង​រឹត​បន្តឹង​ការ​ក្តោបក្តាប់​អំណាច​​របស់​ខ្លួន​ថែម​ទៀត​លើ​កម្លាំង​យោធា​និង​ប៉ូលិស​ដែល​ពាក់ព័ន្ធ​នឹង​នយោបាយ​ស្រាប់ ឲ្យ​ខំ​ថែមទៀត​ដើម្បី​ការពារ​គណបក្ស​កាន់​អំណាច​ជាង​ការពារ​ប្រជាជន។

ឈ្មោះ​ថ្មី​មួយ​ចំនួន​ក្នុង​គណៈកម្មាធិការ​កណ្តាល​នេះ​ជា​អ្នក​ចេញ​មុខ​ជាង​គេ​ក្នុង​ការ​បង្ក្រាប​ដោយ​រដ្ឋាភិបាល ​ជួនកាល​មាន​បង្ហូរ​ឈាម​ផង លើ​បក្ស​ប្រឆាំង​និង​ការ​តវ៉ា​របស់​កម្មករ​កាត់ដេរ បន្ទាប់ពី​ការ​បោះឆ្នោត​ជាតិ​ឆ្នាំ​២០១៣។

មហាសន្និបាត​នេះ ដែលជា​លើក​ដំបូង​ហើយ​របស់​គណបក្ស​ប្រជាជន​កម្ពុជា ចាប់តាំងពី​ជិតចាញ់​ឆ្នោត​របស់​ខ្លួន​ក្នុង​ការ​បោះ​ឆ្នោត​ជាតិ គឺ​មាន​ការ​ពិភាក្សា​គ្នា​ផុលផុស​អំពី​សេចក្តី​ត្រូវការ​របស់​បក្ស​ដើម្បី​រៀនសូត្រ​ពី​បទ​ពិសោធ​និង​កំណែ​ទម្រង់។ លោក កាញារីទ្ធ មិន​បាន​ឲ្យ​ដឹង​ច្រើន ថា​កំណែ​ទម្រង់​ទាំង​នោះ​ជា​អ្វី​ខ្លះ​នោះ​ទេ។ លោក​បាន​ឲ្យ​ដឹង​អំពី​ការ​ដំឡើងប្រាក់​ខែ​នៅ​ពេល​ខាង​មុខ​សម្រាប់​មន្ត្រី​រាជការ​និង​កម្មករ​កាត់ដេរ និង​បាន​អំពាវនាវ​ឲ្យ​ការិយាល័យ​រដ្ឋាភិបាល​ជាតិ​និង​មូលដ្ឋាន​ជួល​យុវជន​ច្រើន​ថែម​ទៀត និង​ប្រើ​ហ្វេសប៊ុក និង​ធ្វីតធឺ​ដើម្បី​ផ្សព្វផ្សាយ​ការងារ​របស់​ខ្លួន។

លោក​បាន​សន្មត​ថា ភាព​ខ្លាំង​របស់​គណបក្ស​ប្រឆាំង​ក្នុង​ការ​បោះ​ឆ្នោត​ចុងក្រោយ​នេះ​គឺ​ដោយសារ​ការ​រួម​បញ្ចូល​គ្នា​របស់​បក្ស​ប្រឆាំង​ធំៗ​កាលពី​ឆ្នាំ​២០១២ ដើម្បី​បង្កើត​គណបក្ស​សង្គ្រោះ​ជាតិ។

លោក​បាន​និយាយ​ថា “អាសនៈ​របស់​យើង​បាន​ថយ​ចុះ​ដោយសារ​បក្ស​ផ្សេង​បាន​រួម​កម្លាំង​គ្នា ដូច្នេះ​វា​មាន​អាសនៈ​ច្រើន។ ដូច្នេះ​ឥឡូវ​នេះ យើង​ពិនិត្យ​ចំណុច​ខ្វះខាត​ដើម្បី​ពង្រឹង និង​ដាក់​ចេញ​យុទ្ធសាស្ត្រ​ដើម្បី​បោះ​ជំហាន​ទៅមុខ”។ លោក​បាន​បន្ថែម​ថា “ប្រសិន​បើ​គណបក្ស​មិន​រួបរួម​គ្នា​ទេ ​ទ្រាំ​នឹង​ព្យុះ​មិន​បាន​ទេ”។

របាយការណ៍​លេច​ធ្លាយ​មួយ​ដែល​គណបក្ស​ប្រជាជន​បាន​ចែក​ឲ្យ​ទៅ​សមាជិក​នៅ​ថ្ងៃ​ដំបូង​នៃ​មហាសន្និបាត មាន​ភាព​ស្មោះ​ត្រង់​អំពី​បញ្ហា​របស់​បក្ស ដោយ​ចង្អុល​បង្ហាញ​បញ្ហា​ទាំង​នោះ​ រួម​មាន​ដូចជា​អ្វី​គ្រប់យ៉ាង​ចាប់ពី​អំពើ​ពុករលួយ​និង​ញាតិ​បក្ស​និយម​រហូត​ដល់​ការ​រំលោភ​អំណាច ​កង្វះ​ជំនឿ​ប្រជាជន​លើ​ប្រព័ន្ធ​យុត្តិធម៌​និង​អសមភាព​សង្គម​យ៉ាង​ខ្លាំង។

បើទោះជា​មាន​ការ​លើក​ឡើង​ចំៗ​ដ៏​កម្រ​នេះ​ក៏​ដោយ ក៏​លោក កែម ឡី អ្នក​សង្កេត​ការណ៍​នយោបាយ​បាន​និយាយ​ថា គណបក្ស​ប្រជាជន​នឹង​មិន​ធ្វើ​តាម​កំណែ​ទម្រង់​ស៊ី​ជម្រៅ ដែល​ខ្លួន​ត្រូវការ​ដើម្បី​ឈ្នះ​ការ​បោះឆ្នោត​ដោយ​សេរី​និង​ត្រឹមត្រូវ​នោះ​ទេ មិន​ថា​បន្ថែម​មនុស្ស​ប៉ុន្មាន​នាក់​ចូល​គណៈ​កម្មាធិការ​កណ្តាល​របស់​ខ្លួន​ឡើយ ល្គឹកណា​មនុស្ស​ដដែល​នៅ​កាន់​​តំណែង​ជាន់​ខ្ពស់​នោះ។

វប្បធម៌​ស្ថាប័ន​…មិន​ទាន់​បាន​កែ​សម្រួល​ទេ។ ទោះជា​មាន​សមាជិក​ច្រើន​ថែម​ទៀត​ក៏ដោយ ក៏​ពួកគេ​ចាំតែ​ទទួល​ការ​បង្គាប់បញ្ជា​ពី​មេ…។ ពួកគេ​រៀនសូត្រ​ពី​មនុស្ស​ចាស់ វប្បធម៌​ចាស់”។

ជា​អ្នក​រិះគន់​រដ្ឋាភិបាល​ញឹកញាប់ លោក កែម ឡី បាន​បង្កើត​ក្រុម​កំណែ​ទម្រង់​មួយ​កាលពី​ឆ្នាំមុន ដែល​មាន​បំណង​បង្កើត​គណបក្ស​នយោបាយ​មូលដ្ឋាន​ថ្មី​នៅ​ទូទាំង​ប្រទេស​សម្រាប់​ការ​បោះឆ្នោត​លើក​ក្រោយ។

លោក​បាន​និយាយ​ថា ការ​ពង្រីក​គណៈ​កម្មាធិការ​នឹង​មិន​កែប្រែ​អ្វី​ឡើយ បើ​សមាជិក​ថ្មី​មិន​មាន​អំណាច​កែប្រែ​បក្ស​ពី​ខាង​ក្នុង​ទេ​នោះ។

លោក​បាន​និយាយ​ថា “ប៉ុន្តែ​ពួកគេ​គ្រាន់តែ​ដាក់​[សមាជិក​ថ្មី]​ក្នុង​គុក​ឥត​ជញ្ជាំង​ប៉ុណ្ណោះ។ ពួកគេ​គ្មាន​សេរីភាព​និយាយ​អ្វី​ដែល​ពួកគេ​ចង់​និយាយ​ឡើយ”។

លោក ឡៅ ម៉ុងហៃ អ្នក​វិភាគ​នយោបាយ ដែល​ថ្មីៗ​នេះ​បាន​ចូលរួម​ក្នុង​បក្ស​ប្រឆាំង​ ជា​ទី​ប្រឹក្សា​របស់​លោក កឹម សុខា អនុប្រធាន​គណបក្ស​សង្គ្រោះ​ជាតិ បាន​និយាយ​ថា ការ​ពង្រីក​គណៈ​កម្មាធិការ​កណ្តាល​គឺ​គ្មាន​អ្វី​ក្រៅតែ​ពី​ឲ្យ​គណបក្ស​ប្រជាជន​កម្ពុជា​រួបរួម​គ្នា​ លើក​ទឹក​ចិត្ត​សមាជិក​ក្មេងៗ​របស់​ខ្លួន​ឲ្យ​នៅ​មាន​ភក្តី​ភាព ដោយ​ឲ្យ​ពួកគេ​ចូល​ជួរ​សំខាន់​របស់​បក្ស និង​ធ្វើ​ឲ្យ​មនុស្ស​ចាស់​សប្បាយ​ចិត្ត ដោយ​ទុក​ឲ្យ​ពួកគេ​បន្ត​នៅ​តទៀត។

លោក ឡៅ ម៉ុងហៃ បាន​និយាយ​ថា “គ្មាន​នរណា​ចាញ់​ទេ​តាម​មធ្យោបាយ​នេះ”៕ មានិត (រាយការណ៍​បន្ថែម​ដោយ Zsombor Peter)

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស